Read Zokam Jeremiah 34 Bible Online

Jeremiah 34 - Zokam bible

Jeremiah 34

¹Babylon kumpi Nebuchadnezzar in a galkapte khempeuh le ama ukna kumpi-gam khempeuha mi khempeuh tawh Jerusalem le a kima a khuapi khempeuh a do laitakin Jeremiah tungah hih TOPA thu a tung hi:

²"TOPA Israel Pasian thugen hih ahi hi: Judah kumpipa Zedekiah kiangah pai inla, ‘Hih in TOPA gen ahi hi: Keimah in hih khuapi, Babylon kumpipa tungah ka pia dinga amah in haltum ding hi.

³Ama khut panin nang na suakta kei dinga, hong kimanin a khutah hong ki-ap ding hi. Na mit mahmah in Babylon kumpipa na mu dinga kimaituahin nang hong hopih ding hi. Tuateh Babylon ah na pai ding hi.

⁴"‘Judah kumpipa Zedekiah aw, TOPA kamciam ngai lai dih in. Nang tawh kisai-in TOPA thugen hih ahi hi: Namsau-in na si kei ding hi;

⁵lungnuamtakin na si ding hi. Mite in na pate uh pahtawi-in, a za na laih kumpite vui-in meihal a bawlsak bangun, nang zong pahtawina mei hong halsakin, "Mawk tazen aw, pu aw!" ci-in a taamlo ding uh hi. Kei mahmah in thu kong ciam hi, ‘TOPA in cikhia hi," a ci hi.

⁶Tua ciangin kamsangpa Jeremiah in, Jerusalem a om Judah kumpipa Zedekiah tungah hih thu khempeuh a va gen hi;

⁷tua hun pen Babylon kumpipa galkapte in Jerusalem le a zawh nai loh uh Judah kumpite - Lachish le Azekah a sim laitak hun ahi hi. Hihte pen Judah gama a om laisun kulh muanhuai-a ki-um khuapite ahi hi.

⁸Kumpipa Zedekiah in Jerusalem a mi khempeuh tawh silate suahtak nading tangko nading thukhun a bawl khit uh ciangin Jeremiah tungah TOPA thu a tung hi.

⁹Kua mahpeuh in a Hebrew silate uh a numei a pasalin khah ding uh a, a Jew mipihte uh khat beek sila in a khawi nawn kei ding uh hi.

¹⁰Tua ciangin uliante le mi khempeuh, hih thukhunna-a kihel peuhmah in a silate uh a numei a pasalin khahkhia-in sila-a a khawi nawn loh nadingun a thukim uh hi. Amaute thukim uh a, a khahkhiapah uh hi.

¹¹Ahi hangin tua nungin a lungsim uh khel uh a, a khahsa uh silate sam kikin sila in a khawi kik uh hi.

¹²Tua ciangin Jeremiah tungah TOPA thu tunga:

¹³"Hih in TOPA Israel Pasian gen ahi hi: Keimah in na pute uh Egypt pan ka paikhiatpih a, sal-a, a omna gam panun ka paikhiatpih lai-un amaute tawh thukhun ka bawl hi. Amaute kiangah,

¹⁴‘A kum sagihna simin kuamahpeuh in amau le amau no kianga hong kizuak Hebrew silate khatpeuh na khah ding uh hi. Na na uh kum guk a sep khit ciangin na khah c[76] pelmawh ding uh hi,’ ka ci hi. Bangbang ka cih hangin na pate un ka thu hong mang loin kei hong thusim kei uh hi.

¹⁵Sawt nai loin note na kisik uh a, ka muhna ah thumaan khat semin: Khat ciat in ama gam mite suahtakna na tangko uh hi. Ka min kilawhna inn sung keima mai-ah thukhun nangawn na bawl uh hi.

¹⁶Ahi hangin tu-in na kilehhei uh a, ka min hong daisakin amau ututna-a pai dinga na khahkhiatsa uh silate a numei a pasalin na sam kik uh hi. Ut taleh ut ta keileh na sila uh na suaksak kik uh hi.

¹⁷"Tua ahi ciangin TOPA hong gen hih ahi hi: Ka thu nong mang kei uh a, na gam mipihte uh suahtakna na tangko kei uh hi. Tua ahi ciangin tu-in keimah in note suahtakna - namsau, kialpi le pulpi-a pukna ka tangko hi, TOPA in cikhia hi. Keimah in note leitung kumpi-gam khempeuh lipkhap kong suaksak ding hi.

¹⁸Ka maitanga a bawl uh thukhun, a khun bangun tangtun lo-a, a palsatte, amau in bawngno phelnih suaha a kikala a paina uh bawngno bangin ka bawl ding hi.

¹⁹Judah le Jerusalem makaite, kumpi innsung uliante, siampite le gamsunga mi khempeuh bawngno phel kikala pai peuhmah,

²⁰amaute a that nuam a galte khut sungah ka pia ding hi. Amaute luang huihlak vasate le leitung ganhingte an a suak ding hi.

²¹"Judah kumpipa Zedekiah le a uliante, amau that nuama zong a galte uh, no kiang pana nung kik Babylon kumpipa galkapte khut sungah ka pia ding hi.

²²TOPA in ci khia hi. Keimah in thu ka pia dinga, amau khuapi ah ka puak kik ding hi. Amaute in do ding uh a, la-in mei-in a haltum ding uh hi. Tua munah kuamah a teng thei lo dingin Judah khuapite ka puamangsak ding hi," a ci hi.