Read Zokam Siampi Laibu 8 Bible Online

Siampi Laibu 8 - Zokam bible

Siampi Laibu 8

¹TOPA in Moses tungah,

²"Aaron le a tapate, a puansilhte uh, nilh sathau, mawhna hanga biakna ding bawngtal, tuutal nih le silngo sawh loh anlum koihna lawh-te tawh hong paipih inla

³Kikhopna Puanbuk lutna ah mipite a vekpi-un kikhawmsak in," a ci hi.

⁴TOPA in amah a thupiak bangin Moses in hih a, Kikhopna Puanbuk lutna ah mipite a kikhawm uh hi.

⁵Moses in mipite tungah, "Hih in, TOPA in hih dinga hong thupiak ahi hi," a ci hi.

⁶Tua khit ciangin Moses in Aaron le a tapate a mai-ah paikhiatpiha tui-in a sil hi.

⁷Amah in puan tungsilh Aaron silhsaka, puan kawnggakin a gak hi; puantualpi silhsa in siampi puan a silh thuahsak hi. Amah in khutsiamtaka kigan kawnggakin a siampi puan zong a gak hi; tua ciangin ama tungah a kikhihkip hi.

⁸Amah in a tungah awmtuam bulha tua awmtuam ah Urim le Thummim a thuah hi.

⁹Tua khit ciangin TOPA in Moses a thu piaksa bangin Aaron lutungah dial khimsaka, a mailam ah kham pek, kumpi lukhu siangtho a bulh hi.

¹⁰Tua khit ciangin Moses in nilh sathau la-a, biakbuk le a sunga vante khempeuh nilhin tua ciangin a ap hi.

¹¹Biakna-tau tungah sathau pawlkhat sagih vei thehin biakna-tau le a um a beelte, kisilna kuangpi a tuna tawh a ap nadingin sathau a nilh hi.

¹²Amah in Aaron lutungah nilh sathau pawlkhat sunga a apna-in amah a nilh hi.

¹³Tua khit ciangin Aaron tapate a mai-ah paisaka TOPA in Moses a thupiak bangin amaute puantungsilh silhsakin puan kawnggakte-in gak-a, lugaknate a gaksak hi.

¹⁴Tua khit ciangin amah in mawhna hanga biakna dingin bawngtal pia a, Aaron le a tapate in tua lutungah a khut uh a nga uh hi.

¹⁵Moses in tua bawngtal go-in a sisan pawlkhat la-a, biakna-tau siansuahna-in a khutme tawh biakna-tau ki khempeuh a nuh hi. Sisan a omlai teng biakna-tau bulah a sungkhia hi. Tua bangin biakna-tau adingin thoihdamna bawlin a ap hi.

¹⁶Moses in a sungkua tuam athau khempeuh, a sin tuam le a kalte gel le tuate thau zong la-a, biakna-tau tungah a hal hi.

¹⁷Ahi hangin TOPA in Moses a thupiak bangin tua bawngtal avun, asa le a ek-te tawh giahphual pualamah a haltum hi.

¹⁸Tua khit ciangin amah in meihal biakna dingin tuutal pia-a, Aaron le a tapate in tua gan lutungah a khutte uh nga uh hi.

¹⁹tua ciangin Moses in tuutal go-in biakna-tau pang khempeuh sisan a theh hi

²⁰Amah in tuutal semnen-a a lu a sanente le athau a hal hi.

²¹TOPA in Moses a thupiak bangin amah in a sungkuate le a khete tui-in sawpa, tuutal buppi TOPA tungah lungkim-sakna gimnamtui mei-a hal biakna-in biakna-tau tungah meihal biakna-in a hal hi.

²²Tua khit ciangin amah in kipsakna tuutal dingin tuutal dang khat pia-a, Aaron le a tapate in tua gan lutungah a khutte uh nga uh hi.

²³Moses in tuutal go-a, a sisan pawlkhat la-in Aaron taklam bilhualte, a taklam khutpi, a taklam khepite a nuhsak hi.

²⁴Moses in Aaron tapate zong a mai-ah paisaka, amaute taklam bilhualte, a taklam khutpite uh le a taklam khepite uh sisan a nuhsak hi; tua khit ciangin biakna-tau pang khempeuh sisan a theh hi.

²⁵Amah in athaute, a mei thau, a sungkua tuam athau, a sin tuam, a kalte gel le athau le a taklam phei a la hi.

²⁶Tua ciangin TOPA mai-a om silngo sawh loh anlum lawh panin anlum pheng, sathau tawh kibawl moh khat, le mohnip khat la a; a thaute pawl a taklam phei tungah hihte a koih hi.

²⁷Amah in hihte khempeuh Aaron le a tapate khutah koih a, vei-a biakna-in tuate TOPA mai-ah a vei hi.

²⁸Tua khit ciangin Moses in amaute khut panin tuate lakhia a, kipsakna-a biakna, lungkimsakna gimnamtui, TOPA tunga mei-a hal biakna-in biakna-tau tungah meihal biakna tung sawnah tuate a hal hi.

²⁹Amah in, TOPA in Moses a thupiak bangin kipsakna tuutal-a Moses tanh a iik zong la a, vei-a biakna-in TOPA mai-ah a vei hi.

³⁰Tua khit ciangin Moses in biakna-tau panin nilh sathau pawlkhat le sisan pawlkhat la a, tuate Aaron le a puansilh tung le a tapate le a puansilhte uh tungah a theh hi. Tuaci in Aaron le a puansilhte le a tapate le a puansilhte uh a ap hi.

³¹Tua khit ciangin Moses in Aaron le a tapate kiangah, "Keimah in, ‘Aaron le a tapate in tuate ne uh hen,’ ci-a thu kong piak a[17] bangin Kikhopna Puanbuk lutna ah tua sa huan unla, kipsakna biakna lawh sunga anlum tawh meh un.

³²Tua khit ciangin sa le anlum a omlai teng haltum un.

³³Note hong kikipsakna ni sagih sung bei ding ahi manin, note kipsakna a kimansiang matengin ni sagih sung Kikhopna Puanbuk lutna lawi kei un.

³⁴Tuni-a kihihte note adingin thoihdamna bawl nadinga TOPA thupiak ahi hi.

³⁵Note na sih loh nadingun Kikhopna Puanbuk lutna ah ni sagih sung sun tawh zan tawh pel loin om unla TOPA hong sawlte hih un; tua in keima hong thupiaksa ahi hi," a ci hi.

³⁶Tua ahi ciangiin TOPA in Moses tungtawna a thupiakna khempeuh Aaron le a tapate in a hih uh hi.