Read Zokam Tamlawhna 2 Bible Online

Tamlawhna 2 - Zokam bible

Tamlawhna 2

¹cTopa in Zion Tanu a hehna meiipi in tuam tah! d Amah in Israel’ thupina van pan leitung a denna suk hi; a heh ni-in a khengakna a phawkkha kei hi.

²Topa in hehpih het loin Jacob tenna khempeuh nawmvalh a, Judah Tanu mun muanhuaite a thangpaihna-in a su ciim khin hi. Amah in tuanu a kumpi-gam le a kumpite leilak denna in a mindaisak hi.

³Heh mahmah a, Israel’ ki e khempeuh a attan hi. A sim dinga kuan galte a nai ciangin a khut a dokkik hi. Amah in meikuang bangin Jacob hal a, tua in a kima om na khempeuh a hultum hi.

⁴Amah in gal bangin a thal kek a, a khut taklam kigingsa-in a om hi. Gal bangin a mit-a amuh thahhuai khempeuh a that hi; Zion Tanu’ puanbuk tungah a thangpaihna mei bangin a sung hi.

⁵Topa in gal bangin Israel a nawmvalh hi. Amah in kumpi inn khempeuh nawmvalhin a munmuanhuaite a susia hi. Judah Tanu tamlawhna le thumna a khangsak hi.

⁶Amah in huankhat bangin a tenna mun gamtul suaksak hi; amah in kikhopna mun a susia hi. TOPA in Zion, a kisehsa ama pawite le a Sabbath-te a mangngilhsak hi; a heh luatna hangin a kumpite le a siampite a thusim kei hi.

⁷Topa in a biakna-tau nai a, a munsiangtho a nusia hi. a kumpi inn umna kawmte galte khutah a piaksak hi; amaute a kisehsa pawite a, a ot bangun TOPA inn ah aw sangsakin a awng uh hi.

⁸TOPA in Zion Tanu kimkota kulhte balzan ding a sawm zo hi. Amah in tehna ciangin teh khin a, susia lo dingin a khut a tonsak kik kei hi. Amah in leician le kulhte taamlosak a; a susiamang khawm hi.

⁹A kongpite lei sungah tumin a kalhnate sutan a, a susia hi. A kumpipa le a kumpi tapate minamte lakah salin kikai a, thukham om nawn loin kamsangte in TOPA tung pan mang a mu nawn kei uh hi.

¹⁰Zion Tanu upate daitakin lei lakah a tu uh hi. A lutung uah leivui theh uh a, ippi puan a silh uh hi. Jerusalem numeite leilak lam nga-in a kun uh hi.

¹¹Ka kahna-in ka mit zeu a, ka gimna in hong zen hi. ka mite kisuksiatna hang le khua sung kongzinga naupangte le naungeekte a sihbupna hangin ka lungsim khempeuh a bei kiuhkeuh hi.

¹²A nute uh kiangah, "Zu le anlum koi-ah om hiam?" ci uh hi. Liamna a neite bangin khuapi sung kongzing lakah sibup uh a, damdamin a nute angah a si uh hi.

¹³Nang ading kei cih theih bang om ahi hiam? Jerusalem Tanu aw, nang bang tawh hong teh thei ding ka hi hiam? Zion Tanu Bit aw, nang kong hehnem theih nadingin bang tawh hong teh ding ka hi hiam? Na liamna lah tuipi zahin thuk hi. Kua in hong damsak thei ding hiam?

¹⁴Na kamsangte mangmuhna man loin kimanna a nei kei hi. na koltana pan hotkhiat nadingin na mawhna hong pholak kei uh hi. Nang tunga hong gente uh thusuakte lah man loin hong makaih khial vive ahi hi.

¹⁵Na lampi hong tawn peuhmah in a khut sialki in hong tumsan uh hi. Amaute in Jerusalem Tanu selpho in a lu uh peisan uh a, "Hoihna khempeuh a kim, leitung buppi lungnopna a kici khuapi hih maw?" a ci uh hi.

¹⁶Na galte in nang langkhatah a kam uh za pi takin ka uh a, hong selpho in a ha uh hong gawisan in, "Tuanu nawmvalh zo ngawngaw hang ei, i ngakngak hih ni mah hi ei; hih mu dinga nungta i hi ve," ci uh hi.

¹⁷TOPA in a geelsa bangin sem khin hi; sawtpi lai-a ama kammal a thukip a tangtungsak hi. Amah in hong hehpih loin nang hong lawnthal a, na tungah na galte gualzosakin, na galte ki a a tawisang hi.

¹⁸Mite lungsim Topa tungah kikokhia hi. Zion Tanu kulhpi aw, na khituite sun le zanin guntui luang bangsak in; nang le nang kihehpih kei inla, na mit zong tawlngasak kei in.

¹⁹Nitak tunga galvilte bangin zanin tho inla kiko in; Topa omna ah na lungsim tui bangin sungkhia in. Lamka bom tenga gilkiala sibup na tate nuntak nadingin ama lamah na khut laamto in.

²⁰"TOPA aw, hong en inla hong ngaihsun dih in: Hih bangin kua bawl ngei na hi hiam? Numeite in amau sunga piang a khoisa uh a tate uh ne ding uh ahi hiam? Topa munsiangtho sungah siampite le kamsangte kithat ding ahi hiam?

²¹"A tek a khangin lamdung leivui lakah a pukkhawm uh hi. Ka nungak ka tangvalte namsau-in kithat khin hi. Na heh ni-in amaute na that hi; hehpih loin amaute na go khin hi.

²²"Pawi bawl ni-a mite sap bangin hong lausak dingte mun khempeuh panin na sam hi. TOPA heh ni-in a suakta a omlai khat beek a om kei hi; ka don ka kepte lah ka galte in a susia ta hi.