Read Zokam Ezekiel 14 Bible Online

Ezekiel 14 - Zokam bible

Ezekiel 14

¹Israel upate pawlkhat ka kiangah hong pai-in ka mai-ah tu uh hi.

²Tua ciangin TOPA thu kei tungah hong tunga:

³"Mihing tapa aw, hih mite in a lungsimun milim bia uh a, amaute maitangah kimuktuk nading gitlohna a koih uh hi. Amaute thu kidongsak peuhmah ding ka hi hiam?

⁴Tua ahi ciangin hopih inla amaute tungah gen in, ‘Hih in Thupipen TOPA gen ahi hi: Israel-te khat peuhpeuh in a lungsim ah milim bia a, amaute mai-ah kimuktuk theihna gitlohna koihin tuaci-in kamsangpa kiangah a pai uh leh a milim biak uh a liatna tawh kizui-in keimah TOPA in ka dawng ding hi.

⁵Keimah in a milimte uh hanga keimah hong puakoih Israel mite lungsim zawh kik nadingin ka hih ding hi,’ ci in.

⁶"Tua ahi ciangin Israel innkuante tungah gen in, ‘Hih in Thupipen TOPA gen ahi hi: Kisik un! Na milimte panun kihei unla a kihhuai na gamtatnasa teng uh lehngatsan un!

⁷"Israel-te ahikeh Israel-te laka a teng pemta khatpeuh kei tawh a kikhenkhiat nop-a a lungsimah milimte bia in, amai ah kimuktuk theihna gitlohna koihin tua ciangin kei thu dong dingin kamsangpa kiangah a pai leh TOPA kei mahmah in ka dawng ding hi.

⁸Tua mipa ka lang-et dinga mi tehkakna le mi thugentehna ka suaksak ding hi. Ka mite panin ka khenkhia ding hi. Tua ciangin TOPA ka hilam na thei ding uh hi.

⁹" ‘Kamsang khat kamsang dingin a kizol-a a kithuzawh leh keimah TOPA in tua kamsangpa ka thuzawh dinga ama langkhatah ka khut zanin ka mi Israel-te lakah ka susia ding hi.

¹⁰Amaute khialhna amau mah in thuak ding uh a - a kamsangpa a thu dongpa zah mahin a mawh ding hi.

¹¹Tua ciangin kei kiang pan Israel mite gammang nawn lo ding uh a, amaute mawhna khempeuh hangin a kininsak nawn kei ding uh hi. Amaute keima mi hi ding uh a, keimah amaute Pasian ka hi ding hi, Thupipen TOPA in cikhia hi,’ ci-in gen in," hong ci hi.

¹²TOPA thu kei tungah hong tunga:

¹³"Mihing tapa aw, gam khat in muanhuai loin kei langah mawhna a bawl leh a langkhatah ka khut zanin a an ngahna ka khaktansak dinga, kialpi tungsakin a mihing a ganhingin ka that dinga

¹⁴hih mithumte - Noah, Daniel a[27] le Job - tua sungah a om zongin amaute’ thumaanna in amaute bek a honkhia zo ding hi. Thupipen TOPA in cikhia hi.

¹⁵"Ahi kei leh tua gam, gamsate hangin kuamah in a tot theih loh nadingin gamsa gilo sawl leng ta nei loin nusia ding uh a, gamkhing a suak ding hi;

¹⁶kei mah Thupipen TOPA ka nuntakna ka kilo hi, hih mi thumte tua gam sungah a om uh zongin amaute in a tanu a tapate uh a honkhia zo kei ding uh hi. Amaute bek suakta ding uh a, ahi hangin leitang gamkhing a suak ding hi.

¹⁷"Ahi kei leh tua gamah namsau sawlin, ‘Gamsung khempeuh namsau vatsuaksak un,’ ci-in a sunga mite le ganhing teng thatsak leng,

¹⁸Thupipen TOPA in ka nuntakna ka lo hi, hih mi thumte a sungah a om uh zongin a tanu a tapate uh a honkhia zo kei ding uh hi. Amaute bek a kisuaktasak ding hi.

¹⁹"Ahi kei leh tua gam sungah pulpi tungsakin ka thangpaihna sisan luanna-in zangin khua sungah mihing ganhing thatsak leng

²⁰Thupipen TOPA in ka min ka lo hi, tua sungah Noah, Daniel le Job-te a om uh zongin a tanu a tapate uh a honkhia zo kei ding uh hi. A thumaanna uh hangin amau le amau bek kihonkhia zo ding uh hi.

²¹"Ahang in, Thupipen TOPA thugen hih ahi hi: Jerusalem ah a sunga mihing ganhing a that dingin a lauhuai ka thukhenna nam li - namsau, kialpi, gamsa gilo le pulpi-te ka tunsak ciangin siahuai si incia!

²²Ahi zongin tua pua-a kipuakhia ding tanu tapa a omlai a om ding hi. Amaute nang kiangah hong pai ding uh hi. Amaute gamtat luhekzia na muh ciangin tua khuapi tunga ka tunsak gimnate khempeuh - Jerusalem ah tungsak ding mah hi, ci-in na lungsim a zangzaw ding hi.

²³Amaute gamtat luhek na muh ciangin a thu om lopi in a mawk hih ka hi lo lam thei-in na lungsim a nuamtuam ding hi, Thupipen TOPA in cikhia hi," hong ci hi.