Read Zokam Jeremiah 14 Bible Online

Jeremiah 14 - Zokam bible

Jeremiah 14

¹Hih in guahhaanna tawh kisai Jeremiah tunga tung TOPA thu ahi hi:

²"Judah thum hi, a khuapite maimang kuankuan ta hi; amaute in a gam uh kah uh a, Jerusalem panin kahna gingkhia hi.

³Uliante in a nasemte uh tui tawi dingin a sawl uh hi; amaute in tuikhuk a zuat uh hangin tui a mu kei uh hi. Amaute tui dim loin a ciah uh hi; lungkhamin cimawh uh a, a lu uh a khuh uh hi.

⁴Gam sungah guah zu lo ahi manin leitang a khangkham hi; lokhote cimawhin a lu uh a khuh uh hi.

⁵Lopa om lo ahi manin gam sunga sazuk nangawn in a no suaktung nusia liang hi.

⁶Gamsung laate khosang ah ding uh a, se-al bangin a kamnak saisai uh hi; lonona om lo ahi manin a hakzo kei uh hi."

⁷TOPA aw, ka mawhnate un kote langah teci a pang ta zongin nangma min hangin bang khatpeuh hong hihsak in. Ahang in, kote nungtolhna lian mahmah a, nang tungah kong mawh khin ta uh hi.

⁸Israel’ lametna, a lungdon huna Honpa aw, bang hangin ka gam sunguah midang suaka, zan khat bek a taam khualzinpa tawh kibang na hi hiam?

⁹Bang hangin mi cimawh bang le a hon zo nawn lo galhangpa bang na hi hiam? TOPA aw, kote tawh nang na omkhawm a, na minin kote hong kilo hi; kote hong nusia kei in!

¹⁰Hih mite tawh kisai-in TOPA gen hih ahi hi: "Amaute in pai kawikawi nuamsa mahmah uh a; a khe uh a dek zo kei uh hi. Tua ciangin TOPA in amaute sang lo a; tu-in a gitlohnate uh ciamtehin a mawhnate uh hangin dan a tuaksak ding hi," a ci hi.

¹¹Tua ciangin TOPA in kei tungah, "Hih mite nopsak nading hong ngen nawn kei in.

¹²An a tan uh hangin amau kikona ka ngai kei dinga, meihal biakna le an-a biakna hong piak uh hangin ka sang kei ding hi. Tua sangsikin amaute namsau, kialpi le pulpi in ka susia ding hi," hong ci hi.

¹³Ahi hangin, "Ah, Thupipen TOPA, kamsangte in,’ Note in namsau mu loin kialpi na thuak kei ding uh hi. Hih munah tawntung lungnopna kong pia ding hi, cici mai uh hi," ka ci hi.

¹⁴Tua ciangin TOPA in kei tungah, "Kamsangte in kei minin zuauthu a gen uh hi. Amaute ka sawl kei a, zong ka hopih kei hi. Amaute in note tungah a maan lo mangmuhna, aisanna, milim biakna a[28] le amau lungsima suakte hong gen uh ahi hi.

¹⁵Tua ahi ciangin kei mina kamsangte tungah TOPA gen hih ahi hi: Amaute in ka sawllohpi-in, ‘Namsau le kialpi in hih gam a sukha kei ding hi," a ci ding uh hi. Tua kamsangte tektek kialpi le namsau-in a si ding uh hi.

¹⁶Tuateh amaute thugenna mite namsau le kialpi hangin Jerusalem kongzingte ah a kilawnkhia ding hi. Amaute, a zite a tanu a tapate uh a vui ding khat beek a om kei ding hi. Keimah in amaute thalawh tuahsiatna, amau tungah ka buaksuk ding hi.

¹⁷"Amaute tungah hih thu gen in: "Ka ta nungak bit ka mite - nakpitakin kisat a, nak liam mahmah ahi manin ka mitte sun le zanin kan hun nei lo khitui tawh kidiah den hen.

¹⁸Gamsung ah pai leng namsau-a kithatte ka mu a; khuapi sungah pai leng lah kialpi-a puksite ka mu hi. Kamsangte le siampite amau theihlohna gamah a paimang ta uh hi, ‘va ci in," a ci hi.

¹⁹Nang in Judah a nial kiuhkeuh mah na hi hiam? Zion a nolh mah na hi hiam? Bang hangin kote a kidamsak thei lo dingin hong hingimsak na hi hiam? Kilemna ka lamet uh hangin hoihna hong tung lo a, dam hun ka lamet uh hangin lauhuaina bek a om hi.

²⁰TOPA aw, kote in ka gitlohna uh le ka pate uh khialhna ka thei uh a; nang tungah a mawh taktak mah ka hi uh hi.

²¹Nangma min na khualna-in kote hong nolh kei inla, a minthang na tokhom min neusak kei in. Kote tawh na thukhun phawk inla palsat kei in.

²²Kimanna a nei lo minamte’ milimte in guah zusak thei ahi hiam? Vante in amau thu-in khuapi guah zusak thei ahi hiam? A zusak kei hi, nangma zuksak ahi hi; TOPA kote Pasian aw. Tua ahi ciangin hihte khempeuh nangma hihsa ahi manin nangma sungah lametna ka nei uh hi.