Read Zokam Jeremiah 15 Bible Online

Jeremiah 15 - Zokam bible

Jeremiah 15

¹Tua ciangin TOPA in kei kiangah, "Moses le Samuel ka mai-ah hong ding zawzen uh zongin hih mite lamah ka lungsim a nga tuan kei ding hi. Ka muhna panin amaute hawlkhia in! Paikhiasak in!

²Amaute in nang kiangah, ‘Koi-ah pai ding ka hi uh hiam?’ hong cih uh leh amaute kiangah, ‘Hih in TOPA gen ahi hi: "‘A si dinga kisehsate sihna ah, namsau thuak dinga kisehsate namsau ah, kialpi thuak dinga kisehsate kialpi ah, sala kaih dinga kisehsate sal ah,’ ci in," hong ci hi.

³Amaute tungah suksiatna nam li ka tungsak ding hi," TOPA in cikhia a, thah nading namsau, a tuahmang dingin ui, a susia ding le a nemang dingin huihlak vasate le leitunga ganhingte ka sawl ding hi.

⁴Judah kumpipa Hezekiah tapa Manasseh in Jerusalem a, a bawl thu hangin leitunga kumpi-gamte khempeuh, amaute ka mudahsak ding hi.

⁵"Jerusalem aw, kua in nang hong hehpih ding ahi hiam? Kua in nang hong kah ding ahi hiam? Na omzia dong dingin kua hong baang ding ahi hiam?

⁶Nangmah in kei nong nolh khin zo hi," TOPA in cikhia hi. "Nang na nungtolhtolh hi. Tua hi-a na tungah ka khut hong nga-in kong susia ding hi; kong khuatuah thei nawn kei hi.

⁷Na gamsung khuapi kongpite ah buhhah ciangka tawh amaute ka hah ding hi. Amaute in a lampi uh khek lo uh ahi manin sihna le siatna ka tungsak ding hi.

⁸Keimah in tuipi a sehnel sangin nupi meigong ka tamsakzaw ding hi. Ta khanglai nei nupite tungah suntangpi-in siatna ka tungsak dinga; amau tungah thakhatin lungkhamna le launa ka tungsak ding hi.

⁹Ta sagih a nei nupi, khakham vei-in a husam ding hi. Suntangpi-in ama ni tum dinga; tuanu zahlaakin a mindai ding hi. A nungta lai sunte a galte uh mai-ah namsau a thah dingin ka koih ding hi," TOPA in cikhia hi.

¹⁰Kalasai, nu aw, gambuppi mi tawh kilangneih a, mite mawhsak dingin ta a nong neih sese! Sum leitawi loin ba lo napi mite in kei hong hamsiat lai uh hi.

¹¹TOPA in, "Thu hoih nadingin nang kong hu taktak dinga; haksat hun le lungdon hunin na galte nang tungah kong thumsak taktak ding hi.

¹²"Mi khat in sik - leilu-lam pana sik - ahikeh sumngo sutan zo ding ahi hiam?

¹³Na gam sungtengua na mawhna khempeuh hangin na hauhna uh le na goute khempeuh uh aman piak lohin galvanlakin ka pia ding hi.

¹⁴Note langah a kuang ding ka hehna mei kitawh ding ahi manin, note theihlohna gamsung a[29] khatah sila kong suaksak ding hi," hong ci hi.

¹⁵TOPA aw, na theitel hi; hong phawk inla hong veh in. Kei hong bawlsiate tungah phu hong laksak in. Nang a lungduai na hi hi - kei hong lakhia kei in; nangma ai-in mawhsakna ka thuak lam ngaihsun in.

¹⁶Na thute hong tun ciangin ka ne hi; na min vom ka hi manin TOPA Thahatpen Pasian aw, tuate ka nopsakpih a, ka lungsim ah nuam ka sa hi.

¹⁷A gualnuam mite lakah ka tu ngei kei-a, amaute tawh ka gualnuam khawm kei hi. Nang in ka tungah na khut hong nga-in lungkhamna tawh hong dim na hi manin kei kia ka tu hi.

¹⁸Bang hangin ka natna dai thei lo a, ka liamna dahhuai-in kidamsak thei lo ahi hiam? Nang in kei tungah tui om lo luite bang le a kangsa tuinak tawh kibang ding na hi hiam?

¹⁹Tua ahi ciangin TOPA gen ahi hi: "Na kisik kik leh ka na na sep theih nadingin na omna ngei ah kong omsak ding hi; nang in a man nei thu genin a man nei lo thu na gen kei leh ka thugenpa na suak ding hi. Hih mite nang lamah kiheisak inla, amau lamah nang kihei peuhmah kei in.

²⁰Keimah in hih mite adingin kulh, khuapi umna sumngo kulh kong suaksak ding hi; nang hong hu-in hong suaktasak dingin hong ompih ka hi manin amaute in nang hong do uh hangin hong zozo lo ding uh hi," TOPA in cikhia hi.

²¹"Keimah in migilote khut panin kong honkhia dinga mi kheltatte khut panin kong tankhia ding hi," hong ci hi.