Read Zokam Jeremiah 51 Bible Online

Jeremiah 51 - Zokam bible

Jeremiah 51

¹Hih in TOPA gen ahi hi: "En un, keimah in Babylon le Leb Kamai a[123] mite langkhatah a susiate lungsim ka phonglo ding hi.

²Keimah in Babylon a hahsiang ding le a gamsung a vatmai dingin gamdang mite ka sawl dinga ama gim thuak ni-in amaute in a munmun panin a langpan ding uh hi.

³Thal tawite a thal kamsak kei unla, a galvan uh tawh zong kithuamsak kei un. A tangvalte uh zong hawi kei unla, ama galkapte susiamang b[124] khin un.

⁴Babylon c[125] ah amaute kithatin puk ding uh a, ama kongzingte ah liamgawp ding uh hi.

⁵Ahang in, Israel-te Siangtho Pa mai-ah, Israel gam le Judah gam khialhna tawh a kidim hangin amaute Pasian Thahatpen TOPA in amaute gam d[126] a taisan tuan kei hi.

⁶"Babylon pan taikhia un! Na nuntakna uh hu-in tai un! Ama mawhnate hangin kisusiasak kei un. TOPA phulak hun hi a, ama thuak ding a kilawm bangin a thuk kik ding hi.

⁷TOPA khut sungah Babylon kham hai khat hi a; tuanu in leitung buppi zu a khamsak hi. Minamte in ama zu dawn uh a; tua hangin tu-in mihai suak khin uh hi.

⁸Thakhatin Babylon puk dinga, a kisiagawp ding hi. Amah kah un! Amah dam thei lai kha ding hi; a natna nuh ding zatui laksak un.

⁹" ‘Babylon i damsak nop hangin kidamsak thei lo hi; ama tunga thukhenna in vante bana, meiite bangin sangkah to ahi manin amah nusia-in i gam ciatah ciah ni.

¹⁰"‘ TOPA in eite hong diksak khin hi; pai un, TOPA eite Pasian sepsa, Zion ah va gen ni,’ ci uh hi.

¹¹"Thaltangte hiam unla lumte tawi un! TOPA in Babylon suksiat sawm ahi manin Medes kumpite hanthawn hi. TOPA in phu la-in, a biakinnpi phu a la ding hi.

¹²Babylon kulhte langah dialkhai khat khai un! A cingte behlapin a buksim ding kithawi un! TOPA in Babylon mite tungah tunsak dinga a khensatte tungsak ta ding hi.

¹³No tui tamna gei-a teng gou haute aw, na hun uh kibeisak ta a, a tawpna na tungta uh hi.

¹⁴Thahatpen TOPA amah le amah kiciama: Keimah in kauphe honpi bangin mihing tawh nang kong dim taktak dinga, nang tungah gualzo-in a awng ding uh hi.

¹⁵"Amah in a vang tawh leitung bawla; ama pilna tawh lei pumpi omkhiasakin, ama theihtelna tawh vante a zalhkhia hi.

¹⁶Van a ginsak ciangin vante a tuite hawk uh a; leitung mongte panin tuite kahtosak hi. Amah in khuaphia le guah sawlkhawm a, a vankholna inn panin huih a puakkhia hi.

¹⁷Mihing peuhmah ngaihsutna nei lo le theihna nei lo hi a; kham seekte peuhmah a milim bawlte hangin a maizum ding uh hi. Ama milim sunte lah zuaupi hi a; a sungah huu a nei kei hi.

¹⁸Tuate in man nei lo a, ciamnuihna-in kinei lel hi; amaute tungah thukhenna a tun ciangin a mangthang ding uh hi.

¹⁹Jacob Tanh tuate abang kei hi; ahang in, amah na khempeuh le ama bawng’te a Bawlpa - a min Thahatpen TOPA ahi hi.

²⁰"Nang, galsim nading ka gal khetbuk na hi a - nangin minamte ka thehzak a, nangin kumpi-gamte ka susia a,

²¹nangin sakolte le a tunga tuangte thehzakin, nangin sakollengte le a hawlte ka thehzak a,

²²nangin numei pasal ka thehzak hi, nangin amoi aham ka thehzaka, nangin nungak tangval thehzakin,

²³nangin tuucingpa le tuuhon ka thehzak hi, nangin lokhopa le bawngtalte ka thehzaka, nangin ukpite le uliante ka thehzak hi.

²⁴Zion tunga a bawl uh mawhnate khempeuh hangin Babylon le Babylon a tengte e[127] khempeuh tungah nangma mitmuhin ka thuk ding hi," TOPA in cikhia hi.

²⁵"A susia mualpi aw, leitung buppi a susiapa aw, nang langkhatah kei ka pang hi," TOPA in cikhia hi. "Nang langkhatah ka khut ka zan dinga, keen ah hong khukkhia-in mual kangtum kong suaksak ding hi.

²⁶Nang hong kinusiacip ding ahi manin nang tung panin innkiu suang dingin suang kila lo dinga, innbul suangphah dingin suang khatpeuh zong a kila tuan kei ding hi," TOPA in cikhia hi.

²⁷"Tua gam ah dialkhai khaito un! Minamte lakah pengkul mut un! Tuanu sim dingin minamte kithawi uh henla; amah sim Ararat, Minni le Ashkenaz kumpi-gamte kaikhawm uh hen. Tuanu sim dingin a makai ding seh uh henla; kauphe honpi khat bangin sakolte sawlto un.

²⁸Amah a sim dingin minamte - Medes kumpite, a ukpite uh le a uliante uh, le ama ukna gam khempeuh kithawisak un.

²⁹Babylon tungah TOPA ngimna tung ahi manin a gam kilingin kinuaigawp a - tua lai-ah kuamah a ten nawn loh nadingin Babylon gam, gam simtham a suak hi.

³⁰Babylon galhangte in do nawn lo uh a; amau kulh muanhuai sungah a ommawk uh hi. Amaute hatna hawm ta a; numei abang uh hi. Ama tenna mei-in kihal a; a kongpi kalhna zawlte a kitan khin hi.

³¹Thukote kimatin tunga, thupuakte tung thithe-in - Babylon kumpipa kiangah khuapi khempeuh kila khin phial hi;

³²gun ngahmun teng kila khina, zang phailak teng kihaltumin galkapte patau ta uh hi," ci-in thu a zasak thithe uh hi.

³³Hih in Israel Pasian Thahatpen TOPA gen ahi hi: "Babylon tanu ancil huna an cilna mun tawh kibang a; amah anlak-a a kilak ding hun tungpah ding hi," ci hi.

³⁴Babylon kumpipa Nebuchadnezzar in eite hong nawmvalh a, eite hong lawnthalin, leibeel hawm hong suaksak hi. Gulpi bangin eite hong valhin, eite limna-in gil vah a, tua ciangin hong ikkhia kik hi.

³⁵Eite satak a[128] tunga hong kingongtatna Babylon-te tungah tu ta hen," Zion a tengte in ci uh hi. "Eite sisan Babylon-te tungah tu ta hen," Jerusalem in ci hi.

³⁶Tua ahi ciangin hih in TOPA gen ahi hi: "En un, note thu ah kong hu dinga, na phu uh kong laksak ding hi; ama tuipi ka kangcipsak dinga’ a ciktuite ka keusak ding hi.

³⁷Babylon, van kisia lompi suak dinga, se-alte zualna mun suakin kuama tenlohna mun, a kilipkhap le a kiphitsan mun a suak ding hi.

³⁸A mite khempeuh humpinelkai khanglai bangin hawk ding uh a, humpi no bangin a ngik ding uh hi.

³⁹Ahi hangin amaute a thawh laitakun mu-a a awt nadingun amaute ading pawi bawlsakin - zu ka khamsak dinga, tua ciangin amaute ihmu denin a khanglo nawn kei ding uh hi," TOPA in cikhia hi.

⁴⁰"A kigo ding tuunote, tuutalte le keeltalte bangin amaute kipaipih suk ding hi.

⁴¹"Bangci banga Sheshack b[129] kila-in, leitung buppi kisaktheihna kiman mawk ahi hiam! Minamte lakah Babylon kilipkhap na’ncia!

⁴²Tuipi in Babylon tuum dinga, a tuihual hawkte in amah a khuh ding hi.

⁴³A khuapite kinusiacip dinga, gamkeu a kitaisan gam suakin, kuama ten lohna gam suak dinga a kantanin kuamah khual a zin kei ding hi.

⁴⁴Babylon sunga om Bel, an ka suaksak dinga, a valhsate ka ikkhiasak kik ding hi. Ama tungah minamte lui-in a luang nawn kei ding uh hi. Tuateh Babylon kulh a puk ding hi.

⁴⁵"Ka mite aw, ama sung panin paikhia un! Na nuntak nadingun tai un! TOPA hehluatna panin taikhia un.

⁴⁶Gamsung ah kamlengsawn na zak uh ciangin lungkia kei unla lau kei un; tu kumin kamlengsawn khat kigenin, nikum ciang adang khat kigen dinga, gamsungah ngongtatna le gam-uk khat le gam-uk khat kidona kamlengsawn kiza ding hi.

⁴⁷Ahang in, Babylon milimte dan ka tuahsak ding hun hong tung taktak ding hi; a gambup ka zahlaaksak dinga, a kithatte khempeuh ama sungah a puk ding uh hi.

⁴⁸Tua ciangin leilu-lam panin amah sim dingte hong kuankhia ding uh ahi manin leitung, vantung le a sunga omte khempeuh in lungdamin Babylon a otkhai ding uh hi," TOPA in cikhia hi.

⁴⁹"Babylon hangin gam khempeuh ah mi kithatin a puk bang tektekin Israel thahna hangin Babylon a puk pelmawh ding hi.

⁵⁰No, namsau pana suaktate aw, dingding nawn loin paisan pak un! Gamlapi a om TOPA phawk unla Jerusalem ngaihsunsun un.

⁵¹"Eite hong kisimmawh a, zahlaak i hi manin i maitang maizumna in a tuam hi, bang hang hiam cih leh TOPA inn-a mun siangthote ah gamdang mite lut uh hi."

⁵²TOPA in cikhia hi: "Ahi hangin tuanu milimte dan ka thuaksak hun hong tun ciangin a gamsung khempeuh ah a liamte a tau ding uh hi.

⁵³Babylon in van aban zawzen galdalna sangpi a bawl zongin amah susia ding mi ka kuansak veve ding hi," TOPA in cikhia hi.

⁵⁴"Babylon panin kikona aw khat a ging hi, Babylon mite a[130] pana siatna lianpi awging ahi hi.

⁵⁵TOPA in Babylon susia dinga; ama gamlum henhanna a daisak ding hi. Tuilianpite bangin gal-tuihual ging zuahzuah dinga; amau hawkna aw a kithawn kik ding hi.

⁵⁶Babylon susia dingte hong kuan ding uh a; ama galhangte kimanin a thalpeute uh kikuaitan ding hi. Ahang in, dan a thuaksak TOPA in Pasian hi-a, a cingin a thukkik ding hi.

⁵⁷Keimah in a uliante le a mipilte zu ka khamsak dinga, a gam-ukte a galkap mangte le galhangte zong tuamah bangin ka bawl ding hi; amaute lumden ding uh a, a khanglo nawn kei ding uh hi," Kumpipa, a min Thahatpen TOPA in cikhia hi.

⁵⁸Hih in Thahatpen TOPA gen ahi hi: "Babylon kulh sahpi lei tawh cinin ciim dinga ama kongpi sangpite mei tawh kihalin, a mite bangmah loin thahawm ding uh a, a minamte gimna mei-a khul ding bek a suak uh hi," a ci hi.

⁵⁹Hih in Judah kumpipa Zedekiah aman zawh a kum lina kum, Babylon ah a pai lai-ua, Mahseiah tapa Neriah tapa zum nasem ukpipa Seraiah tungah Jeremiah in a piak thupuak ahi hi.

⁶⁰Babylon tunga tung ding siatna khempeuh - Babylon tawh kisai-a kiciamtehsa thu khempeuh Jeremiah in laizial khatin a gelh khin hi.

⁶¹Amah in Seraiah tungah, "Babylon na tun ciangin hih thute khempeuh na sim ding thei in.

⁶²Tua ciangin,’ TOPA aw, mihing le ganhing ten loh nadingin hih mun ka susia ding hi, na ci hi; a kinusia den ding hi ta hi,’ ci in.

⁶³Hih laizial na sim khit ciangin suang khat tawh henkhawm inla Euphrates sungah lawn in.

⁶⁴Tua ciangin a tunga ka tunsak ding gimnate hangin a tho kik nawn lo dingin hih bangin Babylon a tum ding hi. Tuateh a mite a puk ding uh hi,’ ci in," a ci hi. Jeremiah kammalte hih ciang ahi hi.