Read Zokam Ezekiel 1 Bible Online

Ezekiel 1 - Zokam bible

Ezekiel 1

¹A a[1] kum sawmthumna, a kha lina a ningana ni, Kebar Gun kianga saltangte lakah ka om laitakin vante kihongin Pasian mangte ka mu hi.

²Tua kha ninga ni - Kumpi Jehoiachin sal-a a kimat zawh a kum ngana kum -

³in Babylon-te b[2] gama Kebar Gun gei-ah Buzi c[3] tapa siampi Ezekiel tungah TOPA thu a tung hi. Tua lai-ah TOPA khut a tungah om hi.

⁴Ka khuadak a, leilu-lam panin huihpi nung ka mu hi - tua huihpi mut meiipi lakah khua phia a, khuavak pha mahmah in a umcih hi. Tua meikuang laizang sik-am tawh kibanga,

⁵tua mei sungah anungta ganhing tawh kibang li a om hi. Tuate a pianzia mihing tawh kibang a,

⁶ahi hangin amaute in maitang li le kha li a nei ciat uh hi.

⁷A khete uh mam a, a khepekte uh bawngno khe bangin sumngo nawtngil bangin a tee hi.

⁸A pang li-a a khamai tekah mihing khut a nei hi. Tua lite in a vekpi un maitang le kha nei uh a,

⁹a khate uh khat le khat a kimat dimdiam hi. A pai ciangun a mailam ciat uh manawh uh a, a kihei tuam a om kei uh hi.

¹⁰A maitangte uh hih bang ahi hi: Tua lite in mihing maitang nei ciat uha, a taklam panguah humpinelkai maitang, a veilam pangah bawngtal maitang nei-in; muvanlai maitang zong nei ciat uh hi.

¹¹A maitang uh tua bang ahi hi. A khate uh vanlam ah zakto uh hi; kha nih nei ciat uh a, a kha langkhat ganhing khat pen kha langkhat tawh kimatin a kha nihte in a pumpi a tuam hi.

¹²A mailam ciat uh manawhin pai uh hi. Kha a pai nopna lamlam ah pai uh a, a pai kawmun a kihei kei uh hi.

¹³Tua ganhingte mel in meihol kuanglai ahikeh meisel kuang tawh kibang hi. Mei pen ganhingte lakah nung le mai nawtin pai-in tangpha mahmah a, tuate lakah khua a phia zalzal hi.

¹⁴Tua a nungta ganhingte khuaphia zalzal bangin sukkin tokin zalzal uh hi.

¹⁵Tua anungta ganhing lite ka et laitakin a pang ciat uh leitung ah lengpei khattek oma, maitang li a nei ciat uh ka mu hi.

¹⁶Hih in a lengpei omzia le a kilamzia ahi hi: Lengpei lite chrysolite suang bangin a tee kim hi. Lengpeite khat sungah khat om bangin kilang hi.

¹⁷A pai uh ciangin ganhingte maitang li lamah khat bangin pai thei kim hi. A ganhingte pai bangin a lengpeite a kihei d[4] kei hi.

¹⁸A pei kualte sangin mulkimhuai a, a peikualte tungah mittang bekbek a dim hi.

¹⁹Anungta ganhingte gamtang peuh leh a panga a peita a tang hi; a nungta ganhingte lei panin kaangto leh a peite zong kikhangto hi.

²⁰Kha a pai nading peuhpeuhah amaute pai uh a, nuntakna a nei ganhingte kha tua lengpei sungah om ahi manin a peite tuate tawh a kikhin khawm hi.

²¹Tua ganhingte a tat ciangin amaute zong tang uh a, tua ganhingte a khawl ciangin tuate zong khawl uh hi; ganhingte lei panin kikhangto leh amaute tawh a pei zong a kikhangto hi; bang hang hiam cih leh a nungta ganhingte’ kha a pei sungah om hi.

²²Anungta ganhingte lutungah a kum kiukiau tawh kibang vuk banga hong leng daldal a mulkim huai khat a om hi.

²³Tua akum kiukiau nuai-ah a khate khat le khat kizomin kizal ciat a, a kha nih ciat in a pumpi a tuam hi.

²⁴Ganhingte a tat uh ciangin a kha ging uh ka za a, tuizeu hawk le Thahatpen a[5] aw le galkap honpi huging tawh kibang hi. A om mawk uh ciangin a kha uh khup uh hi.

²⁵Tua ciangin a khate uh khupa a om mawk laitakun amaute tunga a kum kiukiau tung panin aw khat hong ging hi.

²⁶Amaute lutunga a kum kiukiau tungah sapphire b[6] kumpi tokhom tawh kibang khat oma, atung sangpi-a tokhom tungah mi tawh kibang khat a om hi.

²⁷A kawng tungsiah a kilak bangin ka mu a, mei sunga sumngo kihalsan laitak tawh kibanga, tua nuaisiah pen mei tawh kibanga a tang ziahzuah in amah a pumtuam hi.

²⁸Guahzuk ni-a meii lakah sakhituihup kilang bangin ama kimkot ah khuavak in a kualkhum hi. Hih in TOPA minthanna kilatna tawh a kibang ahi hi. Tua ka muh ciangin ka khupbawh a, kampau aw khat ka za hi.