Read Zokam Ezekiel 26 Bible Online

Ezekiel 26 - Zokam bible

Ezekiel 26

¹A kum sawm le khatna tua kha a ni masapen ni-in TOPA thu kei tungah hong tunga:

²"Mihing tapa aw, Tyre in Jerusalem tung ah, ‘Awi bek si’ng! Minamte kongpite kitan khina, a kongkhakte kei adingin kihong kek hi; tu-in tuanu kisia ta hi, kei ka khangto ta ding hi’ cihsan hi.

³Tua ahi ciangin hih in Thupipen TOPA gen ahi hi: Tyre aw, nang langah ka pang hi. Nang langkhatah minamte tampi ka pangsak dinga tuipi hual khang a bang ding uh hi.

⁴Amaute in Tyre kulhte susia in a tausangte kaipuk ding uh hi. A leisek tangte nilkhia-in suang gawtak bek ka dawksak ding hi.

⁵Keimah Thupipen TOPA in ka gensa ahi manin tuipi pua-a len phona mun a suak ding hi. Tuanu minamte galmat suak dinga,

⁶a munpi-a a tensakte namsau in kivatmang ding hi. Tua ciangin amaute in keimah TOPA ka hilam hong thei ding uh hi.

⁷"Bang hang hiam cih leh hih in, Thupipen TOPA gen ahi hi: Tyre a kumpite kumpipa Babylon kumpipa Nebuchadnezzar a[58] sim dingin leilu-lam panin galkap tampi, sakol, sakolleng le sakol galkapte tawh ka kuansak ding hi.

⁸Amah in a munpi-a a tensakte namsau-in a vatmang ding hi; nang hong umcih nading bawlin na kulh banin phung ciang ding uh a, hong doin lum tawh kidal ding uh hi.

⁹Amah in na kulhte molh-tumpi in khawhkham dinga, a galhiamte in na tausangte a phukmai ding hi.

¹⁰A sakolte tam lua mahmah dinga leivui in nang hong tuamcip ding hi. Kulh kiphuvang a mi a lut henhan bangin na kongpi-ah amah a lut ciangin sakol galkap, van pua lengte le sakol-leng huging in na kulh a lingsak ding hi.

¹¹A sakolte in na kong zing khempeuh tuancil khin ding uh hi; na mite namsau in that dinga, a khauh mahmah na khuampite lei-ah puk ding hi.

¹²Na hauhna hong puakmangsak ding uh a, na sum-buk van a la mang ding uh hi; na kulhte satkham ding uh a, a hoih mahmah na innte phelgawpin suangte, inn singte le leiseek-tangte tuipi sungah a pai ding uh hi.

¹³Lasa-a gamlumna ka beisak dinga na harp tumging-te uh a kiza nawn kei ding hi.

¹⁴Suang gawtak lak kong suaksak dinga nga betna lente kiphona mun na suak ding hi. Keimah TOPA in ka gensa ahi manin nang hong kilam kik ngei nawn kei ding hi, Thupipen TOPA in ci khia hi.

¹⁵"Hih in Tyre tungah Thupipen TOPA gen ahi hi: Nang sungah mi kithatin aliamte a tau hun ciangin na pukna awging in tuipi gei-a gam teng lingsak ding hilo ahi hiam?

¹⁶Tua ciangin tuipi gei-a gam-ukte khempeuh a kumpi tokhom panun tuakkhia ding uh a, a puantualpite uh koihkhia in a kizepna thupite uh a suahkhia ding uh hi. Patauhna bek silhin lei lakah tu ding uh a, a paisuk a paitohna-uah nang hong gimneihin lingling ding uh hi.

¹⁷Tua ciangin nang tamlawhna in hong nei ding uh a, nang tungah: "‘Tuipi gei-a mite omna a minthang khuapi aw, kinak siat na lawmlawm cia! Nang le na sunga tengte, tuipi tunga vang neite in tua lai-a tengte khempeuh na lausak uh hi.

¹⁸Na pukni-in tuipi gei-a gamte ling uh a, na kicipna in tuipi sunga tuikulhte lausak hi,’ hong ci ding uh hi.

¹⁹"Hih in Thupipen TOPA gen ahi hi: Keimah in kuama ten nawnloh nading gamsimtham kong suahsak ciang le tuipi thukpi nang kong tuupsak ciang, tuihualpite in nang hong tuam ciangin,

²⁰lei nuai-ah a paisate tawh tanglai peka a paisate kiangah, nang kong puak ding hi. Tangkum a kisiasa lei nuai-a a paisate tawh kong tengkhawmsak dinga, a nungtate tenna lei tungah hong kilehin mun a[59] na ngah kik nawn kei ding hi.

²¹A lipkhaphuai mahmah in kong beisak dinga na om nawn kei ding hi. Nang hong kizongzong dinga ahi hangin hong kimukik nawn kei ding hi, Thupipen TOPA in cikhia hi," hong ci hi.