Read Zokam Jeremiah 13 Bible Online

Jeremiah 13 - Zokam bible

Jeremiah 13

¹TOPA in kei tungah hong gen hih ahi hi: "Pai-in puan kawnggak khat lei-in na kawng gak inla, tui tawh kisawhkhasak kei in," hong ci hi.

²Tua ciangin TOPA hong lamlah bangin puan kawnggak khat lei-in ka kawng ka gak hi.

³Tua ciangin TOPA thu a nih veina kei tungah hong tunga:

⁴"Na kawnggak lei-in na kawng gak inla tu mahmah in Perath a[26] ah pai-in tua lai-a suang heng sungah sel in," hong ci hi.

⁵Tua ciangin Perath ah ka pai-a TOPA hong gensa bangin ka sel hi.

⁶Ni tampi nungin TOPA in kei tungah, "Tu mahmah in Perath ah pai inla tua lai-ah sel-a kong sawl kawnggak la in," hong ci hi.

⁷Tua ciangin Perath ah ka pai-a kawnggak tokhia in ka selna mun pan ka lakhia hi, ahi hangin na kisia khina, a kizang thei kiuhkeuh kei hi.

⁸Tua ciangin TOPA thu kei tungah hong tunga:

⁹TOPA gen hih ahi hi. "Tua tawh kibangin Judah kiphatsakna le Jerusalem kiphatsakluatna ka susia ding hi.

¹⁰Hih a gilo mite in ka thu ngai nuam lo uh a, amau lungtang khauhna zui-in a na semin a biak uh pasian dangte a zuite hih kawnggak tawh kibangin - kimanna a nei kiuhkeuh kei ding uh hi!

¹¹Ahi hangin kawnggak pen mihing kawng kimkot ah a kigak bangin Israel innkuan bup le Judah innkuan bup ka mi ding, ka minthan nading, hong kiphat nading le hong kipahtawi nadingin ka kawnga ka gak ahi hi. Ahi hangin amaute in thu a ngai kei uh hi," TOPA in cikhia hi.

¹²"Amaute kiangah gen in: ‘Hih in Israel Pasian TOPA gen ahi hi: Savun- um peuhmah zu na dim ding hi,’ Tuateh amaute in, ‘Savun-um peuhmah zu dip ding kote in thei lo ka hi uh hiam,’ hong cih uh leh

¹³amaute kiangah, ‘TOPA gen hih ahi hi: Keimah in hih gama teng khempeuh le David tokhom a tu kumpite, siampite, kamsangte Jerusalem a teng khempeuh tawh zu ka khamsak ding hi.

¹⁴Khat le khat ka kisuzansak dinga pate le tapate zong a kibangin ka kisusak ding hi, TOPA in cikhia hi. Amaute hehpih lo, lainat lo, khuatuah loin ka susia ding hi, ci hi, ‘va ci un," a ci hi.

¹⁵TOPA in gen khin ahi manin kisathei kei unla za-in thusim un.

¹⁶Note tungah khuamial hong tunsak ma, khuamialna mualneute tungah na kimuktuk ma-un na Pasian uh TOPA min thangsak un. Khuavak na lamet uh hangin amah in khuamial sahpi suaksakin khuamial bikbekin a kheng hi.

¹⁷Ahi hangin thu na ngaih kei uh leh na kiphatsakna uh hangin ka kapsim dinga; khitui luangin kah cihtakin ka kap ding hi, bang hang hiam cih leh TOPA tuuhonte salin kikai ding hi.

¹⁸Kumpipa le kumpipa’ nu kiangah, "Na minthanna kumpi lukhute uh na lutung panun kia ding ahi manin, na kumpi tokhom panin tuakkhia un," ci-in gen un.

¹⁹Negev a khuapite kikhakcip dinga kuamah in a hong kei ding hi. Judah-te khempeuh salin kikai dinga, kipaipihmang kiuhkeuh ding hi.

²⁰Dakto unla leilu-lam pana hong paite en dih un. Nang hong kipia tuuhonte, note kisaktheihpih tuute koi-ah om ta ahi hiam?

²¹Nang kipawlpih dinga a tuam vilvela na koihte nang tungah TOPA in hong uksak ciangin bang gen ding na hi hiam? Numei nausuak kuan bangin na sa velval lo ding na hi hiam?

²²"Bang hangin hici-in kei tungah hong tung hiam?" ci-in na kingaihsut leh - na mawhna tampite hangin na niksing hong kibalkeksaka, na pumpi hong kibawlsia ahi hi.

²³Ethiopia-te b[27] in a vun uh khek thei ahi hiam? Kamkei in agial khek thei ahi hiam? Gitlohna-a zongsangsa note in zong a hoih na bawl thei kei ding uh hi.

²⁴Sehnel-gam huih in buhvai a mutleng bangin keimah in note kong thehthang ding hi.

²⁵Hih in nangma tanh dinga ka sehsa ahi hi; bang hang hiam cih leh kei nong mangngilh a, pasian maan lote na muang hi," TOPA in cikhia hi.

²⁶Na zahmawh a kimuh nadingin na niksing na maitang khuh dongin kong lemtohsak ding a —

²⁷na angkawmnate le huk lua-a na tau huthutnate zummawh-a na kizuaknate a kidawkkhia ding hi. Mualneute tung le lolaite ah, a kihhuai-a na gamtatnate ka mu khin hi. Jerusalem aw, gimna nak thuak na nicia! Bangtan vei ninnin lai ding na hi hiam?" a ci hi.