Read Zokam Siampi Laibu 5 Bible Online

Siampi Laibu 5 - Zokam bible

Siampi Laibu 5

¹"‘Mi khat in a muhsa ahikeh a theihsa thu khat peuhpeuh ah teci pang dingin tangpi in a sawla, amah in a muhsa bangin a gen nop kei leh tua mawhna a khu ding hi.

²"‘Ahikeh mi khat in asiang lo-a kiseh na khat anin gamsa sisa luang ahikeh anin innsa ahikeh anin leitunga a bokvak ganhing - khatpeuh a lawnkhak leh amah in a theih khak loh hangin anin suaka, a khial ahi hi.

³"‘Ahikeh amah in amah a ninsak ding na khatpeuh - mihing nitnate a lawn leh amah in a theikha kei zongin a theih ciangin a khial ahi hi.

⁴"‘Ahikeh mi khat in ngaihsun khol loin na khatpeuh hih dingin a tomlawh khak leh asia-a apha zongin - ngaihsun khol lopi-a kiciamna thu ah - amah in a theikha kei zongin a phawk ciangin tua bang thu-ah akhial ahi hi.

⁵"‘Mi khatpeuh hici bangte khatpeuh a khialh leh a bawlsa mawhna kipulak pelmawh dinga

⁶ama hihsa mawhna dan dingin TOPA tungah mawhna hanga biakna-in ganhon panin tuuno a nu khat ahikeh keel a nu khat paipih ding hi; tua ciangin siampipa in ama adingin a mawhna hanga thoihdamna a bawlsak ding hi.

⁷"‘Amah in tuuno a neih zawh kei leh vakhu nih ahikeh kawl-vakhuno nih, a mawhna dan tangin TOPA tungah pia dinga - khat pen mawhna hanga biakna hi-in, a khat pen meihal biakna ding ahi hi.

⁸Amah in a masapen mawhna hanga biakna-in a piaksak ding siampipa kiangah a puak ding hi. Amah in alu angawng ah hektan dinga bottat loin

⁹mawhna hanga biakna gan sisan pawlkhat, baikna-tau pangte thehin, sisan a omlaite biakna-tau bulah a kitakkhiasak pelmawh ding hi. Tua in mawhna hanga biakna ahi hi.

¹⁰Tua ciangin siampipa in ngeina omsa-a hihzia zui-in meihal biakna bangin pia dinga, ama hihsa mawhna tangin ama adingin thoihdamna bawlsak dinga tua ciangin amah kimaisak ding hi.

¹¹"‘Ahi zongin amah in vakhu nih ahikeh kawl-vakhuno nih a neih zawh kei lai leh ama mawhna hanga biakna dingin annel limci ephah a[7] khat sehsawm suah sehkhat mawhna hanga biakna dingin a paipih ding hi. Amah in sathau ahikeh gimnamtui a sawh kei ding hi, bang hang hiam cih leh tua in mawhna hanga biakna ahi hi.

¹²Amah in siampipa kiangah paipih dinga siampipa in phawk nadingin khut dim khat pham dinga, biakna-tau tunga TOPA mai-ah mei-a hal biakna tung sawnah a hal ding hi. Tua in mawhna hanga biakna ahi hi.

¹³Hici bangin siampipa in ama hihsa mawhna khatpeuhte tang dingin thoihdamna bawlsak dinga, tua ciangin amah kimaisak ding hi. An-a biakna-a mah bangin biakna-a kipia a omlai teng siampipa aa ahi hi,’ ci in," a ci hi.

¹⁴TOPA in Moses tungah:

¹⁵"TOPA na asiangtho khatpeuh tawh kisai-in mi khat in sawmkhol lopi-in ngongtatin mawhna a hih khak ciangin amah dan piakna-in tuuhon panin tuutal khat, mun siangtho shekel a[8] tawh kizui-in nguntanga a man kiseh a sitbang lo khat TOPA kiangah a paipih ding hi. Tua pen khialhna hanga biakna ahi hi.

¹⁶Amah in a siangtho nate tawh kisai a hih khialhte ditkikna bawl pelmawh dinga a kiseh zah sehnga suah sehkhat gawm behin siampipa tungah a vekin pia khin dinga amah in khialhna hanga biakna bangin tuutal-in thoihdamna bawlsak dinga tua ciangin amah kimaisak ding hi.

¹⁷"Mi khat in, TOPA thupiakte lak panin a kham khat peuh semin a mawh leh amah in a thei kha kei zongin akhial hi a, amah in tua mawhna a khu hi.

¹⁸Amah in tuuhon panin aman dinga kiseh zah aman, a sitbaang lo tuutal khat khialhna hanga biakna-in siampipa tungah a paipih ding hi. Hici bangin sawmkhol lo-a, a hih khaksa khialhna tangin siampipa in ama adingin thoihdamna bawlsak dinga, tua ciangin amah kimaisak ding hi.

¹⁹Tua in khialhna hanga biakna hi a, TOPA tungah khialhna-sate b[9] hang ahi hi," a ci hi.