Read Zokam Jeremiah 16 Bible Online

Jeremiah 16 - Zokam bible

Jeremiah 16

¹Tua ciangin TOPA thu kei tungah hong tunga:

²"Hih mun ah zi pi kei inla, tanu tapa zong nei kei in," hong ci hi.

³Ahang in, hih gama suak tanute le tapate thu le amaute nu numeite le amaute pa pasalte thu tawh kisai TOPA gen hih ahi hi:

⁴"Amaute sih-natna in a si ding uh hi. Amaute kuamah in kah loin kuamah in zong vui lo dinga, leilakah a ki-ek nusiat ding hi. Amaute namsau le kialpi-in simang ding uh a, a misiluangte uh huihlak vasate le leitung ganhingte an a suak ding hi," a ci hi.

⁵Ahang in, TOPA gen hih ahi hi: "Misite inn ah lut kei in; vakahin na dahpih lam zong va lak kei in; bang hang hiam cih leh hih mite tung panin ka thupha ka itna le ka hehpihna ka dok kik khin hi, "TOPA in cikhia hi.

⁶"Hih gam ah ulian uneu a si ding uh hi. A kivui a kikah om loin amaute hangin khat beek in a pumpi uh kuiliam lo ding uh a, a sam uh a met kei ding uh hi.

⁷Misi kahte - a nu si, a pa site nangawn - hehpihna-in kuamah in an lui lo dinga, hehnepna-in tuisik zong a suah kei ding hi.

⁸"Tuateh pawi kibawlna inn ah ne-in dawnin a muitual dingin lut kei in.

⁹Ahang in, TOPA Israel-te Pasian gen hih ahi hi: Note theih hun sung na muh tektekun hih mun ah lungdamna le kipahna awte le zineipa le mo awte ka beisak ding hi.

¹⁰"Hihte khempeuh hih mite tungah na gen ciangin amaute in, ‘Bang hangin TOPA in hihzah lawmlawma alian gimna a tunsak dingin khensat ahi hiam? Eite in bang khialhna bawl i hi hiam? TOPA eite Pasian tungah bang mawhna bawl i hi hiam?" ci-in hong dot uh leh

¹¹amaute tungah TOPA in, ‘Na pate un kei hong taisan uh a, pasian dangte zui-in a na semin bia uh hi. Kei hong taisan uh a, ka thukham zui lo uh hi.

¹²Ahi hangin, note na pate uh sangin na uangzaw lai uh hi. En un, ka thu nong man tangun na lungsim gitlohna uh na zui tentan teitei uh hi.

¹³Tua ahi ciangin hih gam panin note le na pate un zong a theih ngei loh uh gam ah kong lawnkhia dinga, hong angvan nawn lo ding ka hi manin tua lai-ah sun le zanin pasian dangte’ na na sem ding uh hi,’ ci hi.

¹⁴"TOPA in, "Bangbang ahi zongin mite in, ‘Egypt panin Israel-te a paikhiatpih TOPA nuntakna lo-in’ ci-a a kiciam tangun,

¹⁵‘Israel mite leilu lam pan le eite hong hawlkhiatna gam khempeuh panin hong paikhiatpih TOPA nuntakna lo-in,’ ci-in a kiciam hun uh hong tung ding hi,’ ci hi. Ahang in, a pute uh ka piaksa gamah amaute ka pi kik ding hi.

¹⁶"TOPA in, ‘Ahi hangin tu-in nga mante tampi ka kuansak a, amaute a man ding uh hi. Tuate nungah sabengte tampi ka kuansak dinga, amaute in muallian mualneute tung khempeuh le suangheng sungte a bengmang ding uh hi.

¹⁷Amaute paina khempeuh ka mu a, kei muhna panin amaute kisel thei loin amaute mawhnate zong a sel thei tuan kei ding uh hi,’ ci hi.

¹⁸Amaute gitlohna le a mawhna uh a zah nihin ka thuk ding hi, bang hang hiam cih leh amaute in nuntakna nei lo, a zumhuai milim bawltawmin ka gamsung ninsak uh a, a kihhuai a milimte uh tawh ka gouluahna mun teng a dim khin uh hi," hong ci hi.

¹⁹Ka thahatna, ka kulh muanhuai le ka lungdon huna ka bukna TOPA aw, leimongte panin minamte nang kiangah hong pai uh a, "Ka pate un pasian maan lo le kimanna a nei lo, a hoih a bawl thei lo milimte longal bangmah a nei kei uh hi.

²⁰Mihing in ama pasian ding bawltawm thei ahi hiam? Bawltawm thei napi tuate pasian ahi kei hi!" a ci ding uh hi.

²¹"Tua ahi ciangin amaute ka hilh dinga - hih hunin ka vangliatna le ka thahatna amaute ka hilh ding hi. Tua ciangin amaute in ka min TOPA ahilam a thei ding uh hi.