Read Zokam Tamlawhna 3 Bible Online

Tamlawhna 3 - Zokam bible

Tamlawhna 3

¹aAma thangpaihna khetbuk in a bawlsiat a mu khinpa ka hi hi.

²Amah in kei hong hawlkhia a, khuavaka hong paisak tangin khuamial lakah hong paisak hi.

³Hi takpi hi, a khut ka langkhatah pangsaka, sun nilohin hong tua cih kikkik hi.

⁴Ka vun le ka sa tekhsak a, ka guh a sutan zo hi.

⁵Amah in haksatna le khaatna tawh ka kimkot ah hong umcih hi.

⁶Amah in sawtpi-a sisate bangin khuamial lakah kei hong tengsak hi.

⁷Ka suahtak theih loh nadingin kulh hong ciankhum a, sikkhainiang gikpi in hong khih hi.

⁸Awngkhia a huh nading ka nget nangawnin ka thungetna a khakcip hi.

⁹Amah in ka lampi-ah suang ciangin khaktan a, ka lampi a kawisak hi.

¹⁰Vompi bangin boksa in na ngak a, humpinelkai bangin hong buk hi.

¹¹Lampi panin hong bawh a, kei hong hualpekin hong huh ding om loin hong nusia hi.

¹²A thal keka, a thaltang muitum in hong nei hi.

¹³A thaltang bawm sunga thaltangte in ka lungtang hong sunlet hi.

¹⁴Ka mite khempeuh nuihsat in ka om a, sun niloh in hong ciamnuih uh a la-in hong sa uh hi.

¹⁵Amah in singkha hong khamsak a, sinkha tui hong dawnsak hi.

¹⁶Suanghiam in ka ha khong a, leivui lakah kei hong tuancil hi.

¹⁷Lungnopna tawh ka kigamla a; daupaina ka mangngilh ta hi.

¹⁸Tua ahi ciangin, "Ka thupina bei ta a, TOPA tunga ka lametna khempeuh a bei ta hi," ka ci hi.

¹⁹Ka gim thuakna, ka vakvaina le sinkha le a khaatna ka phawk gige hi.

²⁰Tuate hoihtakin ka ciamteh a, ka sunga om ka hinna a lungkia hi.

²¹Tua hi napi ka lungsima ka phawk khat om a, tua ahi manin lametna ka nei hi.

²²TOPA hong khuatuahnate bei ngei lo ahimanin a lian mahmah hong itna hangin eite i kangtum kei hi.

²³Zingsang simin tuate thaksuak a, na muanhuaina lian mahmah hi.

²⁴Kei le kei in, "TOPA kei tanh ahi hi; tua ahi ciangin amah ka ngak ding hi," ka ci hi.

²⁵Ama sungah lametna nei-a amah a zong mite tungah TOPA hoih hi;

²⁶TOPA hotkhiatna daitaka ngak hithiat ding hoih hi.

²⁷Mi khat in a khangno lai-in hakkol a puak ding a hoih hi.

²⁸TOPA in ama tungah a tunsak ahi manin daitakin amah guak tu hithiat hen.

²⁹A maitang leivui lakah phum hen- lametna om thei lai kha ding hi.

³⁰A paang a beng dingpa dawh henla maizumna tawh dim hen.

³¹Ahang in, Topa in mite a pampaih tawntung kei hi.

³²Dahna hong thuaksak zongin a khuatuahna hong lak ding hi, a kip tawntung ama itna lianlua hi.

³³Ahang in, amah in mihing tate tungah bawlsiatna le dahna lungkimtakin a tungsak kei hi.

³⁴Gam sunga mi khempeuh khenuai-ah a kisikcip ciang,

³⁵Sangpen Pa mai-ah mihing khat thuneihna a kinial ciang,

³⁶mihing khat thutanna a kilakkhiatsak ciangin - Topa in tua nate mu lo ding ahi hiam?

³⁷Topa sehkholh lohpi-in kua pau thei a, a ma gen bangin piang thei ahi hiam?

³⁸Tuahsiatna le a hoih nate Sang Penpa’ kam pana piang khawm hi lo ahi hiam?

³⁹A mawhna hangin dan a kipiak ciangin bang hangin a nungta mi khat phun ding ahi hiam?

⁴⁰I lampite en pha in sittelin TOPA lamah kihei ni.

⁴¹I khutte le i lungsimte vantunga om Pasian lamah laamto ni,

⁴²"Kote ka mawh uh hi, kong lehdo khin uh a, ka mawhna uh nong maisak kei hi.

⁴³"Na hehna-in na kituam a, kote nong nungdelh hi; hehpih loin nong that hi.

⁴⁴Thungetna in a kantan zawh loh dingin nang le nang meiipi in na kituam hi.

⁴⁵Minamte lakah ninthem le ninpaih bangin nong bawl hi.

⁴⁶"Ka galte khempeuh un kote langah a kam uh zapi in a ka uh hi.

⁴⁷Kote in launa le gum, siatna le kisiatna ka thuak uh hi."

⁴⁸Ka mite kisia khin ahi manin ka khitui luitui luang a bang hi.

⁴⁹TOPA in van pan hong ensuka hong muh matengin,

⁵⁰kang thei loin ka khitui a luangluang ding hi.

⁵¹Ka khuapi numeite khempeuh hangin ka muh peuhpeuh dahna suakin hong hingimsak hi.

⁵²Ka galte in a thu omlopi-in vasa betin hong beng uh hi.

⁵³Amaute in leihawmpi sungah khiatlup hong sawmin, suangin hong deng uh hi;

⁵⁴tui in ka lutung dong khum a, a si ding ka hi ta hi,’ ci-in ka ngaihsun hi.

⁵⁵TOPA aw, leihawm thukpi taw panin na min ka lo hi.

⁵⁶"Hong hon in, ci-a ka kikona na bil hong humsan kei in," ci-a kong ngetna nong za hi.

⁵⁷Nang kong sap ciangin ka kiangah nong pai a, "Lau kei in," nong ci hi.

⁵⁸Topa aw, ka thu hong thupisimsakin, ka nuntakna nong tan hi.

⁵⁹TOPA aw, kei hong kikhialhsaknate na mu khin hi. Ka thu hong panpih in!

⁶⁰Phu hong laknopna uh le kei langa a geelsimnate khempeuh uh a thukna na mu khin zo hi

⁶¹TOPA aw, amaute hong engkonate, kei langa a geelsimnate khempeuh uh -

⁶²sun nilohin kei langah ka galte kihosima a kihuau khuankhuan uh na za zo hi.

⁶³Amaute en dih ve! A tu uh a a ding uh zongin kei la-el hong saksan den uh hi.

⁶⁴TOPA aw, a khut-ua a sepsa uh tawh kituakin a thuak dingua kilawm zahin thuk kik in.

⁶⁵Amaute lungtang tuamsak inla amau tungah na hamsiatna tung hen.

⁶⁶Hehsa in amaute delh inla TOPA vante nuai panin amaute susia in.