Read Zokam Ezekiel 18 Bible Online

Ezekiel 18 - Zokam bible

Ezekiel 18

¹TOPA thu kei tungah hong tunga:

²Israel gam tawh kisai-a mite in paunak-a a zat uh: "‘A pa lenggah thuk nek, a tate ha kim; a cih no mite in bang na cihnopna uh hiam?’ a ci hi.

³Thupipen TOPA in: Ka nuntakna ka lo hi, hih paunak Israel sungah na zang nawn kei ding uh hi.

⁴Ahang in, a nungta hinna peuhmah kei aa hi a, a pa le a ta a nihin kei aa hikhawm hi. Mawhna a bawlpa mah a si ding hi.

⁵"A thumaan a thutang - a thumaana gamta mi khat om ci ni.

⁶Amah in mualtung biakbukno ah ne loin Israel innkuante milimte zong a en kei hi. A vengte zite zong buahsak loin a nin nei kimlai numei zong a luppih kei hi.

⁷Kuamah nengniam loin sum leitawite vankhapte pia kik zaw hi. Amah in kuama aa sut loin gilkialte an pia zaw a, puan nei lote puan a guanzaw hi.

⁸A met deihna bekin kuamah sum leitawi lo a, a met a[36] tam lua zong a la kei hi. Khialhna bawl khak loh nadingin a khut dek tentan a, khat le khat kikalah a kilawmin thu khen hi.

⁹Ka thukipte zui-a ka thukhamte muanhuaitakin a tang hi. Tua bang mi a thumaan hi a, a nungta taktak ding hi; Thupipen TOPA in cikhia hi.

¹⁰"Amah a ngongtat tapa khat hi zenzen henla, mi sisan luangsakin hih na b[37] dangte khatpeuh sem kha leh

¹¹(a pa in lah tuate khat beek sem kha kei leh): "Amah in mualtung biakbuknote ah a ne hi. A vengte zite buahsak hi.

¹²Mizawngte le a tasamte nuainet hi. Mi na a mawkna-in sut hi. Sum leitawi tanga a vanlakte pia kik nawn lo hi. Milimte lam nga hi. A kihhuai nate sem hi.

¹³A met bek lametna-in mite sum leitawisak a, a met tampipi la hi. Tua bang mi nungta ding ahi hiam? A nungta kei ding hi! Bang hang hiam cih leh hih a kihhuai nate khempeuh sem khin hi. Amah sihsak taktak ding hi-a a sisan ama lutung mah ah tu ding hi.

¹⁴"Ahi hangin hih tapa in tapa mah nei henla, a pa mawhna bawl teng mu a amuh hangin tuate sem kei leh:

¹⁵"Amah in mualtung biakbukno te ah ne loin, Israel innkuante milimte lam a nga kei hi. A vengte zi buahsak lo hi.

¹⁶Kuamah nengniam loin sum leitawina ah vanlak a nei kei hi. Kuama na zong sut loin gilkialte an pia zaw a, puan nei lote puan guan hi.

¹⁷Mawhna bawl kha lo dingin c[38] a khut dek tentan a, tangpi van la loin a met tam lua zong a ngen kei hi. Ka thukhamte tangin ka thukipte zui hi. A pa’ mawhna hangin a si kei ding hi; a nungta taktak ding hi.

¹⁸Ahi hangin a pa in mi zawhthawh bawlin, a sanggampa na sutin mite lakah khialhna bawl ahi manin a mawhna hangin a si ding hi.

¹⁹"Tua hi napi, ‘Bang hangin a pa mawhna a tapa in thuak kha lo ding hiam?’ ci-in nong dong uh hi. A tapa in thumaan thutang semin ka thukipte khempeuh limtakin a zuih nungsang, a nungta taktak ding hi.

²⁰Mawhna a bawlpa a si ding hi. Tapa in a pa’ mawhna thuak kha lo dinga, pa in zong tapa mawhna a thuak kha tuan kei ding hi. A thumaan mi in a thumaanna thaman sang dinga, migilote a gitlohna amah kithuaksak ding hi.

²¹"Ahi zongin migilo khat a mawhna bawlnate panin kihei-a, ka thukipte zui-in thumaan thutangin a gamtat leh a nungta taktak ding hi; a si kei ding hi.

²²A hihsate khempeuh kiciamteh nawn loin kimaisak ding hi. A maana a gamtatnasa hangin a nungta ding hi.

²³Migilo khat sihna hangin nuam ka hi hiam? Thupipen TOPA in cikhia hi. Nuam lo tham loin kisikin a nuntak ciangin nuam zaw hi lo ka hi hiam?

²⁴"Ahi zongin a thumaan mi khat thumaan nawn loin migilo khat sep ahi a kihhuai mawhna a bawl leh a nungta ding hiam? Ama thumaan-nasate khat beek a kiciaptehsak kei ding hi. A muanhuai lohna hangin a mawh hi-a, a bawlsa mawhna hangin a si ding hi.

²⁵"Tua hi napi, ‘Topa hihzia thutang lo hi,’ na ci uh hi. Israel innkuante aw, za un: Ka hihzia thutang lo ahi hiam?

²⁶A thumaan mi khat in a thumaanna lehngatsanin mawhna a bawl leh tua hangin a si ding hi; amah a bawlsa mawhna hanga si hi ding hi.

²⁷Ahi hangin migilo khat in a gitlohnasa lehngatsanin thumaan thutangin a gamtat leh a nuntakna a hon ding hi.

²⁸Amah in a mawhnasa khempeuh ngaihsun thei-in lehngatsan ahi manin a nungta taktak ding hi; amah a si kei ding hi.

²⁹Tua hi napi Israel innkuante in, ‘Topa hihzia a thutang kei hi,’ ci uh hi. Israel innkuante aw, ka hihzia thutang lo ahi hiam? A thutang lo no hihzia hizaw lo ahi hiam?

³⁰Tua ahi ciangin Israel innkuante aw, nomau hihzia tawh kizui-in no tungah thu kong khen ciat ding hi, Thupipen TOPA in cikhia hi. Kisik un! Na gamtatnasa uh lehngatsan un tua ciangin na mawhna uh hangin na puk nawn kei ding uh hi.

³¹Na gamtatnasa khempeuh panun kikhel unla, lungsim thak le kha thak nei un. Israel innkuante aw, bang hang si ding na hi uh hiam?

³²Bang hang hiam cih leh mi khatpeuh sihna ah ka lungdam kei hi. Kisikin nungta un! Thupipen TOPA in cikhia hi.