Read Zokam Siampi Laibu 7 Bible Online

Siampi Laibu 7 - Zokam bible

Siampi Laibu 7

¹"‘Hihte in a siangtho pen khialhna hanga biakna ngeinate ahi hi.

²Khialhna hanga biakna pen meihal biakna gawhna munah kigo dinga, a sisanin biakna-tau pang khempeuh kitheh ding hi.

³Biakna-a kipia ding athaute: a mei thau le a sungkuate a tuam athau,

⁴a kawngbom kianga a kalte gel a kimkota athau tawh, le a kalte tawh lakkhiat khawm a sin tuam tawh ahi hi.

⁵Siampipa in TOPA tungah mei-a hal biakna khat dingin tuate a hal ding hi. Tua in khialhna hanga biakna ahi hi.

⁶Siampi innkuana pasal khempeuh in ne thei ding uh hi; ahi hangin siangtho munah a kine pelmawh ding hi; tua in a siangtho pen ahi hi.

⁷"‘Mawhna hanga biakna le khialhna hanga biakna-ah ngeina a kibangin kizang hi: tuate amaute adingin thoihdamna bawlsak siampite aa ahi hi.

⁸Mi khatpeuh adingin meihal biakna a piaksak siampipa in a vun tang thei hi.

⁹An-a biakna thuk sunga ki-em ahileh sikbel ahikeh beelpei tunga kihuan peuhmah biakna-a a pia siampite aa hi a,

¹⁰an-a biakna peuhmah, sathau tawh a kihel-a, akeu guak ahi zongin Aaron tapate khempeuh in a kikima a tanh uh ahi hi.

¹¹"‘Hihte in, mi khat in TOPA tungah kilawmtakna biakna-a a[15] a piak theih ngeinate ahi hi:

¹²"‘Amah in lungdamkohna-a a piak ahileh, tua lungdamkohna-a biakna tawh, silngo sawhloh sathau tawh a kimek anpheng, silngo sawh loh sathau-a kizut mohnip le sathau tawh limtaka kimek khawm annel mohpheng-te a pia khawm ding hi.

¹³Amah in lungdamkohna, kilawm- takna biakna tawh silngo sawh loh anlum tawh biakna piakhawm ding hi.

¹⁴TOPA tunga piak dingin biakna a namkimin khat tek a paipih ding hi; tua pen kilawmtakna biakna-a sisan a pia siampipa aa ahi hi.

¹⁵Ama lungdamkohna kilawmtakna biakna sa pen a kipiak ni-in kigai khin ding hi; amah in zingsang dong bangmah a sit kei ding hi.

¹⁶"‘Ahi ta zongin a biakna pen kiciamna khat ahikeh utthu-a biakna ahileh tua a biakpiakna pen a piak ni-in kigai khin dinga, ahi zongin a kikhamval leh a zing ciangin kine thei lai ding hi.

¹⁷A ni thumni dong a val lai biakpiakna sa peuhmah kihaltum ding hi.

¹⁸A ni thum ni-in kilawmtakna biakna sa khatpeuh a kinek leh tua pen kisang lo ding hi. Biakna-a a piapa adingin bangmah in a kisim kei ding hi; ahang in, tua pen anin ahi hi; tua sa a nepa siakhu ding hi.

¹⁹"‘A nin-a kisehsa na khatpeuh tawh a kisawhkha sa a kine peuhmah kei ding hi; pel loin kihaltum ding hi. Sa dang ahileh a sianga kiseh mi peuhmah in ne thei ding hi.

²⁰Ahi hangin a sianglo mi khatpeuh in kilawmtakna biakna-a TOPA a kipia sa khatpeuh a nek leh tua mipa a mipihte panin kikhenkhia pelmawh ding hi.

²¹Mi khatpeuh in a siang lo na khat a lawnkhak leh - mihing siantho-lohna ahikeh ganhing siantho-lohna khat ahikeh a siang lo a kihhuai na khatpeuh - tua khit ciangin kilawmtakna biakna-a TOPA a kipiasa a nek leh tua mipa a mipihte panin kikhenkhia pelmawh ding hi,’ ci in," a ci hi.

²²TOPA in Moses tungah,

²³"Israel-te tungah: Bawngte, tuute ahikeh keelte thau ne kei un.

²⁴Ganhing a sisa-a kimute ahikeh gamsa nek ganhing thaute, nadanga zat dingin kizang thei dinga ahi hangin na ne peuhmah kei ding uh hi.

²⁵TOPA tungah meihal biakna-a kizang thei ding b[16] ganhing thau a ne peuhmah a mipihte panin a kikhenkhia pelmawh ding hi.

²⁶Na tenna peuhpeuhuah gamsa ahikeh vasa khatpeuh sisan na ne peuhmah kei ding uh hi.

²⁷Sisan a ne mi khatpeuh a om leh a mipihte panin kikhenkhia pelmawh ding hi,’ ci-in gen in," a ci hi.

²⁸TOPA in Moses tungah,

²⁹"Israel-te tungah: TOPA tungah kilawmtak-na biakna hong paipih mi khatpeuh in tua laka pawlkhat TOPA tunga biakpiakna-in hong tawi uh hen.

³⁰Ama khut tektekin TOPA tungah mei-a hal biakna a tawi ding hi; amah in athau a iik tawh tawikhawm dinga, TOPA mai-ah vei-a biakna-in a iik a vei ding hi.

³¹Siampipa in biakna-tau tungah a thau hal ding hi, ahi hangin a iik pen Aaron le a tapate tanh ahi hi.

³²Kilawmtakna biakna a taklam phei siampipa tanh dingin na pia ding hi.

³³Kilawmtakna biakna-a sisan le athaute a pia Aaron tapa in a ma tanh dingin a taklam phei tang ding hi.

³⁴Israel kilawmtakna biakna panin a kiveisa a iik le a kipiasa a phei ken ka la zo a, tuate siampi Aaron le a tapate in Israel tung pana a tanh den dingin ka pia khin zo hi,’ ci in," a ci hi.

³⁵Hih in, TOPA tungah siampi nasem dinga Aaron le a tapate a kipiak ni-ua, TOPA mai-a meihal biaknate pana kisehkhia amau tanh ding ahi hi.

³⁶Amaute sathau a kinilh ni-in, Israel in khang sawnsawn donga Israel-te tanh den dingin TOPA in amaute tungah a piak ahi hi.

³⁷Tua ahi ciangin haltumbiakna, an-a biakna, mawhna hanga biakna, khialhna hanga biakna, kipsakna biakna le kilawmtakna biakna ngeinate hihte hi a,

³⁸TOPA in Israel-te Sinai Sehnel-gam a TOPA mai-ah biakna hong puak uh hen, ci-a thu a piak ni mah a Sinai Vum tunga Moses tungah a piak ahi hi.