Read Zokam Jeremiah 42 Bible Online

Jeremiah 42 - Zokam bible

Jeremiah 42

¹Tua ciangin galkap mangte khempeuh, Kareah tapa Johanan le Hoshaiah tapa Jezaniah e[95] le mi khempeuh - aneupen pan a lianpen dongin

²kamsangpa Jeremiah kiang zuanin pai uh a ama kiangah, "Nong hehpihna-in kong ngetna uh hong za inla TOPA na Pasian tungah hih a baanglaite adingin thu hong ngetsak in. Ahang in, tu-a nong muh bangin hunkhat lai-in ka tam uh hangin tu-in tawmno bek ka om lai uh hi.

³TOPA na Pasian tungah koi lamah pai dinga bang sem ding ka hi uh hiam, hong gen nadingin thu hong ngetsak in," a ci uh hi.

⁴Kamsangpa Jeremiah in, "Kong za khin hi, nong ngetna uh bangin TOPA note Pasian tungah thu kong ngetsak taktak dinga; TOPA hong gen peuhmah no tungah hong gen kikin bangmah kong im kei ding hi," ci-in a dawng hi.

⁵Tua ciangin amaute in Jeremiah kiangah, "TOPA na Pasian in ko tungah nong gen dinga hong sawl peuhmah ka sep kei tak uh leh a thumaan le a muanhuai TOPA kote tungah teci hi ta hen.

⁶Nang kong sawlna uh TOPA eite Pasian thu, a hoihlam ahi a, a sialam ahi zongin kote hoih nadingin ka mang ding uh hi, ahang in, kote in TOPA eite Pasian thu ka mang ding uh hi," a ci uh hi.

⁷Tua nung ni sawm ciangin Jeremiah tungah TOPA thu a tung hi.

⁸Tua ciangin amah in Kareah tapa Johanan le amah tawh a om khawm galkap mangte khempeuh le a neupen pan alianpen dong mi khempeuh a kikhawmsak hi.

⁹Amah in amaute kiangah, "Hih in na deihna uh kong ngetsak nadinga nong sawl uh TOPA Israel Pasian thugen ahi hi:

¹⁰‘Hih gam ah na omsuak uh leh note hong phelkek loin kong lam dinga; hong botkhia loin kong suan ding hi, ahang in, note tungah siatna kong tunsak ka dah hi.

¹¹Tu laitaka na kihtak uh Babylon kumpipa kihta kei un. Keimah in note hong ompihin ama khut pan kong hu dinga hong hon ding ka hi manin amah kihta kei un, TOPA in cikhia hi.

¹²Amah in note hong khuatuahin na gam uah a ngei hong batsak kik nadingin keimah in note kong khuatuah ding hi,’ ci hi.

¹³"Ahi zongin note in, ‘Hih gamah ka tengsuak kei ding uh hi,’ na cih uh a, TOPA note Pasian thu mang loin,

¹⁴‘Ut kei ung, gal om lohna, pengkul gin zak lohna, gilkial lohna mun Egypt ah pai-in va teng nung,’ na cih uh leh

¹⁵a baanglai Judah-te aw, TOPA thugen za un. TOPA Israel Pasian thugen hih ahi hi: ‘Note Egypt ah na pai teitei uh a, tua lai-ah pai-in na va ten uh leh

¹⁶na kihtak uh namsau in tua lai-ah note hong that veve dinga na lau mahmah uh kialpi in Egypt ah hong nungzuihin tua lai-ah na si veve ding uh hi.

¹⁷Egypt ah pai teitei a, a tengte khempeuh namsau, kialpi le pulpi-in si ding uh a; amau tungah ka tunsak ding gimna panin kuamah a suakta kei ding uh hi,’ ci hi.

¹⁸Hih in TOPA Israel Pasian gen ahi hi: ‘Jerusalem a tengte tungah ka hehna le ka thangpaihna ka buakkhiat bangin Egypt ah na pai uh leh ka thangpaihna kong bua ding hi. Note hong kihamsiatin, hong kilipkhapin, bangmah a kimang lo mawhpaihna thuakte na hi ding uh a; hih mun na mu kik nawn kei ding uh hi,’ ci hi.

¹⁹"Judah mi a baanglaite aw, TOPA in, ‘Egypt ah pai kei un,’ hong ci zo hi. Note tuni-in kong vauhilh hi, Hih thu tel un:

²⁰sihna khop khialhna a[96] na bawl khin uh hi. TOPA na Pasian uh tungah thungena nong sawl lai-un, ‘TOPA eite Pasian tungah thu hong ngetsak inla ama hong gen khempeuh hong gen in; ka sem ding uh hi,’ na ci uh hi.

²¹Tu ni-in kong gen khin hi; ahi hangin TOPA note Pasian in no tunga hong gensak khempeuh na mang kei teitei uh hi.

²²Tua ahi ciangin tu-in hih thu tel un: Note pai-a na tun nopna uh munah namsau, kialpi le pulpi-in na si ding uh hi," a ci hi.