Read Zokam Jeremiah 50 Bible Online

Jeremiah 50 - Zokam bible

Jeremiah 50

¹Hih in Babylon le Babylon mite b[119] gam tawh kisai kamsang-pa Jeremiah tungtawna TOPA thugen ahi hi:

²"Minamte lakah zasakin tangko unla, dialkhai khai-in bangmah im kei unla, ‘Babylon kila ta ding hi; Bel kimaizumsak dinga, Marduk laugawp ding hi. Tuanu’ milimte kimaizumsak dinga a pasian limte kilausak ding hi.,’ ci-in tangko un.

³Leilu-lam panin minam khat in tuanu sim dinga, ama gam gamlak a suak ding hi. A sungah kuamah teng loin; mite le ganhingte taikek khawm ding uh hi.

⁴"Tua ni tua hun ciangin Israel mite le Judah mite in khitui tawh TOPA amaute Pasian a zong khawm ding uh hi," TOPA in cikhia hi.

⁵Amaute in Zion lam nga-in tua lai zuatna lampi a dong ding uh hi. Amaute in a kimangngilh ngei lo ding tawntung thukhun tawh TOPA kiang zuanin kipawlkhawm ding uh hi.

⁶"Ka mite tuu kimansuah hi uh a, amau a cingte in lam khialhpihin mualtungah a vaksak kawikawi uh hi. Muallian mualneu tungah amaute vak kawikawi uh a, amau neihsa khawlmun a mangngilh uh hi.

⁷Amaute a mu peuh in nawmvalh uh a; a galte un, ‘Amaute a TOPA uh tung, a thumaan amau lonona tung le a pate uh lametna TOPA tungah mawh khin uh ahi manin, eite i khial kei hi,’ ci uh hi.

⁸"Babylon panin taikhia un; Babylon mite leitang nusia unla ganhon a makaih keelte bang un.

⁹Ahang in, keimah in leilu-lam gam panin minamte kipawlna lian mahmah khat Babylon sim dingin ka hanthawn ding hi. Amaute in, amaute langah panmun la ding uh a, leilu-lam panin tuanu kizo ding hi. A thaltangte uh a hawmciah lo galkap siamte tawh kibang ding uh hi.

¹⁰Tua ciangin Babylon-te a[120] kiluhgawp dinga a luhte khempeuh in a deih zahzah uh a la ding uh hi," TOPA in cikhia hi.

¹¹"Keima gouluah ding lawkgawpin lungnuamin kipakin, lonona khamin lungnuama kimawl bawngla le sakol tal ham hithit-te na bat uh hangin,

¹²nang hong senkhia na nu maizum mahmah in a zahlaak ding hi. Amah minamte lakah a neupen - gam simtham, keugaw-gam, sehnel-gam a suak ding hi.

¹³TOPA hehna hangin ama sungah kuamah teng loin kinusiacip ding hi. Babylon a tawnkha khempeuh in ama liamma khempeuh hangin lipkhapin a phitsan ding uh hi.

¹⁴"No thal kekte khempeuh aw, Babylon kimkotah panmun la un. TOPA tungah tuanu mawh khin ahi manin amah kap un! Thaltangte sit kei un.

¹⁵Apang ciat panin otsan tek un! Ama tausangte puka, a kulhte kiphel khinin amah a galte tungah lutta hi. Hih in TOPA phulakna ahi manin ama tungah phu la unla; amah in midangte tungah a hih bangin ama tungah hih un.

¹⁶Babylon panin khaici tuhte le an late a phiaukawi in satkhia un. Mi nengniamte namsau hangin mi khempeuh amau mipih kiangah ciahsak unla, amau gam ciatah taisak un.

¹⁷"Israel ahileh humpinelkaite in a delhmang, a kithehthang tuuhon ahi hi. A masapena amaute a valh Assyria kumpipa hi a; a nunung pena a guhte uh a teeptum Babylon kumpipa Nebuchadnezzar ahi hi," a ci hi.

¹⁸Tua ahi ciangin Israel Pasian, Thahatpen TOPA gen hih ahi hi: "Keimah in Assyria kumpipa dan ka tuahsak bangin Babylon kumpipa le ama gam dan ka tuaksak ding hi.

¹⁹Ahi hangin Israel ama neihsa lonona ah ka puak kik dinga, amah Carmel le Bashan ah a gamta ding hi; Ephraim le Gilead mualte tungah a kham phitphet dongun a ne ding uh hi.

²⁰Tua ni le tua hun ciangin ka hawi lai, a baanglaite a mawhna uh maisak ta ding ka hi manin Israel mawhna a kizon hangin bangmah kimu lo dinga, Judah mawhnate a kizon hangin bangmah a kimu kei ding hi. TOPA in cikhia hi.

²¹"Merathaim gam le Pekod a tengte sim un. Nungdelh unla, thatin amaute susiamang b[121] un, " TOPA in cikhia hi. "Kong sawl peuhmah hih un.

²²Gam sungah gal husa le siatna lianpi husa a om hi!

²³Leitung buppi’ sekpi kitamin naksiat zo si e! Minamte lakah Babylon hawmmang zo na lawmlawm e!

²⁴Babylon aw, thang kong siah a, na theih ma-in na awk hi; TOPA langbawl na hi manin nang hong kimu-in hong kiman hi.

²⁵Babylon mite gamah Thahatpen TOPA Thupipen in sep ding nei ahi manin, TOPA in galhiam senna in nei khin-a a thangpaihna galhiamte a lakhia khin hi.

²⁶Ama langa pang dingin a gamla panin hong kuan un. Tuanu saalte phelkek unla; anhum lompi bangin tuanu ciang un. Tuanu susia kiuhkeuh unla a baanglai bangmah nusia kei un.

²⁷Ama bawngtalnote khempeuh that unla; a go dingte kiangah paisuksak un! Amaute in gimna thuak ta hen! Ahang in, amaute dan thuak ding, ani le ahun tung ta hi.

²⁸TOPA eite Pasian in a phulaknasa - a biakinnpi hanga a phulakna Zion ah gen dingin Babylon gama tai, galtaite thugen ngai dih un.

²⁹"Babylon sim dingin thal tawi thei khempeuh khawm un. A kimkot ah giahphual sat unla; khat beek suaktasak kei un. Ama gamtatnasa ama tungah thuk kik unla; ama sepsa bangin ama tungah sem un. Ahang in, amah in TOPA Israel Siangtho Pa a simmawh hi.

³⁰Tua ahi ciangin a tangvalte lam lian dungah puk ding uh a, tua ni ciangin a galkapte khempeuh a kidaicipsak ta ding hi," TOPA in cikhia hi.

³¹"A kiphasaknu aw, en in na dan tuah ding ani ahun tungta ahi manin na langkhat ah kei ka pang hi," Topa Thahatpen TOPA in cikhia hi.

³²A kiphasak tuanu muktu-in tuk dinga, khat beek in a phong kei ding hi; a khuapite mei-in ka hal dinga, tuanu kimkota a umte a hultum ding hi," a ci hi.

³³Thahatpen TOPA gen hih ahi hi: "Israel mite kinengniam a, Judah mite zong tua mah bang ahi hi. Amaute sal-a a kaite khempeuh in lencip bikbek uh a, khah nuam lo uh hi.

³⁴Tua hi napi amaute Tanpa lah thahat a; ama min Thahatpen TOPA ahi hi. Amah in amaute gamah tawlngakna a tut nadingin amaute thu nakpitakin panpih dinga, ahi hangin Babylon a tengte a buai den ding uh hi.

³⁵"Babylon mite langkhat, Babylon a tengte langkhat, le ama uliante le a mipilte’ langkhatah namsau khat a pang hi!" TOPA in cikhia hi.

³⁶A kamsang zuaute langkhat ah, namsau khat a pang hi! Amaute mihai a suak ding uh hi. Ama galhangte langah namsau khat a pang hi. Amaute lau mahmah ding uh hi.

³⁷A sakolte, a sakollengte le a gamdang mi zaliante khempeuh langah namsau khat a pang hi! Amaute numei a suak ding uh hi. A goukholna langah namsau khat a pang hi! Tuate a kipuak khiatsak ding hi.

³⁸Ama tuite tungah a[122] guahtui kihaang hi! Amaute a keucip ding uh hi. Ahang in, lau lua-a milimte a hailawh ding, milimte gam khat ahi hi.

³⁹Tua ahi ciangin tua lai-ah sehnel-gam ganhingte le gam-uite teng dinga, tua lai-ah simbute a giak ding uh hi. Khang khat pan khang khat dongin mi a teng kik ngei nawn kei ding hi.

⁴⁰Sodom le Gomorrah le a veng khuapite Pasian in a lotthal bangin tua lai-ah a teng a giak kuamah a om nawn kei ding hi," TOPA in cikhia hi.

⁴¹En un! Leilu-lam panin galkap hon khat hong kuan a, gam lianpi khat le leimongte panin kumpi tampi a kithawi uh hi.

⁴²Thal le teipite tawh kithawi uh a, amaute giloin kuamah a lainat kei uh hi. Amaute sakol tungah tuang uh a, a huging uh tuipi hawk a bang hi; amaute gal kap dinga kithawisa mi bangin hong kuan uh a, Babylon Tanu aw, nang hong do ding uh ahi hi.

⁴³Babylon kumpipa in amaute thu za a, a cih nading a thei kei hi. Lunggimna in amah gakcip a, numei nau suak ding bangin na a sa hi.

⁴⁴Jordan gam pha lak panin lono hoihna muna paito humpinelkai tawh kibangin a gam panin Babylon thakhatin ka delhkhia ding hi. Hih huna nasem dingin kua ka teel ding hiam? Kei tawh kibang kua om a, kei hong to ngam ding kua om ahi hiam? Kei langah bang tuucingpa ding ngam ding ahi hiam?" a ci hi.

⁴⁵Tua ahi ciangin TOPA in Babylon tunga tunsak dingin a geelsa le Babylon mite tunga tunsak dinga a sawmsate za un. A ganhon note uh kikaihmangsak dinga; amaute hangin a lonona uh kisusiamang ding hi.

⁴⁶Babylon a kilakna husa in, leitung lingsak dinga, a kahna aw in minamte lak a thawn ding hi.