Read Zokam Siampi Laibu 27 Bible Online

Siampi Laibu 27 - Zokam bible

Siampi Laibu 27

¹TOPA in Moses tungah,

²"Israel-te hopih inla amaute tungah: ‘Mi khatpeuh in TOPA tungah a ki-apsa a kituak zah piak dinga a tuam mahmah in kiciamna a bawla,

³tua mipa kum sawmnih le kum sawmguk kikal a upa ahileh mun siangtho shekel a[67] tawh kizui-in nguntang shekel b[68] sawmnga a pia ding hi;

⁴tua ciangin numei ahileh a man dingin shekel c[69] sawmthumin seh in.

⁵Tua mi kum nga le kum sawmnih kikal ahileh pasal aitang dingin shekel a[70] sawmnih seh inla numei aitang dingin shekel b[71] sawm seh in.

⁶A mi kha khat le kum nga kikal a upa ahileh pasal aitang dingin ngun shekel c[72] nga le numei ahileh ngun shekel d[73] thum seh in.

⁷Tua mi kum sawmguk pan a tungsiah ahileh pasal aitang dingin shekel e[74] sawm le nga seh inla numei aitang dingin shekel sawm seh in.

⁸A kiciam mipa a kiseh zah pia zo lo dingin a zawn luat leh siampipa kiangah tua mipa kipaipih dinga amah in a piak zawh dinga a kiciamna zah tawh kizui-in a piak zah ding a ciangtansak ding hi.

⁹"‘Ama kiciamna ganhing khat ahileh tua pen TOPA tunga biakna dingin kisang thei a, tua bangin TOPA tunga kipia ganhing a siangtho a suak hi.

¹⁰Amah in a ganhing laih ahikeh a hoih lo tangin a hoih, ahikeh a hoih tangin a hoih loin a khek peuhmah kei ding hi; amah in ganhing khat tangin adang khat piak teitei a kul leh a tanga a piak pen tawh a nihin a siangtho a suak ding hi.

¹¹Piak dinga a ciam pen a sianglo ganhing - TOPA tungah biakna-a a kisang thei lote ahileh - siampipa tungah a ganhing kipia dinga,

¹²amah in a hoihna le a hoih lohna tawh kizui-in a seh ding hi. Siampipa in aman a seh zah peuhpeuh aman hipah ding hi.

¹³A neipa in a gan a tat nop leh aman zah tungah aman zah sehnga suah sehkhat behlap ding hi.

¹⁴"‘Mi khat in TOPA tungah a siangtho na-in a inn a ap leh siampipa in a hoihna ahikeh a siatna - a ginatna khen ding hi. Tua ciangin siampipa sehna bangbang a kizang hi pah ding hi.

¹⁵Mi khat in a apsa a inn a tat kik nop leh amah in a inn man zah sehnga suah sehkhat piakbeh dinga, tua inn ama aa suak kik ding hi.

¹⁶"Mi khat in a innkuan leitang uh TOPA tungah a ap nop leh a sunga an piangzah tuatin aman kiseh ding hi - mangbuh-ham ci homer f[75] khat in ngun shekel sawmnga man hi.

¹⁷Amah in Jubilee Kum hun laitakin a lo a ap leh a ma-a kisehsa mah kimangpah ding hi.

¹⁸Ahi hangin Jubilee khitin a lo a ap leh, siampipa in Jubilee kum kik tawh kikal a kum phazah tuatin aman seh dinga, aman-a a seh zah kikhiam ding hi.

¹⁹Lo ap mipa in a tat kik nop leh aman zah sehnga suah sehkhat behlap pelmawh dinga, a lo ama aa suak kik ding hi.

²⁰Bangbang ahi zongin a lo a tan kik lo ahikeh mi khatpeuh tungah a zuak khit leh a kitan kik thei nawn kei ding hi.

²¹Tua logam Jubilee sunga a kipiakkhiat ciangin TOPA tunga ki-apsa lo mah bangin a siangtho a suak hi; tua pen siampite g[76] aa hi ding hi.

²²"‘Mi khat in amau innkuan leitang ahi lo a leisa lo khat TOPA tungah a ap kik leh,

²³siampipa in Jubilee Kum dong aman tuat dinga tua mipa in tua ni mah in a kiseh a man zah TOPA tungah a siangtho-in a pia tektek ding hi.

²⁴Jubilee Kum sungin a lo pen a leina lo nei mipa tungah kitungsak kik ding hi.

²⁵Na man peuhmah mun siangtho shekel tawh kizui-in kiseh ding hi; gerah sawmnih shekel khat ahi hi.

²⁶"’Bangbang ahi zongin tacil peuhmah TOPA aa ahi khit nungsangin ganhing tacil peuhmah tua bangin a ki-ap thei kei ding hi; bawngtal h[77] ahi a tuu ahi zongin TOPA aa ahi hi.

²⁷A sianglo ganhing khat ahileh aman kiseh zah ah aman zah sehnga suah sehkhat behlapin lei kik thei ding hi. A tat kik kei leh aman kiseh zahin kizuak ding hi.

²⁸"‘Ahi hangin mi khatin bangmah a neih kei a, TOPA tungah a kipumpiak i[78] leh mihing ahikeh ganhing ahikeh innkuan leitang - kizuak ahikeh kitan thei ding hi; tua banga kipumpiak na peuhmah TOPA adingin a siangtho pen ahi hi.

²⁹"‘Mihing tua banga suksiat mang j[79] dinga kipum-apsa pen kitan thei lo dinga; pel loin kithat ding hi.

³⁰"‘Leitanga piang na khempeuh sawma khat - leitang pana piang gah ahikeh singkung pana gahte TOPA aa ahi hi; TOPA adingin siangtho hi.

³¹Mi khat in ama neihsa sawma khat a tat leh aman zah sehnga suah sehkhat piak beh ding hi.

³²Bawng hon le tuuhon pana sawma khat buppi - gancingpa ciangkhut nuai-ah paisakin, a sawm cinna pen peuhmah - TOPA adingin a siangtho hi ding hi.

³³Amah in a hoih lo lak pana a hoih tengkhia ahikeh a khek kei ding hi. A khek zenzen leh a ganhing le a khekna a nihin a siangtho suak dinga, a kitan thei kei ding hi,’ ci in," a ci hi.

³⁴Hihte in Israel-te adinga Sinai Vum tungah TOPA in Moses tunga a thupiakte ahi hi.