Read Zokam Siampi Laibu 3 Bible Online

Siampi Laibu 3 - Zokam bible

Siampi Laibu 3

¹"‘Mi khatpeuh biakna in kilawmtakna-a a[4] biakna-in bawnghon lak pan gan khat a piak leh anu ahi a, apa ahi zongin TOPA mai-ah sitbaang lo gan khat a pia ding hi.

²A biakna ganhing lutungah a khut nga dinga Kikhopna Puanbuk lutna ah tua gan a go ding hi. Tua ciangin Aaron tapa siampite in biakna-tau pang khempeuh ah sisan a theh ding uh hi.

³Amah in kilawmtakna biakna panin TOPA tungah meihal biakna-a a tawi dingte: a sungkua tuam a thau khempeuh, ahikeh tuate tawh a kizom,

⁴a kalte gel tuate a tuam a kawngbom kianga om a thaute le a kalte tawh a lakkhiat khawm ding a sin tuam athaute khempeuh ahi hi.

⁵Tua ciangin Aaron tapate in mei tunga om sing kuanglai tung, meihal biakna tungah mei-a hal biakna ahi TOPA a lungkimsak gimnamtui-a biakna-in a pia ding uh hi.

⁶"‘Amah in TOPA tungah kilawmtakna biakna-in tuuhonte panin a piak leh anu ahi a, apa ahi zongin a sitbaang lo pia ding hi.

⁷Amah in tuuno a piak leh TOPA mai-ah pia ding hi.

⁸Amah in a piak pen lutungah a khut nga dinga Kikhopna Puanbuk mai-ah go ding hi. Tua ciangin Aaron tapate in a sisan biakna tau pang khempeuh a theh ding uh hi.

⁹Amah in kilawmtakna biakna panin TOPA tungah meihal-a biakpiakna a tawi dingte: a thau, a cingguh bula atkhiat a meithau khempeuh, a sungkua tuam a thau khempeuh, ahikeh tuate tawh kizom,

¹⁰a kawngbom kianga a kalte gel tuate a tuam athau le a kalte tawh a lakkhiat khawm ding a sin tuam tawh ahi hi.

¹¹Siampipa in tuate TOPA tungah mei-a hal an-a biakna-in biaknatau tungah a hal ding hi.

¹²"‘Ama biakna keel khat ahileh amah in TOPA mai-ah pia ding hi.

¹³Amah in tua gan lutungah a khut nga dinga, Kikhopna Puanbuk mai-ah go ding hi. Tua ciangin Aaron tapate in biakna-tau pang khempeuh a sisan theh ding uh hi.

¹⁴Biakna-a kipiate panin amah in TOPA tungah mei-a hal biakna-a a piak dingte: a sungkuate a tuam athau khempeuh ahikeh tuate tawh kizom,

¹⁵a kawngbom kianga a kalte gel tuate tunga athau tawh le a kalte tawh a lakkhiat khawm ding a sin tuam tawh ahi hi.

¹⁶Siampipa in TOPA tungah tuate mei-a hal an-a biakna lungkimsakna gimnamtui-in a hal ding hi. A thau khempeuh TOPA aa ahi hi.

¹⁷"‘Hih in note tenna peuhpeuhah khang sawnsawnte dongin a kiptawntung thuzek hi ding hi: Note in athau ahikeh a sisan na ne peuhmah kei ding uh hi,’ ci in," a ci hi.