Read Zokam Jeremiah 4 Bible Online

Jeremiah 4 - Zokam bible

Jeremiah 4

¹"Israel aw, nong kileh kik leh, kei kiangah hong kileh in," TOPA in cikhia hi. "Ka muhna panin a kihhuai na milimte uh hemmang-in gammang nawn lo-a,

²thumaan thutang le a maan lampi ah tomlo in, "TOPA nuntakna ka lo hi" ci-a na kiciam nak uh leh tua ciangin amah in minamte thupha pia dinga amaute ama sungah a minthang ding uh hi," ci hi.

³TOPA in Judah mite le Jerusalem mite tungah a gen hih ahi hi: "Na lotulte uh kal unla linglakah vawh nawn kei un.

⁴No Judah mite le Jerusalem mite aw, TOPA tungah no le no vun ki-at unla, na lungtang vun uh at un, na tua cih kei uh leh na gitloh gamtatnasate uh hangin ka heh suakin mei bangin kuang dinga - kuama phelh theih lohin a kang ding hi.

⁵Judah ah zasak unla, Jerusalem ah tangko in: ‘Gamsung bupah pengkul va mut un! Nakpi in awng unla: ‘Na vekun kikaikhawm un! Kulh nei khuapite ah tai ni!’ ci un.

⁶Zion a pai nadingin dialkhai khai un! A suakta dingin manlangin tai un! Ahang in, leilu panin siatna hong tungsak a, a lauhuai siatna lianpi ahi hi," ci un.

⁷Humpinelkai khat a kua panin paikhia khin a, minamte a susiapa kuankhia khin hi. Na gam uh susia dingin, a omna mun nusia khin hi. Na khuapite uh kuamah teng loin kisiacip ding hi.

⁸Tua ahi ciangin ippi puansilh unla kapin taamlo un, ahang in, TOPA hehluatna eite tawh kipelh nai lo hi.

⁹"Tua ni ciangin kumpipa le a uliante in a cih nading uh thei loin, siampite lau mahmah ding uh a, kamsangte a lauthawng ding uh hi," TOPA in cikhia hi.

¹⁰Tua ciangin, "Ah, Thupipen TOPA aw, ka gawluah namsau kitah napi, ‘Lungnopna na ngah ding uh hi’ ci-in hih mite le Jerusalem-te khem cihtakin a khem na hi hi" ka ci hi.

¹¹Tua hun ciangin hih mite le Jerusalem a mite tungah, "Sehnel gama munsangte panin ka mite tungah

¹²huihsa mahmah khat nung dinga, ahi hangin ansi zaapna le siansakna ahi kei hi; kei a[12] kiang pana nung huih a khauh lua mahmah hi. Tu-in amaute tungah ka thukhenna ka zasak hi," kici ding hi.

¹³En un! Amah meii bangin hong kuankhia-a, a sakollengte pingpei bangin hong pai in, a sakolte, muvanlai sangin a manlang zaw uh hi. Gimna hong tung ei! A kisia hi ta hang ei!

¹⁴Jerusalem aw, na lungsim a gitlohna sawp inla, suakta in. Na gitlohna lungsimte bang tanvei kemcip lai ding na hi hiam?

¹⁵Thuzaksakna aw khat in, Dan panin Ephraim mualneute pana siatna a tang ko hi.

¹⁶"Hih thu minamte tungah gen inla, Jerusalem tungah tangko in: "Gamlapi panin a umcih ding galkap hong kuana, Judah khuapite langkhatah galphuangin a kiko uh hi.

¹⁷Tuanu in kei hong lehdo ahi manin, amaute in lo hon bangin a kimkotah mite a umcih uh hi.’ ci in," TOPA in cikhia hi.

¹⁸"Na gamtatna le na sepnate nang tungah hong tu ahi hi. Hih in na tuah ding dan ahi hi. Bang a ci khaat tazen tam! Na lungtang bang hong ci vutlet tam!" a ci hi.

¹⁹Lunggim si’ng! Lunggim lua si’ng! Lunggimin ka kilumlet hi. Oh, ka lungsim gim lua! Ka sungah ka lungtang kisai-a, ka om hithiat thei kei hi. Ahang in, pengkul aw ka za a; gal husa ka za hi.

²⁰Siatna nungah siatna in nungzuih a, gambuppi kisia ta hi. Tomkha kalin ka puanbukte kisia a, thakhatin ka kidalna a kisia hi.

²¹Galsimna bangtan vei mu lai-in pengkul aw bangtan vei ka za lai ding hiam?

²²"Ka mite hai uh a; kei hong thei lo uh hi. Amaute naupang thu thei lo hi uh a; theihtelna a nei kei uh hi. Amaute gitloh siam uh a, a hoih sep ding a thei kei uh hi," a ci hi.

²³Leitung ka en a, lim le meel nei loin a hawmpi hi a; tua teh vantungte ah khuavakte a om kei hi.

²⁴Mualliante ka en a, kiliing damdamin; mualneute a kivei kawikawi hi.

²⁵Ka en a, mi a om kei hi; vana vasa peuhmah lengmang khin uh hi.

²⁶Ka en a, logam hoihte kolhmang khin hi; TOPA mai, a hehluatna mai-ah a khuapi khempeuh kisia khin hi.

²⁷TOPA gen hih ahi hi: "Gambuppi kisia dinga, ahi zongin ka susia khin sam kei ding hi.

²⁸Tua ahi ciangin leitung thum dinga, tunga vante a mial ding hi; bang hang hiam cih leh ka gensa hi-a ka khiam kei ding hi; ka khensatsa ka dok kik kei ding hi," a ci hi.

²⁹Sakol-tuangte le thal tawite aw ging hangin khuapi peuhmah tai kek uh hi. Pawlkhatte gampha lakah lut uh a; pawlkhatte suangtum lakah kahto uh hi. Khuapi khempeuh hawm a; kuamah a teng kei hi.

³⁰A gamh khinpa aw, bang cih ding na hiam? Bang hangin puan ausan silhin khama kizem na hi hiam? Bang hangin na mitte zemin liapsak na hi hiam? Nang le nang a mawkna-a kizem na hi ta hi. Na lawmpate in hong ma ta uh a, hong thah sawm uh hi.

³¹Numei nausuak kuan kiko bang khat ka za a, a tacil suak dinga tau khat - Zion tanu husam liangin kiko a, a khutte zaakin, "Tazen aw! gim lua si’ng ei, ka nuntakna mithatpa tungah kipia ta hi," ci-a kiko khat ka za hi.