Read Zokam Ezekiel 23 Bible Online

Ezekiel 23 - Zokam bible

Ezekiel 23

²"Mihing tapa aw, a nu kibang numei nih a om hi.

³A nungakno lai-ua kipan Egypt gama kizuaksa uh ahi hi. Tua gamah a nawi uh kimeksak khinin a nungak bit hihna uh bei khin hi.

⁴A uzaw min Oholah hi-a a sanggamnu Oholibah ahi hi. Amaute kei aa hi-a tanu tapa a nei khin uh hi. Oholah pen Samaria hi-a, Oholibah pen Jerusalem ahi hi.

⁵"Oholah kei aa ahi kimlai mah kizuak a alawmpate ahi Assyria-te a lunggulh lua hi;-

⁶amaute adum puan silh galhangte, gam-uk mangte le galkap mangte a vekpi un khangno mel hoih sakol tuansiam vive ahi uh hi.

⁷Assyria mi hoihpente tungah amahmah va kizuaka nungzuih in zolzol a milimte khempeuh tungah a kibuahsak hi.

⁸A khangmoi lai-in mite in luppih a, a nawi bawktungte meksakin a utut un a kibawlna Egypt ah a gamtatnasa khia tuan loin a paktat veve hi.

⁹"Tua ahi ciangin a it a lunggulh Assyria-te tungah tuanu kipia hi.

¹⁰Amaute in a puan hawkkhiatsakin a tanu a tapate matsak uh a, amah namsau in a that uh hi. Amah numeite lakah ciamnuihna suakin dan kithuaksak hi.

¹¹"A sanggamnu Oholibah in hih thu mu napi a sanggamnu sangin a paktatna uangzaw hi.

¹²Amah in zong Assyria mite - ukpite galkap mangte, kimtakin a kizem sakol tunga tuang galhangte, khangno mel hoih khempeuh a lunggulh hi.

¹³Keimah in tuanu amah le amah a kinitsak luat lam ka mu-a a nih un a kibang lampi tawn uh hi.

¹⁴"Ahi hangin tuanu in a kizuakna zomsuak lai hi. Tuanu in kawm tunga kisuai asan-a kizem, Chaldea d[51] te lim,

¹⁵a kawngah kawnggak gaksa, a lu panun a dial mong uh a kaisuk, Babylon sakol galkap mangte banga kizem, Chaldea e[52] gam mite lim a mu hi.

¹⁶Tuate a muh phetin lunggulh lua mahmah a, Chaldea a, amaute kiangah kamtai a sawl hi.

¹⁷Tua ciangin Babylon mite a itna lupna ah pai-in a kilunggulh luatna un tuanu a ninsak uh hi. Amaute in tuanu a nitsak khit uh ciangin tuanu in amaute kihin a lehngatsan hi.

¹⁸Amah in a paktatna a kilangtangin zoma a guaktang hihna a pholak ciangin a sanggamnu ka nungngatsan bang tektekin amah kihin ka nungngatsan hi.

¹⁹Tua hi napi a khangno lai-a Egypt ah a kizuaklai zilin lungsim kip nei lo a, a ututin a gamta hi.

²⁰Laa zang bang nei-in sakol bawtui bang a nei tua lai-a a itte a nak lunggulh mahmah hi.

²¹Tua hi-a nang na neu lai-a na huukna, Egypt ah na awm teng hong kizawtsakin na nawi hong kinuaisaknate na lunggulh lai hi. f[53]

²²"Tua ahi ciangin Oholibah aw, hih in Thupipen TOPA gen ahi hi: Na lawmpate kih-a na nungngatsante tokbuai in nang langkhatah ka pangsak dinga mun khempeuh panin nang kong langpansak ding hi.

²³Tuate pen Baylon-te le Chaldea-te khempeuh, Pekod-te, Koa-te Shoa-te tawh Assyria-te kong paipih khawm ding hi; amaute a vekpi un pasal mel hoih ukpi vive le galkap mangte, sakol galkap uliante le a zaliante, a vekun sakol tunga tuangte vive ahi uh hi.

²⁴Nang langkhatah amaute - galhiam a[54] kengin sakolleng le van pua leng le mihon tampitak tawh hong kuan ding uh hi; amaute in nang langkhat mun citengah lum neu, lum lian le sik lukhute khusa-in panmun a la ding uh hi. Nang dan kong tuahsakna-in amaute tungah kong pia dinga, amau ngeina zui-in nang dan hong tuaksak ding uh hi.

²⁵Haza a ka hehluatna nang tungah kong tungsak dinga a hehluatna uh nang hong thuaksak ding uh hi. Na nakte le na bilte atkhia in, tua khita om lai sunte namsau in a tuk ding uh hi. Na tanu na tapate uh lamang ding uh a, no a om laite mei-in hong haltum ding uh hi.

²⁶Na puante uh hong hawkkhiat-sakin na kizepna hoihte uh a la ding uh hi.

²⁷Egypt pana na kipat uh huukna le kizuakna ka beisak ding hi. Tua ciangin hih nate lunggulhin na en nawn kei ding uh a, Egypt zong na phawk nawn kei ding uh hi.

²⁸"Ahang in, hih in Thupipen TOPA gen ahi hi: Keimah in na muhdahte tung, kiha na lehngatsante tungah nang kong pia ding hi.

²⁹Amaute in hong mudahin na thalawhsa khempeuh hong laksak ding uh hi. Na guaktangin hong hawm nusiat ding uh a, a maizumhuai na paktatna teng hong pholak ding uh hi.

³⁰Na huukna le na ut banga na tatnate in hihte nang tungah hong tun ahi hi. Bang hang hiam cih leh minamte tawh na paktat a, amau milimte tawh na kininsak hi.

³¹Na sanggamnu lampi mah na tawn hi; tua ahi ciangin ama hai mah na khutah kong pia ding hi.

³²"Hih in Thupipen TOPA gen ahi hi: "A lian a thuk na sanggamnu hai mah na dawn ding hi; Tua hai sungah tampi ta ahi manin hong kisimmawhin hong kinuihsan ding hi.

³³Zukhamna le dahna a dim na sanggamnu Samaria’ hai, siatna le hawmmangsakna tawh nang hong kidim ding hi.

³⁴Nang dawnin a tawkhi nangawn na dawnkang ding hi; tua hai na tuanzan dinga na nawite na kuikek ding hi. Ka gensa ahi hi, Thupipen TOPA in cikhia hi.

³⁵"Tua ahi ciangin hih in Thupipen TOPA gen ahi hi: Hong mangngilhin na nunglam nong denna nungsangin na huukna le na paktatna a banbanin na thuak ding hi," hong ci hi.

³⁶TOPA in kei kiangah: "Mihing tapa aw, Oholah le Oholibah tungah thu na khen ding hiam? Tua ciangin a kihhuai a gamtatnate uh hangin maitang salhgawp in,

³⁷ahang in, amaute in angkawm uh a amaute khutah sisan a baang hi. A milimte uh tawh angkawm uh a, kei tawh ka neih a tate nangawn uh b[55] amau adingin an bangin biakna-in a pia uh hi.

³⁸A maute in hong hici bawl uh hi: Tua hun mahin ka munsiangtho ninsak uh a, ka Sabbath-te a tang kei uh hi.

³⁹Amaute in milimte tungah a tate uh biakna-a a piak ni mahmah un, ka munsiangtho ah lut uh a, a ninsak uh hi. Ka inn sungah amaute gamtatna tua bang ahi hi.

⁴⁰"Amaute in gamlapi pana pasalte a pai nadingin kamtai nangawn sawl uh a, amaute a tun uh ciangin amaute adingin na kipumsil uh a, a mitte zemin kizepnate tawh na kizem uh hi.

⁴¹Lupna hoih mahmah tungah tu-in a mai-ah sabuai phah-a a tungah keima gimnamtuite le sathaute koih uh hi.

⁴²"Tuanu kimkotah awlmawh a nei lo mihonte a gamlum uh hi; sehnel-gam pan Sabea-te c[56] pai-in mi mawkmawk honkhat a tonpih uh hi. Amaute in tua numeinu a sanggamnu tawh a banuah tau bulhsak uh a, amaute lutungah kumpi lukhu melhoih a khusak uh hi.

⁴³Tua ciangin a angkawm-a zawm ngi-ingei khat kiangah, ‘Tu in tuanu a tuaci den mah ahi manin luppih sawm dih un,’ ka ci hi.

⁴⁴Tua ciangin amaute in a luppih uh hi. A paktat mi khat kiangah pasalte pai bangin tua a huuk numei Oholah le Oholibah a luppih uh hi.

⁴⁵Ahi hangin a thuman mite in amaute angkawm numeite bang le mihing sisan a luangsakte bangin thu khen ding uh hi; bang hang hiam cih leh amaute in angkawm uh a, amaute khutah sisan a baang hi.

⁴⁶"Hih in Thupipen TOPA gen ahi hi: Amaute kiangah mihonpi kuansakin lausak gawp inla a nate uh sutsak in.

⁴⁷Mihonpite in suang tawh deng ding uh a, a namsau uh tawh a vat ding uh hi. A tanu a tapate uh thahsakin a innte uh a haltumsak ding uh hi.

⁴⁸"Tua ciangin gam sungah hukna le lanna ka kamhsak dinga tua pen numeite tungah vauhilhna suakin nang hong sun nawn kei ding uh hi.

⁴⁹Nang na hileh na huukna dan na thuak dinga, milim biakna hanga na mawhnate a banbanin na thuak ngelhngelh ding hi. Tua ciangin keimah Thuneipipen TOPA ka hilam nong thei ding uh hi," hong ci hi.