Read Zokam Siampi Laibu 9 Bible Online

Siampi Laibu 9 - Zokam bible

Siampi Laibu 9

¹A nigiatna ni-in Moses in Aaron le a tapate le Israel upate a sam hi.

²Amah in Aaron kiangah, "Na mawhna hanga biakna dingin bawngtalno khat le na meihal biakna dingin tuutal khat - a nihin a sitbaang lo la inla tuate TOPA mai ah pia in.

³Tua khit ciangin Israel-te tungah, ‘Mawhna hanga biakna dingin keel a pa khat, meihal biakna dingin a niha kum khat tuak a pha a sitbaang lo bawngno khat le tuuno khat

⁴le TOPA mai-ah an-a biakna tawh biakna a piakkhawm dingin kilawmtakna biakna a[18]-in bawngtal b[19] khat le tuutal khat la un. Ahang in, tuni-in note tungah TOPA hong kilak ding hi, ci in," a ci hi.

⁵Amaute in Kikhopna Puanbuk mai-ah Moses thupiak tua nate la uh a, a kiangah mipi buppi pai-in TOPA mai-ah a ding uh hi.

⁶Tua khit ciangin Moses in, "Hih in TOPA minthanna note tungah hong kilat theih nadingin na hih dingun TOPA hong thupiak ahi hi," a ci hi.

⁷Moses in Aaron kiangah, "Biakna-tau hong naih inla mawhna hanga na biakna le meihal biakna nangmah le mipite adingin biakpiakna bawl in; TOPA thupiaksa bangin mipite adingin biakna pia inla amau adingin thoihdamna bawlsak in," a ci hi.

⁸Tua ahi ciangin biakna-tau ah Aaron pai-a ama mawhna hanga biakna-in bawngno a go hi.

⁹A tate in ama kiangah sisan hong paipih uh a, sisan lakah a khutme diahin biakna-tau kite a nuh hi; sisan a om lai teng biakna-tau bulah a sungkhia hi.

¹⁰TOPA in Moses a thupiak bangin amah in mawhna hanga biakna pana athau, a kalte le a sin tuamte biakna-tau tungah a hal hi;

¹¹amah in a satak le a vun giahphual pua-ah a haltum hi.

¹²Tua khit ciangin meihal biakna a go hi. A tapate in amah sisan pia uh a, biakna-tau apang khempeuh a theh hi.

¹³Amaute in meihal biakna a lu tawh a bakbakin pia uh a, amah in tuate biakna-tau tungah a hal hi.

¹⁴Amah in a sungkuate le a khete sawpa, biakna-tau tunga meihal biakna tung sawnah a hal hi.

¹⁵Tua khit ciangin Aaron in mipite adingin biakna a paipih hi. Mipite mawhna hanga biakna keel la-a, a masa-a a hih bangin go a, mawhna hanga biakna-in a pia hi.

¹⁶Amah in meihal biakna paipih-a, a ngeina omsa bangin a pia hi.

¹⁷An-a biakna zong paipih-a, a khut khat dim pham in zingsang meihal biakna banah biakna-tau tungah a hal hi.

¹⁸Amah in mipite kilawmtakna biakna tangin bawngtal le tuutal a go hi. A tapate in amah sisan pia uh a, biakna-tau pang khempeuh a theh hi.

¹⁹Ahi hangin bawngtal le tuutal thau - a mei thau, a gilpi tuam, a kalte le a sin tuam -

²⁰hihte a iikte tungah koih uh a, tua ciangin Aaron in biakna-tau tungah athau a hal hi.

²¹Moses thupiak bangin Aaron in vei-a biakna-in TOPA mai-ah a iik le a taklam phei a vei hi.

²²Tua khit ciangin Aaron in mipite lamah a khut viikto-a, amaute thupha a pia hi. Amah in, mawhna hanga biakna, meihal biakna le kilawmtakna biaknate pia khina, a kumsuk hi.

²³Tua khit ciangin Kikhopna Puanbuk sungah Moses le Aaron a pai uh hi. Amaute a paikhiat uh ciangin mipite thupha pia uh a, mipite khempeuh tungah TOPA minthanna a kilak hi.

²⁴TOPA omna mun panin mei kuangkhia a, biakna-tau tungah meihal biakna le athau lomte a kangtum hi. Mipite khempeuh in a muh uh ciangin lungnuamin kiko uh a, leilam nga-in a bok uh hi.