Read Zokam Jeremiah 1 Bible Online

Jeremiah 1 - Zokam bible

Jeremiah 1

¹Benjamin gam Anathoth a siampite lakah khat ahi Hilkiah’ tapa Jeremiah thugente ahi hi.

²Judah kumpipa Amon’ tapa Josiah in a uk, a kum sawm le thumna kumin Jeremiah tungah TOPA thu tunga

³Judah kumpipa Josiah’ tapa Jehoiakim in a uk-a kipan Judah kumpipa Josiah’ tapa Zedekiah in a uk a kum sawm le khatna kum, a kha ngana, Jerusalem mite sal-a a paikhiat dong ama tungah thu a tung hi.

⁴TOPA thu kei tungah hong tunga,

⁵"Sul sunga kong bawl ma-in nang kong thei a[1] khin hi, na suah ma-in kong seh khin zo a; minamte tungah kamsang dingin kong teel khin zo hi," hong ci hi.

⁶"Ah, Thupipen TOPA, ka genzia ding ka thei kei hi; naupangno khat ka hi lel hi," ka ci hi.

⁷Ahi hangin TOPA in kei kiangah, "‘Naupangno khat ka hi lel hi,’ ci kei in. Kong sawlnate kiangah pai-in kong thupiak peuhpeuh na gen pelmawh ding hi.

⁸Amaute kihta kei in, nang kong ompih dinga kong hu ding hi," TOPA in cikhia hi.

⁹Tua ciangin TOPA in a khutin hong zamphei a, ka muk hong lawnsakin kei kiangah, "Tu-in ka thute na kamah ka koih khin hi.

¹⁰En in, minamte le kumpi-gamte tungah a botkhia ding le a phelkhia ding, a susia ding le a zogawp ding, a lam ding le a suan dingin tuni-in nang kong sawl hi," hong ci hi.

¹¹TOPA thu kei tungah hong tunga, "Jeremiah aw, bang na mu hiam?" hong ci hi. "Almond singhiang khat ka mu hi," ci-in ka dawng hi.

¹²TOPA in kei kiangah, "Ka kammal a tangtun ding a vil b[2] gige ka hi manin maantakin na mu hi," hong ci hi.

¹³TOPA thu kei tungah hong tung kik a: "Bang na mu hiam?" hong ci hi. "Leilu-lam pana hong awnsuk a solai beel khat ka mu hi," ci-in ka dawng hi.

¹⁴TOPA in kei kiangah, "Leilu-lam panin leitunga teng mi khempeuh tungah siatna kisungkhia suk ding hi.

¹⁵Leilu-lam kumpi-gama mite khempeuh ka sam ding hi," TOPA in cikhia hi. "Amaute kumpite hong pai ding uh a, Jerusalem lutna kongpite, khuapi umna kulhte le Judah gam khuapite ah a kumpi tokhom uh a phut ding uh hi.

¹⁶Ka mite tungah thukhenna ka genkhia ding hi. Bang hang hiam cih leh amaute giloin hong taisan uh a, pasian dangte tungah gimnamtui halin amau khut bawlsa a bia uh hi.

¹⁷"Nang kithawi in! Ding inla kong thupiak khempeuh amaute tungah va gen in. Amaute mai-ah lauthawng kei in, na lauthawng leh amaute mai-ah kong lauthawngsak ding hi.

¹⁸Tuni-in nang gambuppi - Judah kumpite, a uliante, a siampite le a gam mite langah a pang dingin kulha ki-um khuapi, sik khuampi le sumngo kulhpi kong suaksak khin hi.

¹⁹Nang hong sim ding uh a, nang hong ompihin hong hu ding ka hi manin amaute in hong zo kei ding uh hi," TOPA in cikhia hi.