Read Zokam Jeremiah 23 Bible Online

Jeremiah 23 - Zokam bible

Jeremiah 23

¹"Ka lonona muna tuute susia-a a thehthang tuucingte in gimna thuak ta hen!" TOPA in cikhia hi.

²Tua ahi ciangin ka mite a cing tuucingte tungah TOPA Israel Pasian in a gen hih ahi hi: "Note in ka tuuhonte thehthangin na nawhmang uh a, amaute don loin na khoi kei uh hi. Na gamtatsiate uh hangin dan kong tuaksak ding hi," TOPA in cikhia hi.

³Ka tuuhon a baanglaite ka hawlkhiatna gamte panin ka kaikhawm dinga, amaute gahpha in a khan nading uh amau lonona munah ka puak kik ding hi.

⁴Amaute donin a uk ding tuucingte ka koih dinga amaute lau nawn lo, lungkham nawn loin khat beek a mangthang nawn kei ding uh hi," TOPA in cikhia hi.

⁵TOPA in: "David a[43] panin pilna tawh ukin gam sungah thumaan thutangin na a sem ding kumpi ahi thumaan Hiang khat ka khankhiatsak hun hong tung ding hi.

⁶Ama uk hun sungin Judah kihon dinga Israel ngaihmuangtakin a teng ding hi. Amah a kisap nading min in: TOPA Eite Thumaanna" ahi hi.

⁷"Tuatak ciangin TOPA in cikhia hi, ‘Mihing in, Egypt panin Israel mite hong paikhiatpih TOPA nuntak ka lo hi,’ ci nawn lo ding uh a,

⁸ahi hangin amaute in, ‘Gam leilu lam le amaute a hawlkhiatna gamte khempeuh panin Israel suante a paikhiatpih TOPA nuntakna lo-in,’ a cih ding hun hong tung ding hi. Tua ciangin amaute amau gamah teng ta ding uh hi," a ci hi.

⁹Kamsangte tawh kisai-in: Ka sunga ka lungtang kitam khin a, ka guh khempeuh kiling khin hi. TOPA le a kammal siangthote hangin zu tam a dawn lua zukhampa ka bang hi.

¹⁰Gamsung ah angkawmte dim uh hi; hamsiatna b[44] hangin gamsung teng gawtakin c[45], sehnel-gama lonona teng keucip hi. Kamsangte in gitlohna lam zui uh a, a vangliatna uh a maan lopi-in zang uh hi.

¹¹"Kamsangte le siampite in pasian nei lo uh a; ka biakinnpi sung nangawnah a gitlohna uh ka mu hi," TOPA in cikhia hi.

¹²"Tua ahi ciangin amaute lampi lam nalna suak a; amaute khuamial sungah kilutsakin tua lai-ah a puk ding uh hi. Amaute dan a kituahsak kumin amau tungah gimna ka tungsak ding hi," TOPA in cikhia hi.

¹³"Samaria kamsangte lakah a muh thadahhuai hih na ka mu hi: Amaute in Baal minin thu gen uh a, ka mi Israel-te lam a pialpih uh hi.

¹⁴Tuateh Jerusalem-a kamsangte lakah a mulkimhuai pawlkhat ka mu hi. Amaute in angkawmin zuau genin a nungta uh hi. A gitlohna panun kuamah a kikhel loh nadingun migilote a hanthawn zaw uh hi. Amaute kei tungah Sodom tawh kibang uh a, Jerusalem mite Gomorrah tawh a kibang uh hi."

¹⁵Tua ahi ciangin kamsangte tawh kisai-in TOPA gen hih ahi hi: "Amaute ankhaa ka nesak dinga, gu kisawh tui ka dawnsak ding hi, bang hang hiam cih leh Jerusalem-a kamsangte tungpanin pasian-milohna gamsung tengah kizel hi."

¹⁶Hih in Thahatpen TOPA gen ahi hi: "No tunga thu hong gen kamsangte thu ngai kei un, lametna zuau tawh note hong dim uh hi. Amaute in amau lungsima suaktawm thu hong gen uh hi; TOPA kam sung pan hi lo hi.

¹⁷Amaute in kei hong simmawhte tungah, ‘TOPA in: Lungnopna ngah niteh , ci hi,’ a ci den uh hi. Amaute lungsim khauhna a zui mite tungah, ‘No tungah siatna hong tung lo ding hi,’ a ci uh hi.

¹⁸Ahi hangin amaute lakah kua pen TOPA tawh thu kikumin ding ngei a, amah va mu in a thugen va za ahi hiam? Kua in a thugen ngai-in za ahi hiam?

¹⁹En un, TOPA thangpaihna huihpi kinuai dinga, migilote lutungah pingpei in zialnelh ding hi.

²⁰A lungsim sunga a tupna teng a tunsak kim matengin TOPA hehna a kileh kik kei ding hi. Hong tung ding hunah kiciantakin na theitel ding uh hi.

²¹Hih kamsangte kei sawl lohpi amau thusuak tawh a taikhia uh hi a; ka hopih lohpi-in thu a gen uh hi.

²²Ahi hangin kei tawh thu kikumin ding khin uh hileh ka mite tungah ka kammalte gen ding uh a, a gitlohna panun kikhelsakin a gamtat hoih lo panun kiheisak ding hi.

²³"Kei in a nai-a omte bek Pasian hi in, a gamla-a omte Pasian hilo tuan ka hi hiam? TOPA in cikhia hi.

²⁴Kei muh loh dingin mi khatpeuh kawmbu lakah bu thei ahi hiam? TOPA in cikhia hi. "Leitung vantung dim lo ka hi hiam?" TOPA in cikhia hi.

²⁵"Keima mina zuauthu gen kamsangte thugen ka za khin hi. Amaute in,’Mang man ing ei! Mang khat man ing ei!’ ci uh hi.

²⁶Amaute lungsim sunga suak peuh a gen zuauthei kamsangte lungsim ah hihte bangtan vei suak lai ding ahi hiam?

²⁷A pate un Baal biakna hangin ka min a mangngilh uh bangin amaute khat le khat a kikup uh a mangte un ka mite, ka min a mangngilhsak ding sa uh hi.

²⁸Kamsang mang manpa in a mang gen henla ka kammal nei pa in zong muanhuaitak mahin gen ta hen. Buhtu le buhtang bangci kibat thei ding ahi hiam?" TOPA in cikhia hi.

²⁹"Ka kammal mei tawh kibangin suangtum a satzan sek tawh kibang hi lo ahi hiam?" TOPA in cikhia hi.

³⁰Tua ahi ciangin," TOPA in cikhia hi, "Kei tung pan hi dinga a upmawh uh thu khat le khat a kiguksaktuah uh kamsangte langah ka pang hi.

³¹Hihi, "TOPA in cikhia hi, "Amau leii tawh a lumletlet uh hi napi,’ TOPA genkhiat ahi hi,’ a ci kamsangte langkhatah ka pang hi.

³²Hi taktak hi, amaan lo mang thu peuh a gente langkhatah ka pang hi," TOPA in cikhia hi. "Kei sawl le kei koih hi lo napi amaute in khiatna nei lo zuauna tawh thu hilh uh a, ka mite lam a pialpih uh hi. Amaute in hih mite tungah metna them khat zong a pia kei uh hi," TOPA in cikhia hi.

³³Hih mite ahi a, kamsang khat ahi a, siampi khat in ahi zongin, ‘TOPA thusuak a[46] bang hiam,’ ci-a hong dot ciangin amaute kiangah, ‘Bang thusuak hiam? b[47] Nang kong taisan ding hi,’ TOPA in cikhia hi,’ ci in.

³⁴Kamsang khat ahi a, siampi khat ahi a, midang khatpeuh in ahi zongin hong gen a, ‘Hih in TOPA thusuak ahi hi,’ a cihleh tuapa le a innkuanpihte dan ka tuaksak ding hi.

³⁵Note in na lawmte uh le na tanaute uh tungah: ‘TOPA hong dawnna bang ahi hiam?’ ahikeh TOPA in bang gen ahi hiam?’ na ci den ding uh hi.

³⁶Ahi hangin, ‘TOPA thusuak na ci kha nawn peuhmah kei ding uh hi; bang hang hiam cih leh mi khempeuh neih kammal amau thusuak hi a, note in eite Pasian, Thahatpen TOPA, a nungta Pasian kammal tawh na kipelhsak uh hi.

³⁷Kamsangpa tungah: ‘TOPA hong dawnna bang ahi hiam?’ ahikeh ‘TOPA in bang hong gen hiam?’ na ci den ding uh hi.

³⁸Note in, ‘Hih in TOPA thusuak ahi hi,’ na cih uh hangin, TOPA gen hih ahi hi: ‘Hih in TOPA thusuak ahi hi,’ ci kei un ka cih hangin note in, ‘Hih in TOPA thusuak ahi hi,’ na ci teitei uh hi,

³⁹tua ahi ciangin note kong mangngilh taktak dinga ka omna panin note le na pate uh kong piaksa khuapi tawh kong lawnkhia khawm ding hi.

⁴⁰Keimah in note tungah a tawntung zahlaakna a kimangngilh lo ding maizumna kong tungsak ding hi," a ci hi.