Read Zokam Jeremiah 40 Bible Online

Jeremiah 40 - Zokam bible

Jeremiah 40

¹Kumpi cing galkapmang Nebuzaradan in Jerusalem le Judah pana Babylon ah sal-a kikaite lakah sikkhainiang khihsa-a om Jeremiah a muh ciangin Ramah ah a khahkhia hi. Tua khitin Jeremiah tungah TOPA thu a tung hi.

²Kumpicingte ukpipa in tua banga Jeremiah a om a muh ciangin a kiangah, "Nangma Pasian TOPA in hih muna dingin hih siatna a tun ding a khentatsa ahi hi.

³Tuate tu-in TOPA in a tunsak hi a; hih dinga a gensa bang tektekin a tungsak zo hi. TOPA tungah no mite mawhin ama thu mang lo na hi manun hihte a piang ahi hi.

⁴Ahi hangin tuni-in na khutdawh kikhihna sikkhainiang panin kong khakkhia hi. Na ut leh Babylon ah kei hong zui inla nang kong kem ding hi; nong zuih nop kei leh, hong zui kei in. En in, na mai-ah gambuppi a om hi. Na utna peuhah pai in," a ci hi.

⁵Jeremiah in a pai f[90] nading mun a khentel ma-in Nebuzaradan in a pau zomlai-a, "Babylon kumpipa in Judah khuapite uk dinga a koih Shaphan tapa, Ahikam tapa Gedaliah kiangah kileh kik inla mite lakah amah tawh tengkhawm in; ahikeh na utna mun peuhpeuh ah pai in," a ci hi. Tua ciangin galkap mangpa in a nek ding guanin letsong khat pia-a a paisak hi.

⁶Tua ciangin Mizpah a Ahikam tapa Gedaliah kiangah Jeremiah pai-a amah tawh gam sunga kinusia mite lakah a tengkhawm uh hi.

⁷Gam sunga a omlai galkap mangte le a mite un, Babylon kumpipa in Ahikam tapa Gedaliah, tua gam ukpipa ding le tua gam sunga a zawng penpen, Babylon ah sal-a kikai lo nupi, papi, numei naupangte uk dingin a koih lam a theih uh ciangin

⁸Mizpah a Gedaliah kiangah - Nathaniah tapa Ishmael, Kareah tapate Johanan le Jonathan, Tanhumeth tapa Netopath-te Ephai tapa Seraiah, le Maacath mite tapa Jaazaniah a[91] le a mite uh a va pai uh hi.

⁹Shaphan tapa Ahikam tapa Gedaliah in tua mite le ama mite khamuanin a kiciam hi. Amah in, "Babylon mite b[92] nasem suah ding lau kei un. Gam sungah teng unla Babylon kumpipa na sem le uhcin no adingin hong hoih na ding hi.

¹⁰Kei ka hileh eite kianga hong pai Babylon mite mai-ah no tanga ding dingin Mizpah ah ka teng ding hi; ahi hangin note in zu, khuakhal singgah le sathaute kaikhawm unla na beelpi sung uhah kholin na laksa uh khuapite ah teng un," a ci hi.

¹¹Moab, Ammon, Edom le gamdanga om Jew-te khempeuh in Babylon kumpipa in Judah ah a baanglai nusiat nei-a amaute uk dingin Shaphan tapa Ahikam tapa Gedaliah ukpi-in koih hi cih thu a zak uh ciangin,

¹²amaute a kithehthangna uh gam khempeuh panin Judah gam Mizpah a Gedaliah kiangah a kileh kik uh hi. Tuateh zu le khuakhal singgah tampitak a kaikhawm uh hi.

¹³Kareah tapa Johanan le gam sunga om lai a galkap mangte khempeuh Mizpah a Gedaliah kiangah pai uh a,

¹⁴ama kiangah, "Ammon-te kumpipa Baalis in Nethaniah tapa Ishmael nang that dinga hong sawl lam thei lo na hi hiam?" a ci uh hi. Ahi hangin Ahikam tapa Gedaliah in amaute thugen a um kei hi.

¹⁵Tua ciangin Kareah tapa Johanan in Mizpah a om Gedaliah, amah kia a om laitakin hopih a, "Pai-in Nethaniah tapa Ishmael hong thatsak in, kuamah in hong thei lo ding hi. Bang hangin amah in nang hong thatin nang hong beel na kim na pama om Jew-te khempeuh kithehthangsakin Judah a, a baanglaite mangthangsak ding ahi hiam?" a ci hi.

¹⁶Ahi hangin Ahikam tapa Gedaliah in, Kareah tapa Johanan kiangah, "Tua bangin hih kei in’ Ishmael thu na genna man lo hi," a ci hi.