Read Zokam Siampi Laibu 4 Bible Online

Siampi Laibu 4 - Zokam bible

Siampi Laibu 4

¹TOPA in Moses tungah,

²"Israel tungah: ‘Mi khatpeuh in sawmkhol lopi-in TOPA thupiakte lak pana kikham khatpeuh a khialh khak leh -

³"‘Sathau nilhsa siampipa a mawh a, mipite tungah mawhna a tut leh amah in ama hihsa mawhna hanga biakna dingin a sitbaang lo bawngtalno khat TOPA tungah a puak pelmawh ding hi.

⁴Amah in Kikhopna Puanbuk lutna TOPA mai-ah tua bawngtal a pia ding hi. Amah in tua gan lutungah a khut nga dinga TOPA mai-ah a go ding hi.

⁵Tua ciangin sathau kinilhsa siampipa in bawngtal sisan pawlkhat la-in Kikhopna Puanbuk sungah a lutpih ding hi.

⁶Amah in sisan lakah a khutme diah dinga, mun siangtho puanzak mai, TOPA mai-ah tuate pawlkhat sagih vei a theh ding hi.

⁷Tua ciangin siampipa in Kikhopna Puanbuk sunga TOPA mai-a om gimnamtui halna biakna-tau kite tungah tua sisan pawlkhat a nuh ding hi. Tua a om lai bawngtal sisan teng Kikhopna Puanbuk lutna-a meihal biakna-tau bulah a sungkhia ding hi.

⁸Amah in mawhna hanga biakna bawngtal panin athau khempeuh hawikhia-in - a sungkuate a tuam athau ahi zongin tuate tawh a kizom,

⁹a kawngbom kianga a kalte gel, tuate tunga athau tawh le a kalte tawh a lakkhiat khawm ding a sin tuam tawh -

¹⁰kilawmtakna biakna-a b[5] a kipia bawngpi c[6]-a, athau kilakhia bang tektek hi ding hi. Tua ciangin siampipa in meihal biakna-tau tungah tuate a hal ding hi.

¹¹Ahi hangin bawngtal vun le a sate khempeuh a lu le a khete, a sungkua le a ekte tawh -

¹²tuate pen bawngtal sa a om lai teng giahphual pualam, a siangtho-a kisehsa mun khat vut buakna munah paipih dinga, vutte tungah sing tawh mei cihin a haltum ding hi.

¹³"‘Israel mihon buppi in sawm khol lopi-in TOPA thupiakte lakpan a kham khatpeuh semin a mawh uh leh mihonpi in tua thu a phawkkha kei uh zongin amaute a khial uh ahi hi.

¹⁴Amaute in a hihsa uh mawhna a phawk uh ciangin tua pawl buppi in Kikhopna Puanbuk mai-ah mawhna hanga biakna-in bawngtalno khat pia ding uh hi.

¹⁵Mihonte upate in TOPA mai-a bawngtal lutungah a khut uh nga ding uh a, TOPA mai-ah bawngtal kigo ding hi.

¹⁶Tua ciangin sathau kinilhsa siampipa in bawngtal sisan pawlkhat la-in Kikhopna Puanbuk sungah lutpih ding hi.

¹⁷Amah in a khutme sisan lakah diahin puanzak maisan-a TOPA mai-ah sagih vei a theh ding hi.

¹⁸Amah in Kikhopna Puanbuk sungah TOPA mai-a biakna-tau kite tungah sisan pawlkhat nuh ding hi. Amah in sisan a om lai teng Kikhopna Puanbuk lutna-a meihal biakna-tau bulah sungkhia ding hi.

¹⁹Amah in athau khempeuh hawikhia dinga biakna-tau tungah halin,

²⁰mawhna hanga biakna bawngtal ahih bang tektekin a hih ding hi. Hici bangin siampipa in amaute adingin thoihdamna bawl dinga amaute a kimaisak ding hi.

²¹Tua ciangin amah in giahphual pua-ah bawngtal lakhia dinga bawngtal masapen a hal bangin a hal ding hi. Hih in mihonpite ading mawhna hanga biakna ahi hi.

²²"‘Makai khat in TOPA ama Pasian thupiakte lakah a kikham khatpeuh sawmkhol lopi-in hih-a, a mawh ciangin a khial ahi hi.

²³Ama hihsa mawhna amah a kiphawksak ciangin amah in biakna-in a sitbaang lo keel apa khat paipih pelmawh ding hi.

²⁴Amah in keel lutang tungah a khut nga dinga, meihal biaknate kigawhna mun TOPA mai-ah tua a kigo ding hi. Tua in mawhna hanga biakna ahi hi.

²⁵Tua ciangin siampipa in mawhna hanga biakna gan sisan pawlkhat a khutme-in la dinga meihal biakna-tau kite nuhin sisan a om lai teng biakna-tau bulah a sungkhia ding hi.

²⁶Amah in kilawmtakna biakna thaute a hal bang tektekin athau khempeuh biakna-tau tungah hal ding hi. Hici bangin siampipa in mipa adingin thoihdamna bawlsak dinga, tua ciangin amah kimaisak ding hi.

²⁷"‘Mihonpi sunga pawlmi khat in, TOPA thupiakte in a kham khatpeuh sawmkhol lopi-in a hih khak leh amah a khial ahi hi.

²⁸Ama hihsa mawhna a kiphawksak ciangin a hihsa mawhna hanga biakna dingin a sitbaang lo keel nu khat a paipih pelmawh ding hi.

²⁹Amah in mawhna hanga biakna gan lutungah a khut nga dinga meihal biakna munah a go ding hi.

³⁰Tua ciangin siampipa in a khutme tawh a sisan pawlkhat la-in meihal biakna-tau kite nuh dinga, a om lai sisan teng biakna-tau bulah a sungkhia ding hi.

³¹Amah in kilawmtakna biakna-a athau a hawikhiat bang tektekin athau khempeuh hawikhia dinga siampipa in TOPA a lungkimsak gimnamtui ahi dingin biakna-tau tungah a hal ding hi. Hici bangin siampipa in ama adingin thoihdamna bawlsak dinga tua ciangin amah kimaisak ding hi.

³²"‘Amah in a mawhna hanga biakna-in tuuno khat a paipih leh a sitbaang lo anu khat a paipih ding hi.

³³Amah in tua gan lutungah a khut nga dinga meihal biakna kigawhna munah mawhna hanga biakna-in a go ding hi.

³⁴Tua ciangin siampipa in a khutme tawh tua mawhna hanga biakna gan sisan pawlkhat la dinga, meihal biakna-tau kite nuhin sisan a om lai teng biakna-tau bulah a sungkhia ding hi.

³⁵Amah in kilawmtakna biakna tuuno thau a hawikhiat bang tektekin athau khempeuh hawikhia dinga siampipa in TOPA mai a biakna-tau tunga mei-a hal biakna tung sawnah a hal ding hi. Hici bangin ama hihsa mawhna tang dingin siampipa in ama adingin thoihdamna bawlsak dinga, tua ciangin amah kimaisak ding hi.