Read Zokam Ezekiel 17 Bible Online

Ezekiel 17 - Zokam bible

Ezekiel 17

¹TOPA thu kei tungah hong tunga:

²"Mihing tapa aw, tehkakna khat gelhkhia inla Israel innkuante tungah gentehna khat gen in.

³Amaute kiangah, ‘Hih in Thupipen TOPA gen ahi hi: Muvanlai golpi, a kha za mahmah in a khavengte sau a, a mel tuamtuamin a gial bialbual khat Labanon ah va tu hi. Tamtak dawn khat tuah a,

⁴a dawnngek sutanin sumbukte gamah lenpih a, sumbukte khuapi ah a suan hi.

⁵"‘Amah in na gamua khaici pawlkhat pua in lei hoihna ah tuh hi. Nahkai sing bangin tui tamna munah suana,

⁶pokhia-in zaam a, ahi hangin azung a nuai-ah a om hi. Tua ciangin lenggui suak a, a hiang mengkhia in a teh pha mahmah hi.

⁷"‘Ahi hangin muvanlai dang khat, gol mahmah in a kha za deda a, a mul pha mahmah khat a om hi. Lenggui in a kisuanna mun panin ama lamah zungkha a, tui a ngah nadingin a hiangte ama lamah a zaam hi.

⁸Tua lenggui a hiang mengin agah gah a, lenggah hoih a suak dingin lei hoihna mun tui tamna gei-a kisuan ahi hi,’ ci in.

⁹"Amaute tungah, ‘Hih in Thupipen TOPA gen ahi hi: A khanpha zo diam? A vul nadingin zungbawhin a gahte zutkhiat loin om ding ahi hiam? A mengthak khempeuh a vulgawp ding hi. Tua lenggui botkhia dingin mi thahat ahikeh mi tampi kisam lo ding hi.

¹⁰A mun dangah kisuan leh zong a gahpha zo ding hiam? Nisuahna huih in a mut ciangin vulgawp lo ding hiam - a kisuanna mun a pona ah a vulgawp ding hi,’ ci-in gen in," hong ci hi.

¹¹Tua ciangin TOPA thu kei tungah hong tunga,

¹²"A lehdo thei innkuante tungah, ‘Hih nate a khiatna na thei uh hiam?’ ci-in dong in. Amaute tungah: ‘Babylon kumpipa Jerusalem ah pai-a, a kumpipa le a uliante kaikhia-in Babylon ah tonpih kik hi.

¹³Tua ciangin kumpipa innkuan sung pan khat la-in thuciam bawlpiha a kiciamsak hi. Gam makaite zong paikhiatpih mang hi.

¹⁴Tua pen a kumpi gam kiamin ding kik zo nawn lo-a a omlai sunte in a thuciam uh a zuih nading uh deihna ahi hi.

¹⁵Ahi hangin kumpipa in amah lehdo a, Egypt ah palai sawlin sakol le galkap tampi a ngensak hi. A lawhcing na diam? Tua banga nasempa a suakta zo ding hiam? A thuciam palsat napi suakta veve ding ahi hiam?

¹⁶"Thupipen TOPA nuntakna ka lo hi, a kamciam pelh a, a thuciam uh a palsatpa, amah kumpi tokhom tungah a tusakpa’ gam Babylon ah amah si ding hi.

¹⁷Pharaoh in mi tampi nuntakna siatsak nadingin dum toin kan bawla a thahat a galkap honpite tawh a kuan hangin ama gal a zawhsak tuan kei hi.

¹⁸Amah ciampelin thukhun palsat ahi hi. Thuciamna bawl khin napi hihte khempeuh sem ahi manin a suakta peuhmah kei ding hi.

¹⁹"‘Tua ahi ciangin hih in Thupipen TOPA gen ahi hi: Ka nuntakna ka lo hi, ka thuciam a simmawhna le ka thukhun a palsatnate ama lutungah ka tusak ding hi.

²⁰Amah siahna-in ka len ka zaak dinga ka thangah a awk ding hi. Amah kei tungah muanhuai lo ahi manin Babylon ah paipihin tua lai-ah thu sitin thu ka khen ding hi.

²¹A taikek ama galkapte khempeuh namsau in tuk ding uh a, a omlai sunte huih lakah a kithehthang ding uh hi. Tua ciangin keimah TOPA gensate na thei ding uh hi.

²²"‘Hih in Thupipen TOPA gen ahi hi: Keimah in tamtak sangpi dawnngek khat la-in ka suan ding hi; adawn panin angumngeek khat khiaktanin mual sangpi dawn khatah ka suan ding hi.

²³Israel mual sangpente dawnah ka suan ding hi; a hiang meng dinga, agah gahin tamtak lianpi a suak ding hi. Vasa namkim in a tungah bu tom ding uh hi; amaute ahiang liim nuai-ah a om ding uh hi.

²⁴Gam sunga sing khempeuh in, keimah TOPA in sing sangte niamsakin, sing niamte ka sansak lam, singhingte keusakin singkeute ka hinsak lam a thei ding uh hi. "‘Keimah TOPA in ka gensa hi-a ka gen bangin ka sem ding hi, ci hi,’ ci-in gen in," hong ci hi.