Read Zokam Jeremiah 26 Bible Online

Jeremiah 26 - Zokam bible

Jeremiah 26

¹Josiah tapa Judah kumpipa Jehoiakim kumpi a suah tunglamin TOPA kiang panin hih thu hong tung hi:

²"TOPA gen hih ahi hi: TOPA’ inn huangah ding inla, amah bia dinga TOPA inn a hong pai Judah khuapite pana mite tungah va gen in. Nang kong thupiak khempeuh amaute tungah gen inla mal khat zong sit kei in.

³Amaute in na thugen ngai-in gitlohna panin kihei thei kha ding uh hi. Tua ciangin amau gitlohnasate hanga amau tunga tunsak dinga ka geelsa siatna ka tungsak nawn kei ding hi.

⁴Amaute kiangah, ‘Hih in TOPA gen ahi hi: Ka thu na ngaih kei uh a, note mai-a kong lahsa ka thukham zui loin,

⁵note kianga kong sawl kikkik (ahi hanga a thu na ngaih loh uh) ka nasem kamsangte thu na ngaih kei uh leh

⁶tua ciangin hih inn Shiloh ka bangsak dinga, hih khuapi leitunga minam khempeuh lakah kihamsiatna in ka kizangsak ding hi,’ ci-in," a ci hi.

⁷TOPA inn sunga Jeremiah in hih thute a gen, siampite, kamsangte le mi khempeuh in a za uh hi.

⁸Ahi hangin, mi khempeuh tungah gen dingin TOPA in Jeremiah a thupiaksa teng a gen khit phetin siampite, kamsangte le mi khempeuh in amah lencipin, "Na sih kul hi!

⁹Bang hangin TOPA mina Shiloh bangin hih inn kisia dinga, hih khuapi kinusia-in gam simtham suak ding hi, ci na hi hiam?" a ci uh hi. Tuateh TOPA inn sunga Jeremiah kim ah mi khempeuh a kikhawm uh hi.

¹⁰Judah uliante in hih thupiang a zak uh ciangin kumpi inn panin TOPA inn ah paito uh a, TOPA inn Kongpi Thak-a lutna ah panmun a la uh hi.

¹¹Tua ciangin siampite le kamsangte in uliante le mi khempeuh tungah, "Hih mipa thah dingin thu kikhen ta hen, bang hang hiam cih leh amah in hih khuapi langpanin thu a gen hi. Na bilun na zaksa ciat uh ahi hi!" a ci uh hi.

¹²Tua ciangin Jeremiah in ulian khempeuh le mi khempeuh tungah: "Na zaksa uh hih inn le hih khuapi tawh kisai khempeuh TOPA in gena hong sawl ahi hi.

¹³Tu-in na omzia uh le na gamtat uh kipuahpha-in TOPA note Pasian thu mang un. Tua hileh TOPA in a lungsim khel dinga no tungah tunsak dinga a genkhiatsa gimna hong tungsak lo ding hi.

¹⁴Kei ka hileh note khutah ka om hi; ahoih amaana na ngaihsut bangbang un hong hih un.

¹⁵Ahi zongin kei nong thah uh leh note le hih khuapi le a sunga om mite khempeuh mawhpeng sisan tunga khial na suah lam uh kitel un, ahang in, hih thu khempeuh note zaka gen dingin TOPA in kei hong sawl taktak ahi hi," a ci hi.

¹⁶Tua ciangin uliante le mipite khempeuh in siampite le kamsangte tungah, "Hih mipa sih nadingin thu khen ding ahi kei hi! Amah in TOPA eite Pasian minin thu hong gen ahi hi," a ci uh hi.

¹⁷Gamsung upate pawlkhat mailam ah pai uh a, a kikhawm mi vekpi tungah, "Judah kumpipa Hezekiah hun lai-in

¹⁸Moresheth-a Micah in zong thu a gen hi; amah in Judah khempeuh tunga a genna ah, "Hih in Thahatpen TOPA gen ahi hi: " ‘Lo bangin Zion kikho dinga, Jerusalem ninkholna suakin biakinnpi mual, gamphapi lak a suak ding hi,’ ci hi. b[55]

¹⁹"Judah kumpipa Hezekiah ahikeh Judah mi khatpeuh in that ahi hiam? Hezekiah in TOPA kihta-in a maipha zongzaw hi lo ahi hiam? Tuateh TOPA in amau tungah tunsak dinga a zaksaksa siatna khel kik hi lo ahi hiam? Eite in i tungah a lauhuai siatna i kitun dektak hi!" a ci uh hi.

²⁰(Kiriath Jearim pana Shemaiah tapa Uriah zong TOPA min-a thugen khat ahi hi. Amah in hih khuapi le hih gam thuak nading Jeremiah gen bangin a gen hi.

²¹Kumpipa Jehoiakim le a uliante le galkap-mangte in hih thu a zak uh ciangin kumpipa in thah a sawm hi. Ahi hangin Uriah in a zak ciangin lau-a Egypt ah a taisim hi.

²²Kumpipa Jehoiakim in Acbor tapa Elnathan Egypt ah sawl teitei a, midang pawlkhat a tonpihsak hi.

²³Amaute in Egypt panin Uriah paikhiatpih uh a, Kumpipa Jehoiakim a puak uh hi; tuapa in namsau-in satlum a, ama luang mi mawkmawkte kivuina munah kipai hi.)

²⁴Tua banah, Shaphan tapa Ahikam in Jeremiah panpih a, tua ciangin mipi tungah thah dingin a kipia kei hi.