Read Zokam Siampi Laibu 6 Bible Online

Siampi Laibu 6 - Zokam bible

Siampi Laibu 6

¹TOPA in Moses tungah:

²"Mi khatpeuh in, a vengpa in muanga na a kepsakna ah a khemna ahikeh kepsak lo ahikeh a kigu ahikeh amah a khem suahna tawh TOPA tungah a muanhuai lo a suah leh

³ahikeh amah in na kimansuah khat mu in zuau gena, ahikeh amaan lopi-in a tomlawh leh, ahikeh tua bang mihing bawl theih mawhna a bawl leh -

⁴tua in khiala a mawh a suahsak leh amah in a guksa pen ahikeh khema a laksak ahikeh ama kepsa van ahi zongin van kimangsak a muh,

⁵ahikeh zuauthu tawh a tomlawhna khatpeuh a pia kik pelmawh ding hi. A kimin din kik dinga aman zah sehnga suah sehkhat behlapin mawhna hanga biakna a piak ni-in a neipa tungah a vekpi in a pia khin ding hi.

⁶Amah in a dantuahna-in siampipa tungah tua pen TOPA tungah ama khialhna hanga biakna dingin tuuhon lak pan aman ding a kisehsa tawh kituak a sit baang lo tuutal khat a paipih ding hi.

⁷Hici bangin siampipa in TOPA mai-ah ama adingin thoihdamna bawlsak dinga, tua ciangin hih bang nate sema, a mawh a suahna tawh kisai-in ama mawhna kimaisak ding hi," a ci hi.

⁸TOPA in Moses tungah:

⁹"Aaron le a tapate hih thupiak pia in: Meihal biakna ngeinate hihte ahi hi: ‘Meihal biakna, zan khuavakin zingsang dong biakna-tau-a tap tungah om den dinga, biakna-tau laizangah pel loin mei kuangden ding hi.

¹⁰Tua ciangin siampipa in saihadial puan silh dinga, a pumpi tungah saihadial puan sungsilhin, biakna-tau tunga meihal biakna meivute luakkhia-in, tuate biakna-tau pangah a koih ding hi.

¹¹Tua ciangin a puansilhte suahkhia-in adangte silh dinga, giahphual pua-a a siangtho-a kiseh mun khatah vutte a buakhia ding hi.

¹²Biakna-tau tungah pel loin mei kuang den dinga; a mit ngei peuhmah kei ding hi. Zingsang simin siampipa in sing cihbeh dinga, mei tungah meihal biaknate gualin tua tungah kilawmtakna biakna c[10] thaute a hal ding hi.

¹³Biakna-tau tungah pel loin mei kuang den dinga, a mit ngei peuhmah kei ding hi.

¹⁴"‘Hihte an-a biakna ngeinate ahi hi: Aaron tapate in biakna-tau mai-a TOPA mai-ah tuate a paipih ding uh hi.

¹⁵Siampipa in annel limci le sathau khut dim khat an-a biakna gimnamtui khempeuh le phawkna khenkhiat gawmin TOPA a lungkimsak gimnamtui ahi dingin biakna-tau tungah a hal ding hi.

¹⁶A omlai teng Aaron le a tapate in ne ding uh a, ahi hangin tuate silngo sawh lohin siangtho munah a ne ding uh hi; amaute in tuate Kikhopna Puanbuk huang sungah a ne ding uh hi.

¹⁷Silngo tawh a ki-em peuhmah kei ding hi; kei hong kipia mei-a hal biakna panin a tanh dingun ka piaksa ahi hi. Mawhna hanga biakna le khialna hanga biaknate mah bangin a siangtho pen ahi hi.

¹⁸Aaron suan pasal khempeuh in ne thei ding uh hi. Tua in khang sawnsawnte adingin TOPA tungah mei-a hal biaknate panin ama tanh ding ngeina ahi hi. Tua tawh a kisukha na khatpeuh a siangtho d[11] suak ding hi,’ ci in," a ci hi.

¹⁹TOPA in Moses tungah,

²⁰"Hih in Aaron le a tapate in amah e[12] sathau a kinilh ni-a TOPA tunga a paipih ding uh biakna ahi hi: a hunhuna kipuak an-a biakna annel limci panin ephah f[13] khat sehsawm suah sehkhat, zingsangin alang, nitakin alang a pia ding hi.

²¹Hoihtakin mekman inla belpei-in hoihtakin sathau tawh kang in, balnenin g[14]TOPA a lungkimsak an-a biakna gimnamtui dingin paipih in.

²²Ama za a luah sathau kinilh a tapa in a hih ding hi. Tua pen TOPA in a hunhun-a a tanh den hi-a, a kihaltum kiuhkeuh ding hi.

²³Siampi khat in an-a biakna-a a piak peuhmah a kihaltum kiuhkeuh ding hi; a kine peuhmah kei ding hi," zong a ci lai hi.

²⁴TOPA in Moses tungah,

²⁵"Aaron le a tapate tungah: ‘Hihte in mawhna hanga biakna ngeinate ahi hi: mawhna hanga biakna in meihal biakna kigawhna mun TOPA mai-ah kigo ding hi; tua in a siangtho pen ahi hi.

²⁶Biakna-a a pia tua siampipa in tua a ne ding hi; tua pen Kikhopna Puanbuk huang sung siangtho munah a kine ding hi.

²⁷Tua sa tawh a kisukha na peuhmah a siangtho suak dinga, sisan in a puantualpi a theh khak leh siangtho munah a sawp ding hi.

²⁸Sa kihuanna leibel a kisukham pelmawh ding hi; ahi hangin taubelin a kihuan leh a beel kiatsiangin tui-in a kisawp siang sinsen ding hi.

²⁹Siampi innkuan sunga pasal peuhmah in a ne thei ding hi; tua in a siangtho pen ahi hi.

³⁰Ahi hangin Mun Siangtho ah thoihdamna bawl nadinga Kikhopna Puanbuk-a kipuak sisan kilakna mawhna hanga biakna sa a kine peuhmah kei ding hi; kihaltum pelmawh ding hi.