Read Zokam Tamlawhna 5 Bible Online

Tamlawhna 5 - Zokam bible

Tamlawhna 5

¹TOPA aw, ko tunga thupiang sate phawk inla hong en-in ka maimawlnate uh hong mu in.

²Ka luah ka ngakte uh pemtate tungah tung khin a, ka innte uh gamdang mite in tang uh hi.

³Kote tagah le pa nei lo, ka suak uh a, ka nute uh meigong a bang uh hi.

⁴Ka dawn ding uh tuisik ka lei uh kul a, ka cih ding uh sing lei a kul hi.

⁵Ko hong nungdelhte in hong khetul suih uh a, khawl thei loin gimin ka sibup uh hi.

⁶Anlum ka kham uh ka ngah nadingun Egypt-te le Assyria-te tungah ka ki-ap uh hi.

⁷Ka pate un mawhna bawlin amaute lah om nawn lo uh a, amaute thuak ding dan kote in ka thuak uh hi.

⁸Silate in ko hong uk uh a, amau khut pan hong suaktasak ding kuamah a om kei hi.

⁹Gam sunga namsaute hangin ka nuntakna uh khamin ka anlum ding uh ka ngah uh hi.

¹⁰Ka vun uh meikhuk bangin sa a, gilkialin ka nattun uh hi;

¹¹Zion a nupite le Judah khuapite a nungak bitte hong kibuansak hi.

¹²Kumpi tapate a khutun kiduangkhai a, upate a kizahtak nawn kei hi.

¹³Tangvalte in angawina suangin an gawi uh a, sing gik pipi pua-in naupangte a genthei uh hi.

¹⁴Khuapi kongpi ah upate a om nawn kei uh hi; khangnote in tumtheihte a tum nawn kei uh hi.

¹⁵Ka lungsim uah lungnopna beita hi; ka lamna uh thumna a suak zo hi.

¹⁶Ka kumpi lukhu uh ka lu panun kiakhia ta hi. Mawh khin ka hi manun gimna ka thuak uh hi!

¹⁷Hih thu hangin ka lungtang uh zawm a, hih nate hangin ka mit uh a mial hi;

¹⁸ahang in, Zion Mual gamsimtham suak a, se-alte a vak kawikawi hi.

¹⁹TOPA aw, nang na uk tawntung hi; khang khat pan khang khat dongin na kumpi tokhom a kip den hi.

²⁰Bang dinga kote hong mangngilh den na hi hiam? Bang dingin tu tanvei hong pampaih na hi hiam?

²¹TOPA aw, kong kihei theih nadingun kote ka ngei uh hong bangsak in; a beisa hunte bangin ka tulai nite uh hong bawlthaksak in;

²²tua hi loin, kote hong ma takpi-a ko tungah heh lua mahmah na hi hiam?