Read Zokam Ezekiel 21 Bible Online

Ezekiel 21 - Zokam bible

Ezekiel 21

¹TOPA thu kei tungah hong tunga:

²"Mihing tapa aw, na maitang Jerusalem lam ngat inla munsiangtho langah thu hilh in. Israel gam langkhatah thu genkhol inla

³tuanu tungah: ‘Hih in TOPA gen ahi hi: Nang langkhatah ka pang hi. Ka namsau a paai panin ka dok dinga, misia le mipha kong bantan khawm ding hi.

⁴Misia le mipha bantan khawm ding ka hi manin leilu lam pan leitaw-lam dongin kuama tungah ka namsau a paai ah ka siat tuan kei ding hi.

⁵Tua ciangin keimah TOPA in ka namsau a paai pan dokkhia in ka siat kik loh ding lam mi khempeuh in a thei ding uh hi,’ ci-in gen in.

⁶"Tua ahi ciangin mihing tapa aw, thum in! Amaute mai-ah dah lua-in lungsim tamkhamin thum in.

⁷Amaute in nang kiangah, ‘Bang dinga thum na hi hiam?’ ci-a hong dot uh ciangin, ‘Kei tunga hong tung thuthakte hang ahi hi. Lungtang khempeuh tuisuak dinga, khut peuhmah kha dakdakin, lungsim khempeuh bei dinga khuk khempeuh tui bangin a neem ding hi,’ ci-in gen in. Tua hun hong tung ta ding hi! Hong tung taktak ding hi, TOPA in cikhia hi," hong ci hi.

⁸TOPA thu kei tungah hong tunga:

⁹"Mihing tapa aw, thu genkhol inla, ‘Hih in Topa gen ahi hi: "‘Namsau khat, kinawtngila a kitathiamsa namsau khat -

¹⁰mihing gawh nadinga kitathiam kinawt ngila khuaphia banga a tee zialzial namsau khat! "Ka tapa Judah kumpi ciangkhut hangin lungnuam ding i hi hiam? Namsau in tua bang ciangkangte a thusim kei hi.

¹¹"‘Namsau nawtngil pen khuta zatpah lian dinga sehsa ahi hi; tathiamsa le nawtngilsa hi-a, mi that ding pa zat dingin a mansa ahi hi.

¹²Mihing tapa aw, hih in ka mite thuak ding ahi manin kikokhia inla tau in; tua in Israel gam-ukte khempeuh thuak ding ahi hi. Amaute in ka mite khempeuh tawh namsau thuak khawm ding uh hi. Tua ahi ciangin na awm tum in.

¹³"‘Zia-etna hong tung taktak ding hi. Namsau in a thusim loh Judah kumpi ciangkhut kizom suak kei leh e! Thupipen TOPA in cikhia hi,’ ci hi.

¹⁴"Tua ahi ciangin mihing tapa aw, na khutte gel tum inla mailam thu genkhol in. Tua namsau nihvei tham lo thumvei nangawn kivat hen. Tua in kigawhna namsau - a ning kim panin nehtuah a tampitak gawhna namsau ahi hi.

¹⁵Lungsim tuisuak nading le tampi a puk nadingin thahna a[46] namsau, amaute kongpi khempeuh ah ka pangsak khin hi. Ehei! Khuaphia bangin kiteesak zalzal a, a go dingin a len cinten hi,

¹⁶Namsau aw, na veilam le na taklam, na vat manna peuhpeuh vat in.

¹⁷Kei zong ka khutte gel ka tum dinga tuateh ka thangpaihna a kiam ding hi. Keimah TOPA in ka gensa ahi hi," hong ci hi.

¹⁸TOPA thu kei tungah hong tunga,

¹⁹"Mihing tapa aw, Balylon kumpipa namsau, gam khat pan a kibang lam niha a kipat theih nadingin lampi nih ciamteh in. Tua khuapi lam zuatna lampi a katna munah ciaptehna khuam khat phut in.

²⁰Namsau in Ammon mite khua Rabbah a vat nadingin lampi khat ciamteh inla Judah le kulha ki-um Jerusalem vat nadingin adang khat hisak in.

²¹Ahang in, Babylon kumpipa lampi nih kituahna lamka lai-ah khawlin ai san phot dinga: A thaltangte tawh aisanin, a milimte dongin sasin a vel ding hi.

²²Molh-tumpi-a kulh sukkhap nading mun ahi zongin vat un, cih thupiak nading ahi zongin, galsim ta un ci-a kiko nading ahi zongin molh-tumpi-a kongpi sukhap nading ahi zongin, lei sunvum nading ahi zongin, umcih nading ahi zongin Jerusalem adingin a khut taklam sungah ai hong om ding hi.

²³Ama tunga kiciamte adingin ai a pha lo tawh a kibang ding hi. Ahi hangin amaute khialhna phawksakna le sal-a a kikaih nading ahi hi.

²⁴"Tua ahi ciangin hih in Thupipen TOPA gen ahi hi: ‘No mihingte in lungsim sunga ciamteh dingin thei gige mahin na lehdona uh hangin na hihna khempeuh uhah na mawhna uh na pholak uh hi - hihte na hihna uh hangin salin hong kikai ding hi.

²⁵"A ni tungta in, a dan thuak ding hun khengval ta a, a thanghuai a gilo Israel gam-ukpa aw,

²⁶hih in Thupipen TOPA gen ahi hi: Na dialkhip lakhia in, na kumpi lukhu suahkhia in. Nidang lai-a bang hi nawn lo ding hi. Miniamte kitawisang dinga, a kitawisangte kiniamsak ding hi.

²⁷Kisiagawp! Kisiagawp! Ka siasak gawp ding hi! A neipa taktak hong pai mateng a kipia kik kei ding hi; amah ka pia ding hi,’ ci hi.

²⁸"Tua ciangin mihing tapa aw, thu genkhol inla, ‘Hih in Thupipen TOPA in Ammon-te le a simmawhte tawh kisai-a a gen ahi hi: "‘Namsau khat, namsau khat, gawhlup nadinga kidokkhiasa a nawmvalh ding le khuaphia banga tee zalzal dinga kinawt ngilsa namsau khat!

²⁹Nang tawh kisai a man lo mangmuhna le zuau ai sannate tangin a ni tunga a dan thuak ding hun a khengval ta, thahlup ding mi gilote ngawng ah kinga ding hi.

³⁰Namsau a paai-ah siat kik un. Nang hong kibawlna mun; na pu na pate uh gamah thu kong khen ding hi.

³¹Note tungah ka thangpaihna sungin ka hehluatna husa-in kong mut ding hi. Siatsakzia a siam, a cikzia lo mite tungah kong pia ding hi.

³²Note mei-ah hong kikhul dinga, na sisan uh na gamuah kiluangsakin hong kiphawkkha nawn kei ding hi; hih thu keimah TOPA in ka gensa ahi hi,’ ci in," hong ci hi.