Read Zokam Jeremiah 17 Bible Online

Jeremiah 17 - Zokam bible

Jeremiah 17

¹"Judah’ mawhna a lungtang satak pek tung le a biakna-tau kite tungah sikzumin kikui kuakin suang hiamin kikhuak hi.

²A tate nangawn un singlim nuai le mualsang tunga a biakna-taute uh le Asherah khuamte a[30] ciamteh thei lai uh hi.

³Na gamsung khempeuh uha mawhna hangin gam sunga ka mualpi le na neih na lam b[31] na goute khempeuh uh, na munsangte uh tawh galvanmat ka suaksak khin ding hi.

⁴Na mawhna uh hangin kong piaksa gouluahna na taan ding uh hi. Note in ka hehna na tawhkuang uh a, kuangden ding ahi manin na theih ngei lohna uh gam na galte uh tungah sal kong suaksak ding hi."

⁵TOPA gen hih ahi hi: "Mihing muanga si-le-sa tungah kingate, ama hatna le a lungsim in TOPA pialsan ahi manin hamsiatna thuak ta hen.

⁶Amah gamtulsa a sawlbawk bang dinga; daupai hun a nei kei ding hi. Kuama tenlohna, ci-gam, gamgawtak sehnel-gam ah a teng ding hi.

⁷Ahi hangin a lungsim khempeuha TOPA a muang mi, thupha ngah ahi hi.

⁸Amah tui gei-a kisuan luipanga zungkha singkung bang ding hi. Ni a sat ciangin lau lo a, a tehte hing tawntung hi. Guahtui haan’ kumin zong patau lo - a gah lo tuan kei hi.

⁹Na khempeuh sangin lungsim khemhatzaw a, kidamsak thei lo hi. Kua in theitel ding ahi hiam?

¹⁰"TOPA in lungsim zonga, ngaihsutna sittelin mi khat, ama gamtatna tawh kizui, ama nasepna tawh kituakin pahtakman a pia hi."

¹¹Thuman lo-a a haute, ama tui lopi a op valah tawh kibang hi. A khan kimtan ciangin a neihsate beimang dinga, a tawpna ah mihai ahilam kilangsak ding hi.

¹²Eite munsiangtho omna mun ahileh a tunga kipan a kitawisang a minthang tokhom omna ahi hi.

¹³Israel-te lamet TOPA aw, nang hong taisan khempeuh kimaizumsak ding hi. Nangmah hong taisante leivui laka lai kigelh a suak ding uh hi, bang hang hiam cih leh amaute in a nungta ciktui ahi TOPA a taisan khin uh hi.

¹⁴TOPA aw, kong pahtawipa nang na hi manin, hong damsak in, tua hileh ka dam ding hi; hong honkhia in tua hileh ka suakta ding hi.

¹⁵Amaute in kei tungah, "TOPA thugen koi-ah om ahi hiam? Tu-in tangtungsak in,’" hong cici uh hi.

¹⁶Nangma tuucinna sung panin ka taikhia kei a; siatna ni ka deih loh lam lah na theihsa ahi hi. Ka kama pusuakkhia peuhmah na telsa ahi hi.

¹⁷Siatna ni cianga ka bukna na hi hi, kei hong lausak kei in.

¹⁸Kei hong bawlsiate maizumsak inla, ahi hangin kei hong maizumsak kei in; amaute lausak inla, kei hong lausak kei in; amaute tungah siatna ni tungsak inla, siatna athuapthuapin tungsak in.

¹⁹TOPA in kei tungah a thugen hih ahi hi: "Pai-in Judah kumpite a sungtum a pusuahna tangpite kongpi ah va ding inla: Jerusalem kongpi dang khempeuh ah zong va ding in.

²⁰Amaute kiangah, "Judah kumpite le Judah mi khempeuh le Jerusalem khua sungah tenga hih kongpi a tawnte khempeuh aw, TOPA thugen za un.

²¹TOPA thugen hih ahi hi: Sabbath ni-in van na puak loh ding uh le Jerusalem kongpite ah na lutpih loh nadingun kidawm un.

²²Na inn panun van puakhia kei unla Sabbath ni-in bangmah sem loin na pute uh tunga ka thupiak bangin Sabbath ni a siangtho in tang un.

²³Amaute in ahileh ngai loin thusim lo uh a, ngawngkhauhin ka thu ngai loin, zuih zong a sawm tuan kei uh hi.

²⁴Ahi hangin note in ka thu nong man uh leh, TOPA in kong cihinah Sabbath ni-in hih khuapi kongpite ah van bangmah na tumpih kei ding uh a, Sabbath ni siangthotakin tangin tua ni-in bangmah na sem kei ding uh hi;

²⁵tua ciangin David tokhom tunga a tu kumpite a uliante uh tawh hih khuapi kongpite tawnin hong pai ding uh hi. Amaute le a uliante uh sakolleng le sakol in hong tuang ding uh a, Judah mite le Jerusalem a mite tawh hong tonin hih khuapi ah mi a teng den ta ding hi.

²⁶Judah khuapite pan le Jerusalem kima khuaneute pan, Benjamin gam le nitumna-lam mualbul pan mualtung gam le Negev panin mite hong pai ding uh a, TOPA inn ah meihal biakna le biakpiaknate, an-a biakna le gimnamtui le lungdamkohna biakna hong puak ding uh hi.

²⁷Ahi hangin ka thu hong mang loin Sabbath ni a siangtho-in na tan kei uh a, Sabbath ni-in Jerusalem kongpi tawnin van puasa in na pai teitei uh leh Jerusalem kongpite ah a kisumit thei lo mei ka tawhkuang dinga, tua in a kulh muanhuai a kangtum ding hi,’ ci in," hong ci hi.