Read Zokam Ezekiel 25 Bible Online

Ezekiel 25 - Zokam bible

Ezekiel 25

¹TOPA thu kei tungah hong tunga:

²"Mihing tapa aw, Ammon-te lam nga inla amaute siat nading thu genkhol in.

³Amaute kiangah, ‘Thupipen TOPA thugen za un. Hih in Thupipen TOPA thugen ahi hi: Note in ka munsiangtho kininsakin, Israel gam kimanna nei loin kikoih a, Judah mite salin a kikaih na muh uh ciangin, "Awi bek si’ng," na ci se uh hi.

⁴Tua ahi ciangin note Nisuahna-lam mite adingin kong pia ding hi. Amaute in note lakah giahphual satin a puanbuk uh a lam ding uh hi; na singgah uh ne ding uh a, na bawngnawi uh dawn ding uh hi.

⁵Rabbah, kala-oh khawk ka suaksak dinga, Ammon, tuu khopna mun ka suaksak ding hi. Tua hun ciangin note in keimah TOPA ka hilam na thei ding uh hi.

⁶Ahang in, hih in TOPA gen ahi hi: Note in Israel gam langbawlin, na khut uh sialki in na tumsan uh a, lei tuatsanin, na lungsim neih zahun na lungdam se uh hi.

⁷Tua ahi ciangin note langkhatah ka khut ka liik dinga minamte tungah galmatin kong pia ding hi. Minamte panin kong khenkhia dinga, gamdangte panin kong khenkhia siang ding hi. Kong susia dinga tua ciangin TOPA ka hilam na thei ding uh hi,’ ci-in gen in," hong ci hi.

⁸"Hih in Thupipen TOPA gen ahi hi: Moab le Seir in, ‘En un, Judah innkuante minamdang mawkmawk tawh kibang ta uh hi,’ ci se uh hi;

⁹tua ahi ciangin Moab hut nadinga kiphut tua gam’ minthanna ahi Beth Jeshimoth, Baal Meon le Kiriathaim khuapite ka pholaak ding hi.

¹⁰Minamte lakah Ammon-te a kiphawk khak nawn loh nadingin Nisuahna-lam mite tanh dingin Moab-te, Ammon-te tawh ka piakhawm dinga,

¹¹Moab dan ka tuaksak ding hi. Tua ciangin amaute in keimah TOPA ka hilam hong thei ding uh hi,"hong ci hi.

¹²"Hih in Thupipen TOPA gen ahi hi: ‘Edom in Judah innkuan tungah phu la-a tua banga a hihna uh hangin mawh lua mahmah uh hi.

¹³Tua ahi ciangin Thupipen TOPA thugen hih ahi hi: Edom langkhatah ka khut ka zankhia dinga a mite le a ganhingte uh ka that ding hi. Teman panin Dedan dong gamval ka suaksak dinga, amaute namsau-in a tuk ding uh hi.

¹⁴Ka mi Israel-te zangin Edom tungah phu ka la dinga, ka thangpaihna le ka hehna tawh kituakin Edom ka thuaksak ding hi; amaute in ka phulakna a thei ding uh hi, Thupipen TOPA in cikhia hi.’ ci in," hong ci hi.

¹⁵"Hih in Thupipen TOPA gen ahi hi: ‘Philistia-te in tanglai peka kigalneihna tawh a lungsimun a siatsak nopna taktak hangin Judah-te susia uh a, phu la uh hi;

¹⁶tua ahi ciangin Thupipen TOPA gen hih ahi hi: Philistia-te langah ka khut ka zankhia dinga Kereth-te khenkhia in tuipi dunga omlaite ka susia ding hi.

¹⁷Ka thangpaihna hangin amaute dan ka tuaksak dinga nasiatakin phu ka la ding hi. Amaute tungah phu ka lak ciangin amaute in keimah TOPA ka hilam hong thei ding uh hi,’ ci in," hong ci hi.