Read Zokam Jeremiah 5 Bible Online

Jeremiah 5 - Zokam bible

Jeremiah 5

¹Jerusalem kongzingte ah vaksuk vakto-in, en kawikawi-in ngaihsun kawm unla mun-awng teng zong un. Thumaana gamta, thutak a zong mi khat bek na muh uh leh hih khuapi mawhna ka maisak ding hi.

²Amaute in, ‘TOPA nuntakna ka lo hi,’ ci-in a kiciam uh hangin tu nangawnin a khialpi-a tomlo ahi uh hi.

³TOPA aw, na mitte in thutak zong hi lo ahi hiam? Amaute na sat hangin na sa lo uh a, na gawigawp hangin a kibawlpha nuam tuan kei uh hi. A maitang uh suang sangin sakzawsak uh a, a kisik nuam kei uh hi.

⁴Amaute in TOPA lampi thei loin amau Pasian deihna thei lo uh ahi manin a gina lo, a hai hi lel uh hi, ci-in ka ngaihsun hi.

⁵Tua ciangin a makaite uh kiangah pai-in ka hopih ding hi; amaute in TOPA lampi thei-in Pasian deihnate a thei takpi uh hi," ci-in ka ngaihsun hi. Ahi hangin amaute in kiciamna khat tawh hakkol sutanin, kikhihna khaute a sutat uh hi.

⁶Amaute hong lehdona lian lua-a, tam vei nungtolh mun lua ta uh ahi manin tulaka humpinelkai khat in amaute luh dinga, sehnel-gama keivom khat in susiagawpin a paikhia peuhpeuh a balzan dingin amau khuapi kiangah gialbem khat bokin a ngak ding hi.

⁷"Bang hangin na mawhna uh hong maisak ding ka hi hiam? Na tate un kei hong mangngilh khin uh a, pasian a hilo pasian tawh a kiciam uh hi. Amaute kisapna teng ka piak hi napi, amaute in angkawm teitei uh a, numei paktatte inn ah a honin a om uh hi.

⁸Amaute sakol tal gilvah, midangte’ zi a hamsan huthutte ahi uh hi.

⁹Hih thu hangin dan thuaksak lo ding ka hi hiam? TOPA in cikhia hi. "Keimah in tua bang minamte hih banga phu ka lak ding mah hilo ahi hiam?

¹⁰"Tuanu’ lenggui lote ah pai-in siasak inla ahi hangin susiamang sam kei in. Hih mite TOPA tawh kisai lo uh ahi manin tuanu’ hiangte heuhkhiatsak in.

¹¹Kei tungah Israel innkuante le Judah innkuante a muanhuai peuhmah kei uh hi," TOPA in cikhia hi.

¹²TOPA thu ah zuau phuak uh a, "Amah in, bangmah hih kei! Ei tungah bangmah natna hong tung kei inteh; namsau le kialpi tuak kei ni.

¹³Kamsangte lah huih bang hi lel uh a, amau sungah thu a teng kei hi; amau gente amau lutungah tu ta hen," ci uh hi.

¹⁴Tua ahi ciangin Thahatpen TOPA gen hih ahi hi: "Mite in hih bang ci khin uh ahi manin, ka thute na kam sungah mei ka suaksak dinga, singkhuah ahi hih mite a kangtum ding uh hi,

¹⁵Israel innkuante aw," TOPA in cikhia hi, "A gamla a minam khat - a kampau na theih loh uh tanglai mite, a thugen na tel zawh loh uh mite kong kuansak ding hi.

¹⁶Amaute thaltang bawm, han kihongsa bang hi a; amaute khempeuh a thahat galhang ahi uh hi.

¹⁷Amaute in na an laksate uh le na ante uh hong gaihsak ding uh a, na tanu na tapate uh hong gaihsakin, na tuuhon na ganhonte uh hong gaihsak ding uh a, na lenggahte uh le na theigahte uh hong gaihsak khin ding uh hi. Na muan uh kulh-a ki-um khuapi, namsau-in a susia ding uh hi.

¹⁸TOPA in kong cihinah, "Tua hi napi tua ni ciangin note kong susiamang khin kei ding hi.

¹⁹Tuateh mite in, ‘Bang hangin TOPA eite Pasian in hihte khempeuh sem ahi hiam?’ ci-a hong dot uh ciangin note in, ‘Note in kei hong taisanin na gamua midangte’ pasiante’ na nasep uh bangin tu-in no gam lopi-ah midangte na na sem ding uh hi, ci-in na gen ding uh hi,’ ci hi.

²⁰Hih thu Jacob innkuante tungah gen unla, Judah-te tungah tangko un:

²¹No mihai bangmah a ngaihsun thei lo mite; mit nei napi khua mu lote, bil nei napi khuaza lote aw, hih thu za un:

²²Kei hong kihta lo ding na hi uh hiam? TOPA in cikhia hi, "Ka mai-ah ling lo ding na hi uh hiam? Tuipi gamgi dingin sehnel ka bawl a, a kantan theih loh dingin, dai-a kimang den ding ahi hi. Tuihualte a kilok hangin phukhia zo lo uh a; a hawk uh hangin a kantan thei kei uh hi.

²³Ahi hangin hih mite lungkhauhin lehdo-nopna lungtang nei uh a; lampialin a paikhiamang uh hi.

²⁴Amaute in, "Tuk guah le sikhiau guahte a hunin hong zusaka, an lak huna an hong lasakpa, TOPA eite Pasian kihta ni,’ a kici kei uh hi.

²⁵Na sepsa uh khialhnate in hihte khaktan a; na mawhnate un a hoihte khaktan hi.

²⁶Ka mite lakah migilote om uh a, vasa thangsiah bangin mite thangsiahin man uh hi.

²⁷Vabawm ah vasa a dim bangin, amaute inn khemna tawh kidim a; amaute hau-in vanglian uh a,

²⁸thau-in a zol uh hi. Gitloh gamtatna ah a hun bek thei lo uh a; pa nei lote thu zawhpih dingin panpih loin, mizawngte thumaanna a hutpih kei uh hi.

²⁹Hih thu hangin dan tuaksak lo ding ka hi hiam?" TOPA in cikhia hi. "Keimah mah in tua bang minam’ hih bangin phu ka lak ding mah hi lo ahi hiam?

³⁰"Gam sungah a dipkuat huai, patauhhuaina piang khin hi:

³¹Kamsangte in zuauthu genin siampite in amau thuneihna bangin uk uh a, ka mite in hih bang nuamsa uh hi. Ahi hangin a tawpna hong tun ciangin bang na cih ding uh hiam?