Read Zokam Jeremiah 6 Bible Online

Jeremiah 6 - Zokam bible

Jeremiah 6

¹Benjamin mite aw, na suahtak nadingun tai un! Jerusalem taisan un! Tekoa ah pengkul mut un! Beth Hakkerem tungah dialkhai khai un! Ahang in, leilu-lam panin gimna hu lianpi le a lauhuai suksiatna hong kuankhia hi.

²A melhoih mahmah a ngek ngi-ingei Zion Tanu ka susia ding hi.

³Tuanu langah tuucingte a tuuhonte uh tawh pang uh a; a kimkotah a puanbuk uh lamin, amau neihsa ciat a cing ding uh hi," a ci hi.

⁴"Tuanu do dingin kithawi un! Ding un sun laitakin va sim un! Ahi hangin alasai, khua khingta a, nitak niliap saupi liap keii ta hi.

⁵Tua ahi ciangin ding un, va zan simin a kulh muanhuaite uh va susia ni! " ci ding uh hi.

⁶Thahatpen TOPA gen hih ahi hi: "Sing phuk unla Jerusalem sim nadingin phungin ciang un. Hih khuapi netniamna tawh kidim hi; dan kituaksak pelmawh ding hi.

⁷Tuikhuk panin tui a phulkhiat bangin tuanu sung panin gitlohna a phulkhia hi. Tuanu sungah ngongtatna le siatna kiza den a, a cinatna le a liammate ka mu den hi.

⁸Jerusalem aw, kidawm in, na kidop kei leh nang kong kiheisan dinga, kuama ten loh nadingin na gam ka hawmsak ding hi," a ci hi.

⁹Thahatpen TOPA gen hih ahi hi: Israel a baanglaite lenggah lawh bangin lokhia kiuhkeuh unla; mi khat in lenggah a kaihkhop bangin a hiangte tungah na khut uh van kik un," hong ci hi.

¹⁰Kua hopih in vauhilh thei ding ka hi hiam? Kua in ka thu ngai ding hiam? A zak theih loh nadingun a bilte uh a bing a[13] hi. Amaute tungah TOPA kammal zak thadahhuai-a, nuam a sa kei uh hi.

¹¹Ahi hangin TOPA thangpaihna tawh ka kidim a, ka thuak zo nawn kei hi. "Lamdunga naupangte tung le a kikaikhawm khangnote tungah ka hehna ka sungkhia hi; zite le pasalte pitek luate le putek luate tawh kiman khawm ding hi.

¹²Tua gama teng mite tungah ka khut ka zankhiat ciangin a inn a lote uh le a zite uh midangte tungah kipia ding hi." TOPA in cikhia hi.

¹³"Aneupen pan alianpen dong a vekpi-un met nading ah huaiham uh a; kamsangte le siampite in a vekun a kibangin zuau a phuak uh hi.

¹⁴Amaute in ka mite liamma a nasia lo bangin tunsak uh a, kilemna om nai lopi, ‘Kilemna, kilemna,’ a ci uh hi.

¹⁵A muhthadahhuai-a a gamtatna uh maizum beek lo uh ahi hiam? Neukha zong maizum lo uh a, kisuannazia ding nangawn a thei kei uh hi. Tua ciangin a puksate lakah puk uh a, amaute dan ka thuaksak ciangin a kilawnsuk ding hi," TOPA in a ci hi.

¹⁶TOPA thugen hih ahi hi: "Lamkabomte ah dingin en unla, tanglai lampite dong un, lam hoih koi pen hiam cih dongin tawnpah un, tua ciangin na hinna un tawldamna a mu ding hi. Ahi hangin, ‘Tua lampi tawn dah ni," na ci uh hi.

¹⁷Note hong vil ding mi ka koih a, ‘Pengkul aw ngai un!’ ka ci hi. Ahi hangin, ‘Ka ngai kei ding uh hi,’ na ci uh hi.

¹⁸Tua ahi ciangin minamte aw, za un; tecite aw, amau tungah bang piang ding hiam, thei un.

¹⁹Leitung aw, za in; keimah in amaute sawmna gah ahi siatna, hih mite tungah ka puak ding hi, bang hang hiam cih leh amaute in ka thute ngai loin ka thukham a nial uh hi.

²⁰Bang dingin Sheba pana gimnamtui le gamlapi pana sing namtui thusim ding ka hi hiam? Na meihal biaknate uh kisang thei lo a, nong biakpiaknate un kei hong lungkimsak kei hi," hong ci hi.

²¹Tua ahi ciangin TOPA gen hih ahi hi: "Hih mite mai-ah a maikhak ka koih ding hi. Tuate tungah pate le tapate a kibangin kimuktu ding uh a; vengte le lawmte a mangthang ding uh hi," a ci hi.

²²TOPA gen hih ahi hi: "En un, leilu-lam panin galkap kuan khat hong kuan uh a; leimongte panin minam lian khat kithawithawi ta hi.

²³Amaute in thal le teipi tawi uh a; gilo-in kuamah a lainat kei uh hi. Amaute sakol tungah tuang uh a, a huging uh tuipi hawk bang hi; Zion tanu aw, amaute nang hong sim dingin galkapte banga hong kuan uh ahi hi," ci hi.

²⁴Amaute thu i za khin a, bangmah i cih thei kei hi. Lungkhamna in eite hong lencip a, numei nau suak ding bangin na hi.

²⁵Galte in namsau tawi uh a, i kimkot lauhuai ahi manin gamlakah vakkhia kei unla, lampi zong tawn dah un.

²⁶Ka mite aw, ippi puan silh unla vut lakah kikhuk un; i tungah thakhatin siatna hong tung ding ahi manin tapa neihsun kah bangin thum unla kah cihtakin kap un.

²⁷Amaute na etcian theih nading le a lampi uh na zia-et theih nadingin ettelna sik vanin nang kong bawla, ka mite siksuangin ka bawl hi.

²⁸Amaute a vekun a lehdo tentante hi uh a, mi gensia-in a vak kawikawi uh hi. Amaute sumngo le sik hi uh a, a vekun a sia-in a gamta uh hi.

²⁹A haknawte a tuikhia dingin, pumin mei-ah a kizaap hangin a kisiangsak zo kei hi; a gilote a kizaapkhia zo kei hi.

³⁰Amaute a kinial ngun kici hi, bang hang hiam cih leh TOPA in amaute a nial hi," a ci hi.