Read Zokam Siampi Laibu 26 Bible Online

Siampi Laibu 26 - Zokam bible

Siampi Laibu 26

¹1 "’Milim ahikeh lim khat ahikeh suang siangtho khatpeuh bawltawm loin amai-ah kuna na biak dingun suang kikhuak zong phut kei un. Keimah TOPA note Pasian ka hi hi.

²"‘Ka Sabbath-te tang unla ka munsiangtho zahtak un. Keimah TOPA ka hi hi.

³"‘Note in ka thukipte zui-a kong thu piakte limtaka na man uh leh,

⁴a hunin guah kong puak dinga, leitang in gah gahin lo sunga singkungte a gah ding hi.

⁵Na buh cil hun uh lenggah lawh hun tawh kizomsuakin, lenggah lawh hun pen lo pawi hun tawh kizomsuak dinga, an na duh peuhpeuh ne-in na gam sunguah lungnuamtakin na ne ding uh hi.

⁶Gamsung kong kilemsak dinga kuamah in hong lauthawngsak loin na lum hithiat ding uh hi. Keimah in gamsung panin gamsa gilote ka nawhkhia dinga, na gamsung uh namsau in a nawkkha kei ding hi.

⁷Na galte uh na delh ding uh a, note mai-ah namsau ma-in a tuk ding uh hi.

⁸Note nga in za khat na delh ding uh a, za khat in tulsawm delhin na mai uah na galte uh namsau in a puk ding uh hi.

⁹"‘Note hong angvanin kong cing dinga, hong ciphasakin kong khangsak dinga note tawh ka thukhun ka kiplet ding hi.

¹⁰Anthak kep nadingin anlui na kepkhiat dongun kumlui an na ne ding uh hi.

¹¹Note lakah ka omna mun b[66] ka koih dinga note kong kih kei ding hi.

¹²Note lakah vakin na Pasian uh ka hi dinga, note ka mi na hi ding uh hi.

¹³Keimah TOPA note Pasian, Egypt-te sila a suak nawn lo dingin Egypt pana hong paikhiatpihpa ka hi hi; na hakkolte uh ka kuaitan-a, ngawng tangsa in kong pai theisak hi.

¹⁴"‘Note in ka thu mang loin hih ka thupiakte khempeuh na puaseh uh a,

¹⁵ka thukipte niala, ka thukhamte kihin, ka thupiakte na puaseh uh a, tua ciangin ka thukhunte na palsat uh leh

¹⁶note tungah hihte ka tungsak ding hi: Note tungah patauhna, hong vattum ding cinatnate le na khuamuhna uh siasakin na nuntakna uh a khitkang ding cisa natna kong tungsak ding hi. Lo na pawi uh hangin a mawkna hi ding hi, bang hang hiam cih leh na galte un a ne ding uh hi.

¹⁷Na galte un hong zawh nadingun kong maigumsan ding hi; no hong mudahte in hong uk ding uh a, kuama delh lohpi-in na taikek ding uh hi.

¹⁸"‘Hihte khempeuh nungin ka thu nong man kei lailai uh leh na mawhna uh hangin sagih vei dan kong tuaksak beh lai ding hi.

¹⁹Na lungkhauh kisak theihna uh ka sumang dinga, na tungua van sik tawh kibangin na nuai-ua lei sumsan ka bangsak ding hi.

²⁰Na hatna uh a mawkna-in kizang ding hi, bang hang hiam cih leh na leitang hoihte un gah gah loin gam sunga singte a gah kei ding hi.

²¹"‘Kei nong langbawl lailai uh a, ka thu nong man nop kei uh leh na mawhnate uh tawh kituakin na thuaknate uh a zah sagih valin ka sahsak ding hi.

²²Gamsa gilote kong dosak dinga na tate uh hong tuahsakin na ganhonte uh ne ding uh a, note tawm mahmah in na lampite uh gamkhing a suak ding hi.

²³"’Hih bang teng hi napi kong thuhilhna na man nop kei uh a nong langbawl lailai uh leh

²⁴kei mahmah in note kong langbawl dinga, na mawhnate uh hangin a zah sagih valin kong thuaksak ding hi.

²⁵Thukhunte na palsatna uh pulakna-in note tungah namsau kong tungsak ding hi. Note khuapi sungah na nung kik uh ciangin note lakah pulpi kong tungsak dinga, na galte uh khut sungah hong kipia ding hi.

²⁶Anlum hong puakte ka khaktan ciangin numei sawm in thuk khatah anlum em thei ding uh a, teh tektekin a hawm ciipciip ding uh hi. Na ne ding uh a ahi hangin na kham zo kei ding uh hi.

²⁷"’Hih bang teng hi napi ka thu hong mang lo lai-in kei nong langneih lailai uh leh

²⁸tua ciangin ka heh dinga note hong langneihin kei mahmah in note na mawhna uh hangin a zah sagih vei val dan kong tuaksak ding hi.

²⁹Note in na tanute na tapate uh sa na ne ding uh hi.

³⁰Na munsangte uh ka susia dinga, na gimnamtui biakna-taute uh phuk-in, nuntakna a nei lo na milimte uh tungah na luangte uh ka vumsak dinga note kong kih ding hi.

³¹Na khuapite uh ka susiamang dinga, na munsiangthote uh a mawkna suaksakin, na biaknate uah lungkimna ka nei kei ding hi.

³²Na leitang uh a mawkna ka suaksak dinga tua lai-a tung na galte nangawn uh a mulkim ding uh hi.

³³Minamte lakah note kong thehthang dinga, ka namsau dokin note kong delh ding hi. Na gam uh kimawk nusiat dinga na khuapi uh a kisia dikdek ding hi.

³⁴Tua ciangin na gam uh a kinusiat hun sungteng le na galte uh gam sunga na om hun sungteng uh sabbath kumin tang dinga, nuam a sa ding hi. Tua ciangin leitang tawlnga-in sabbath nuam a sa ding hi.

³⁵Gam in ama tunga na ten lai-ua na ngahsak loh uh tawlngakna sabbath hunte khempeuh gamkhinga a om sungin a ngah ahi hi.

³⁶"’Note lak pana kinusiakhate ahileh amaute galte leitang ah a lungsim uh ka lauthawngsak mahmah dinga, nahteh huih muta gingin a maute a taisak ding hi. Amaute kuama delh lohpi-in namsau kihta a tai bangin tai ding uh a, a puk ding uh hi.

³⁷Amaute kuamah in delh lo napi namsau kihta a tai bangin khat le khat a kiphupai ding uh hi. Tua bangin na galte uh mai-ah na nang thei kei ding uh hi.

³⁸Minamte lakah na mangthang ding uh hi; na galte uh leitang in no hong nawmvalh ding hi.

³⁹Note sung pan galte leitanga omlaite amau mawhna hangin beimang ding uh hi; amau pate mawhna hangin zong amaute beimang ding uh hi.

⁴⁰"‘Ahi hangin amaute in amau mawhna le a pate uh mawhnate a pulak uh leh - amaute, kei langah a zuautatnate uh, kei langa hong langneihnate uh -

⁴¹amaute a galte uh leitanga ka puak theih nadinga amaute hong langneihsaknate - tua ciangin vun at loh amaute lungsim panin kiniamkhiat-a, a mawhna man uh a piak uh ciangin

⁴²Jacob tawh ka thukhun, Isaac tawh ka thukhun, Abraham tawh ka thukhun, ka phawk gige dinga a leitang zong ka phawk gige ding hi.

⁴³Ahang in, amaute in a gam uh nusia ding uh a, amaute teng loin gamkhinga a om sungin a gam in sabbath-te a tang ahi hi. Amaute in a mawhna man uh a pia ding uh hi, bang hang hiam cih leh amaute in ka thukhamte nial uh a ka thukipte a kih zo uh hi.

⁴⁴Tua hi napi in amaute in a galte uh leitanga a om sung nangawnun amaute susiamang ding zahin amaute nial lo kih loin amaute tawh ka thukhun ka pelh kei hi. Keimah TOPA amaute Pasian ka hi hi.

⁴⁵Ahi hangin amaute Pasian ahi dingin, minamte muhin Egypt pan ka paikhiatpih-a, a pu a pate uh tawh ka thukhun ka phawk gige hi. Keimah TOPA ka hi hi,’ ci in," a ci hi.

⁴⁶Hihte pen TOPA in Moses tawna amah le Israel-te kikala a kipsak thukipte, thukhamte le zuih ding ngeinate ahi hi.