Read Zokam Tamlawhna 1 Bible Online

Tamlawhna 1 - Zokam bible

Tamlawhna 1

¹a[1]Hun khat lai-a mi a dimna khuapi nak daih na lawmlawm e! Minamte laka a lian mahmah sa, meigongnu lah abang tazen a! Gam tuamtuamte kumpinu tu-in sila suak ta hi.

²Zan ciangin nakpi in kap a, a biang tuakah khitui a luang hi. Ama itte khempeuh lakah a hehnem ding khat beek a om kei hi. A lawmte khempeuh in lehhek uh a, a gal suak uh hi.

³Haksapi-in na sem a, a kibawlsiat khit ciangin Judah salin kikai hi. Tuanu minamte lakah tengin khawl nading mun a mu kei hi. A lungdon laitakin amah a delhte in pha uh a, a cih nading a thei kei hi.

⁴A kisehsa pawite sim dingin kuamah kuan nawn lo ahi manin Zion zuatna lampite thum uh hi. A kongpite khempeuh uh kitawn nawn lo a, a siampite thum ngaungau in a nungakte dah lua uh a, amah in gimna nak pi-in a thuak hi.

⁵Amah a langpangte ama tote suak ta uh hi; ama galte tawlnga ta uh hi. A mawhna tampite hangin TOPA in gentheihna a thuaksak ahi hi. Ama tate, a galte in galmat salin kaita uh hi.

⁶Zion Tanu thupina khempeuh mangthang ta hi. A kumpite, lonona a mu zolo sazuk, a delhte mai-ah hat lo pipi a tai tawh kibang uh hi.

⁷A gimthuak ni le a haksat ni-in Jerusalem in tanglai-a a goute khempeuh a phawk kik hi. A galte khut sungah a mite a tun ciangin amah a huh ding khat beek a om kei hi. A galte in en uh a, a kisiatna a nuihsan uh hi.

⁸Jerusalem in mawhna lian bawl ahi manin a siang lo a suak hi. Amah guaktangin om a, thumin lehngat ahi manin amah a pahtawite khempeuh in a simmawh hi.

⁹Ama nin a nik tungah baang a, a mailam thu ding a ngaisun kei hi. Kinak siat lua mahmah ahi manin a hehnem ding khat beek a om kei hi. "TOPA aw, hong kibawlsiatna hong en in, galte in hong zo gawp uh hi,"

¹⁰Ama goute khempeuh tungah galte in a khut uh a nga uh hi; lawki minamte, a munsiangtho sung - na mite lut nadinga na phal lohna ah a lut uh hi.

¹¹A mite khempeuh in thum kawmkawmin anlum zong uh a, a nuntak nadingun a goute uh tawh an a khek uh hi. "TOPA aw, hong en in, hong kisimmawhnate hong ngaihsutsak in,"

¹²Hong tawnkha khempeuh aw, no adingin bangmah hilo ka hi hiam? En kawikawi unla mu un. TOPA in a hehluat laitak a kei hong bawlsiatna ka thuak bang thuakna a om ngei hiam?

¹³"A sanna panin mei hong sawl a, ka guh te sung a ban hi. Amah in lenthang hong siah a, hong kileh heisan hi. Kei hong pampaih a, ni tawntungin lungsim bei-in kei hong koih hi.

¹⁴"Ka mawhnate hakkol a khatah henkhawmin, a khutin tuate a phekkhawm hi. Ka ngawng zangah hong kisuan a, Topa in ka hatna a kiamsak hi. Amah in ka nan zawh lohte tungah kei hong pia ta hi.

¹⁵"Topa in ka sunga ka galhang khempeuh a nial hi; ka khangnote a siasak dingin b kei langah galkap a kaikhawm zo hi. Topa in a lenggah sukna-ah Judah Tanu Bit a tuancil khin hi.

¹⁶"Hih thu hanga kap ka hi a, ka mitah khitui a dimlet hi. Kei hong hehnem ding le ka lung hong nuamsak ding kuamah a om kei hi. Gal in hong zo khin ahi manin ka tate hawmsuak ta uh hi."

¹⁷Zion in a khut vanvan napi a hehnem ding kuamah a om kei hi. TOPA in Jacob thu a piaksa hi a, ama vengte a gal suakin amaute lakah Jerusalem a sianglo na a suak hi.

¹⁸"TOPA thumaan napi a thupiak ka langdo hi. No mihingte khempeuh in ngai un, ka thuakna hong en un. Ka nungaknote le ka tangvalnote salin kikai khin ta hi.

¹⁹"Ka pawlte ka sap hangin kei hong lehhek uh hi. Ka siampite le ka upate khuapi sunga a nuntak nading uh an a zonna lam uah a mangthang uh hi.

²⁰"TOPA aw, hong en dih in, ka lung dong lua mahmah hi! Hong nak langpan lua ka hi manin ka lunggim lua ta a, ka lungsim a kisia hi. A pualam ah namsau-a kithahna hi a, a sunglam ah lah sihna bekbek ahi hi.

²¹"Mite in ka thumna za napi kei hong hehnem ding khat beek a om kei hi. Ka galte khempeuh in ka lungdon lam a za khin uh hi; na sepsate hangin amaute lungnuam uh hi. amaute keimah a bat theih nadingun na genkhiatsa ni hong tungsak in.

²²"Amau gitlohnate na mai-ah kilangsak in; ka mawhnate khempeuh hanga kei tunga nong bawl bangin amaute tungah bawl in. Tamveipi ka humham a, ka lunggim lua ta hi.