Read Zokam Jeremiah 38 Bible Online

Jeremiah 38 - Zokam bible

Jeremiah 38

¹Mattan tapa Shephatiah, Pashhur tapa Gedaliah, Shelemiah tapa Jehucal a[81] le Malkijah tapa Pashhur-te in mi khempeuh tungah Jeremiah in,

²"Hih in TOPA gen ahi hi: Hih khuapi sunga a teng peuhmah namsau, kialpi le pulpi-in si ding uh a, ahi hangin Babylon mite b[82] kianga a pai peuhmah a nungta ding uh hi. Amah in a nuntakna suahtak dinga a nungta ding hi,’ a cih a za uh hi.

³Tuateh TOPA gen hih ahi hi: Babylon kumpipa galkapte tungah hih khuapi kipia taktak dinga, amaute in a la ding uh hi,’ ci hi," a ci hi.

⁴Tua ciangin uliante in kumpipa kiangah, "Hih mipa thah ding ahi hi. Amah in hih a thugente hangin hih khuapi sunga a kinusia galkapte le mite khempeuh a lungkiasak hi. Hih pa in hih mite hoih nading zong loin a siat nading uh a zong hi," a ci uh hi.

⁵Kumpipa Zedekiah in, "Amah note khut sungah a om hi, kumpipa in note langah pangin bangmah a sem thei kei hi," ci-in a dawng hi.

⁶Tua ciangin amaute in Jeremiah paipih uh a, a kicinna huang sunga kumpipa tapa Malkijah tuidum sungah a koih uh hi. Amaute in tuidum sungah Jeremiah khau-in a khaisuk uh hi; tua sungah tui om lo-in buan bek om a, buan lakah Jeremiah a tumsuk hi.

⁷Ahi hangin kumpi inn a galkap mangpa c[83] Cush-te d[84] khat Ebed-Melech in Jeremiah tuidum sungah a koih uh a za hi. Benjamin kongpi ah kumpipa a tut laitakin,

⁸kumpi inn panin Ebed-Melech paikhia-a ama kiangah,

⁹"Ka topa kumpipa aw, hih mite in kamsangpa Jeremiah tunga a sepsa khempeuh uh gitlohna ahi hi. Amaute in tuidum sungah amah lawn uh hi; khuapi sungah anlum a om nawn loh ciangin amah puksi ding hi," a ci hi.

¹⁰Tua ciangin kumpipa in Cush-te Ebed-Melech sawla, "Hih lai panin mi sawmthum tonpih inla kamsangpa Jeremiah a sih ma-in tuidum panin va kaikhia un," a ci hi.

¹¹Tua ciangin Ebed-Melech in mite tonpih a, kumpi inn a sumkholna innlim nuai-ah a paipih hi. Amah in tua lai panin puansiasa le puanlui pawlkhat tawi-in, tuidum sungah Jeremiah a khaisuk hi.

¹²Cush-te Ebed-Melech in Jeremiah kiangah, "Hih puansia le puanlui-te na ban le khau kikalah dap in," ci-a, Jeremiah in zong tuacihin,

¹³amaute in amah khau-in khaito uh a, tuidum pua-ah a khaikhia uh hi. Tuateh huang sunga amah a kicinna munah Jeremiah a om lai hi.

¹⁴Tua ciangin kumpipa Zedekiah in kamsangpa Jeremiah, vaikhak a, TOPA biakinnpi lutna a thumna ah a paipih uh hi. Kumpipa in Jeremiah kiangah, "Thu pawlkhat kong dong ding hi. Bangmah hong im kei in," a ci hi.

¹⁵Jeremiah in Zedekiah kiangah, "Hong dawng leng hong that lo ding na hiam? Ka ngaihsutna hong gen lenglah nong mang nuam kei ding hi," a ci hi.

¹⁶Ahi hangin Jeremiah tungah Kumpipa Zedekiah kiciam khina, "Eite huu hong guanpa TOPA nuntakna ka lo hi, nang hong that loin hong that nuamte tungah zong kong pia kei ding hi," a ci hi.

¹⁷Tua ciangin Jeremiah in Zedekiah kiangah, "Hih in Israel Pasian Thahatpen TOPA gen ahi hi: ‘Babylon kumpipa galkap mangte tungah na lut leh na nuntakna hong kihawisak dinga hih khuapi kihaltum loin nang le na innkuanpihte na nungta ding uh hi.

¹⁸Ahi hangin Babylon kumpipa galkap mangte tungah na lut kei leh Babylon mite tungah hih khuapi kipia dinga, amaute in haltumin, nang mahmah zong amaute khut panin na suakta kei ding hi,’ ci hi," a ci hi.

¹⁹Kumpipa Zedekiah in Jeremiah kiangah, "Babylon mite a beel Jew-te ka kihta hi, ahang in, Babylon mite in amaute tungah hong ap ding uh a, kei hong bawlsia ding uh hi," a ci hi.

²⁰"Hong ap peuhmah lo ding uh hi," Jeremiah in ci a, "Kong gen bangin TOPA thu mang in. Tua hileh nang adingin hoih dinga na nuntakna hong kihawisak ding hi.

²¹Ahi hangin na lut nop kei leh TOPA in kei tunga hong pulaak hih ahi hi:

²²Judah kumpipa kumpi inn a, a kinusia numeite khempeuh Babylon kumpipa uliante kiangah kipuak ding hi. Tua numeite in nang kiangah: " ‘Na muan na lawmte in hong makaih khial uh a - amaute in hong zo uh hi. Na khe buan lakah tumta a; na lawmte in hong taisan uh hi,’ hong ci ding uh hi.

²³"Na zite le na tate khempeuh Babylon mite tungah kipuak ta ding hi. Babylon kumpipa in nang hong zo in nang mahmah zong amaute khut panin na suakta kei ding hi; hih khuapi kihaltum ding a[85] hi," a ci hi.

²⁴Tua ciangin Zedekiah in Jeremiah kiangah, "Hih i kihona kuamah theisak kei in, na theihsak le na si thei ding hi.

²⁵Uliante in nang tawh i kiho lam hong zaka nang kiangah hong pai-in, ‘Kumpipa tungah nang bang gena aman nang tungah bang hong gen ahi hiam; ko tungah hong im kei in, nong ip leh kong that ding uh hi,’ hong cih uh leh

²⁶amaute tungah, ‘Kumpipa in Jonathan inn ah hong puak kika tua lai-ah ka sih loh nading a ngen ka hi hi,’ ci-in gen in," a ci hi.

²⁷Uliante khempeuh Jeremiah kiangah pai takpi uh a, thu a dong uh hi. Amah in amaute kiangah kumpipa in gen dinga a thupiak teng a gen hi. Tua ciangin amah le kumpipa kiho kuamah in za lo ahi manin bangmah a gen nawn kei uh hi.

²⁸Tuateh Jerusalem a kilak ni mateng a kicinna huang sungah Jeremiah a om den hi.