Read Zokam Jeremiah 10 Bible Online

Jeremiah 10 - Zokam bible

Jeremiah 10

¹Israel innkuante aw, note tunga TOPA thugen za un.

²TOPA thugen hih ahi hi: "Minamte omzia sin kei unla, vana limte in minamte a lunghimawhsak hangin na lunghimawh kei un.

³Ahang in, mihingte ngeinate a kimanna om lo hi; tulakah sing khat phuk uh a, khutsiam khat in a sikkhu-in a zem hi.

⁴Amaute in ngun le khamin zem uh a; a kikhongkhia lo dingin siktukilhin sek tawh a khencip uh hi.

⁵Tangmai lei-a sing milim bangin, a milimte uh a pau thei kei hi; lam pai thei lo ahi manin puak kul hi. Tuate kihta kei un; amaute in kuamah liamsak thei lo a, a hoih khatpeuh zong a bawl thei kei uh hi," a ci hi.

⁶TOPA aw, nang na lian mahmah a, nang tawh a kibang khat beek om lo hi; na min vanglianin a thahat hi.

⁷Minamte’ Kumpipa aw, kua in hong kihta lo ding ahi hiam? Nang lah kihtak ding mah na hi hi. Minamte’ mipilte khempeuh lak le amau kumpi-gam khempeuh sungah nang tawh a kibang khat beek a om kei hi.

⁸Amaute, ngaihsutna nei lo mihai hi uh a; kimanna a nei lo singtawng milimte hilhsa ahi uh hi.

⁹Tarshish panin ngun seeksa le Uphaz panin kham seeksa a pua uh hi. Tua ciangin khutsiamte le kham seekte bawlsa - a vekin nasep siamte bawlsa hi a, amaute in adum le adupsan-in a zem uh hi.

¹⁰Ahi hangin amaan Pasian TOPA hi a; amah a nungta Pasian, a tawntunga Kumpipa ahi hi. Amah a heh ciangin leitung kilinga, ama thangpaihna minamte in a nang zo kei uh hi.

¹¹"Amaute kiangah, ‘Hih leitung le vantung a bawl lo pasiante, leitung le van kikhupsinte nuai panin a mangthang ding uh hi,’ ci-in gen in," b[21] a ci hi.

¹²Ahi hangin Pasian in ama vangliatna tawh leitung bawla; ama pilna tawh leitung buppi phutkhia-in, ama theihtelna tawh vante a zalhkhia hi.

¹³Kek a kiatsak ciangin vante a tuite a hawk hi; amah in leitung mongte panin meiite a kahtosak hi. Amah in khuaphia le guah puakkhawm a, a vankholna innte panin huih a pusuaksak hi.

¹⁴Mi khempeuh ngaihsutna nei lo le pilna nei lo hi a; kham seek peuhmah a milim seekte in a maizumsak hi. A milim sunte zuaupi hi a, huu a sang kei hi.

¹⁵Amaute kimanna nei lo ciamnuih bawlna lel hi a; amau thukhenna hun a tun ciangin a mangthang ding uh hi.

¹⁶Amah, Israel le ama luah ding a minamte kihelin, na khempeuh Bawlpa ahi manin Jacob’ Tanhtuampa hihte bang ahi kei hi - ama min Thahatpen TOPA ahi hi.

¹⁷Galte umcihna sunga tengte aw, hih gam nusia dingin na neihsate uh kaikhawm un.

¹⁸Ahang in, TOPA gen hih ahi hi: "Tu petpet-in hih gama tengte ka lawnkhia dinga; a kimat theih nadingin amaute tungah lungdonna ka tungsak ding hi," a ci hi.

¹⁹Ka liamna hangin gim si’ng ei! Ka liamna lah kidamsak thei lo a! Tua hi napi kei le kei in, "Hih in kei cinatna hi a, ka thuak pelmawh ding mah ahi hi," ka kici hi.

²⁰Ka puanbuk kisia ta a; a khau teng kitat khin hi. Ka tapate in hong taisan uh a, adang a om nawn kei hi; tu-in ka puanbuk lam ding ahihkeh ka bukna hong bawlsak ding om lo hi.

²¹Tuucingte in ngaihsutna nei lo uh a, TOPA dotzia ding a thei kei uh hi; tua ahi ciangin mazang lo uh a, a tuuhonte uh a kithehthang hi.

²²Ngai un! Thu hong kizasak hi - leilu-lam gam panin alian mahmah husa khat hong ging hi! Tua in Judah khuapite hawmsakin se-alte gamtatna a suaksak hi.

²³TOPA aw, mihingte nuntakna ama aa ahi loh lam ka thei hi; ama kalsuannate ama kilamlah ding ahi kei hi.

²⁴TOPA, kei hong bawlpha in, thutangin hong bawl inla - hehsa-in hong puahpha kei in, heh lecin bangmah lo ka suak ding hi.

²⁵Nang hong thei lo minamte tung le nangma mina kilo ngei lo mite tungah na thangpaihna sungkhia in. Ahang in, amaute in Jacob valhtum uh a, amah valhtum kiuhkeuh hi; ama tenna gam a nusia khin uh hi.