Read Zokam Ezekiel 22 Bible Online

Ezekiel 22 - Zokam bible

Ezekiel 22

¹TOPA thu kei tungah hong tung a,

²"Mihing tapa aw, tuanu thu na khensak ding hiam? Hih khuapi sisan luansakna thu na khen ding hiam? Tuateh a kihhuai a gamtatna khempeuh maitangsalh gawp inla:

³‘Hih in Thupipen TOPA gen ahi hi: Na sunga sisan luanna hangin nang le nang kisiattut a, na milim bawlna hanga a kibuahsak nang khuapi aw,

⁴na luansaksa sisan hang le na bawlsa milimte hanga na kibuah-sakna hangin nang hong kimawhsak zo hi. Na nite na beisaka, na kumte a beita hi. Tua ahi ciangin minamte simmawh le gamdangte khempeuh ciamnuih bawlna kong suaksak ding hi.

⁵A minsia-a buaina tawh kidim khuapi aw, nang tawh kinaite le nang tawh kigamlate in nang hong simmawh ding uh hi.

⁶" ‘Na sunga om Israel gam-ukte in amaute thuneihna sisan luansakna-in a zat uh mu in.

⁷Na sungah nute le pate kisimmawh hi; na sungah pemtate, meigongnute le pa nei lote kinengniam gawp hi.

⁸A siangtho ka vante kithusim lo a, ka Sabbath-te kitang lo hi.

⁹Na sungah mihing sisan luangsak dingin mihekte, mualtung a biakbukno a nete le ahuuklua alan lua-a gamtate om uh hi.

¹⁰Na sungah a pa lupna a zahtak lo om a, nang sungah numei nin neih hun - thukham in a phal loh hun a tang lo a om hi.

¹¹Na sungah a vengte zi tawh a kihhuai-a gamta om-a, adang khat in a mo zumhuaipi in buahsak a, adang khat in a sanggamnu, ama pa’ tanu tektek a buan hi.

¹²Na sungah mite in sisan suahsak nadingin golhsum la uh hi. Nang in a met b[47] na uang laka a thumaan lopi in na vengte tungah a met la-in na sut hi. Tua ciangin kei nong mangngilh hi, Thupipen TOPA in cikhia hi.

¹³"‘Nang sungah thumaan lo-a a met lakna le mihing sisan na luansaknate hangin ka khutte gel ka tum taktak ding hi.

¹⁴Nang tungah kong thuk ni ciangin hang ngam lai-in na khut khauh zo nawn ding ahi hiam? Keimah TOPA in ka gensa hi a, ka sem ding hi.

¹⁵Minamte lakah kong nawhkek dinga gam citeng ah kong thehthang ding hi; tua ciangin na siantholohna uh ka beisak ding hi.

¹⁶Minamte muhna ah hong kinitsak a[48] ciangin TOPA ka hilam na thei ding hi, ci hi,’ ci-in gen in," hong ci hi.

¹⁷Tua ciangin TOPA thu kei tungah hong tunga:

¹⁸"Mihing tapa aw, Israel innkuante kei adingin sumngo-ek suak ta uh hi. Amaute khempeuh pumei sunga om sumngo, dal, sik le haknaw kihel ahi uh hi.Tuate hi napi amaute ngun-ek hilel uh hi.

¹⁹Tua ahi ciangin hih in Thupipen TOPA gen ahi hi: ‘Note khempeuh ngun ek suak khin na hi manun Jerusalem ah note kong khawm ding hi.

²⁰Mite in pummei sungah haltui dingin ngun, sumngo,sik, haknaw le dalte a koih bangun ka hehna le ka thangpaihna tawh kong khawm dinga, khuapi sungah hong koihin kong tuisak ding hi.

²¹Note kong khawm dinga ka thangpaih luatna tawh hong mutin tuanu sungah kong tuisak ding hi.

²²Pummei ah ngun a tui bangin tuanu sungah na tui ding uh a, keimah TOPA in nang tungah ka thangpaihna hong sung ka hilam na thei ding hi,’ hong ci hi," a ci hi.

²³TOPA thu kei tungah hong tung kik a:

²⁴"Mihing tapa aw, ‘Thangpaih ni-a guah a zu lo, dai a kai lo b[49] leitang na hi hi;,’ ci in.

²⁵Tuanu gam-ukte c[50] in humpinelkai hawkin a samatte a balzan bangin mite balzan uh a, a goute uh le a van manphate uh laksak uh a, a sungah meigong numei tampi omsak uh hi.

²⁶A siampite un ka thukham ngawhbawl uh a, a siangtho ka vante a buahsak uh hi; a siangtho vante le van mawkmawkte a khen kei uh hi; anin asiang cih a om tuan kei hi, ci-in hilh uh hi. Amaute lakah ka min dai theih nadingin ka Sabbath-te a tan ding uh a kitheihmawhbawl uh hi.

²⁷Tuanu sunga om a uliante, a samatte a balzan keivomte tawh kibang uh hi. Thutang lopi-in a ngah nop manun mihing sisan luangsak uh a mi a that uh hi.

²⁸A kamsangte in mangmuhna man lo le zuau aisanna tawh amau adingin hih gamtatnate a melh uh hi. Amaute in ‘TOPA thugen lohpi: ‘Hih in Thupipen TOPA gen ahi hi,’ ci uh hi.

²⁹A gam sunga mite in mi buluhin a na uh a mawk suh uh hi. Mizawngte le a tasamte nengniam uh a, pemtate bawlsia-in thutangin a khensak kei uh hi.

³⁰"Keimah in gam ka suksiat loh nadingin kulh a lam zo ding, a gam tanga a kisap hun cianga a dingzo ding mi amaute lakah ka zon hangin khatbeek ka mu zo kei hi.

³¹Tua ciangin amaute tungah ka thangpaihna ka bua a, ka hehluatna in amaute kangtumin amau gamtat-nasa khempeuh amau lutungah ka tusak hi, Thupipen TOPA in cikhia hi," hong ci hi.