Read Zokam Ezekiel 27 Bible Online

Ezekiel 27 - Zokam bible

Ezekiel 27

¹TOPA thu kei tungah hong tunga:

²"Mihing tapa aw, Tyre taamlawh in.

³Tuipi zuatna kongpi ah tengin tuipi gei mun tuamtuam pana sumbuk bawlte kisuktuahna-a teng Tyre tungah gen in: ‘Hih in Thupipen TOPA gen ahi hi: "‘Tyre aw, nang in, "Mel hoihna khempeuh ka cin hi," na ci hi.

⁴Na ukna gam tuipite umcihna sung hi a; nang hong lamte in hoihna kima hong zep uh ahi hi.

⁵Amaute in hong lamna uh singte khempeuh Senir b[60] pana takkungte ahi hi. Na puankhai khuam dingin Lebanon panin tamtak sing a la uh hi.

⁶Nang hong kihawhna-khe dingin Bashan pana tawsaw sing a bawl uh hi. Cyprus c[61] gei panin cypress d[62] taksan la-in, na sual dingin phah uh a, saihapakin a zem uh hi.

⁷Na puankhai pen hoihtaka kizem Egypt pana saihadial puan hi-a na dialkhai-in kizang hi. Na tungkhuh adum le adupsan-te Elishah dung pan ahi hi.

⁸Nang hong hotte Sidon-te le Avad a tengte ahi uh hi; Tyre aw, na misiamte mah in nang hong hawl uh hi.

⁹Gebal e[63] panin tanglai khutsiamte hong tuanga tembawpi hong lem uh hi. Tuipi tunga tembaw khempeuh le a hawlte nang tawh kidawlsawn dingin hong zuan uh hi.

¹⁰"‘Persia, Lydia le Put mite in na galkap na sem uh hi. Amaute in a lum uh le a sik lukhu uh na kawm tungah khai uh a, nang hong thupisak uh hi.

¹¹Avad le Helech mite in na kulh kimkotah cing uh a, Gamad-te na tausangah om uh hi. Amaute in na kulh kimkotah a lumte uh khai uh a; na mel hoihna kimsak uh hi.

¹²"‘Van hau lua mahmah na hi manin Tarshish in nang tawh sumbuk bawlkhawm hi; na sumbuk vante ngun, sik, daal le haknaw in hong kheng uh hi.

¹³" ‘Greece-te, Tubal-te le Meshech-te in nang tawh sum a bawl khawm uh hi. Amaute in silate, sumngo a kibawl vante in na vante hong kheng uh hi.

¹⁴" ‘Beth Togarmah mite in van pua sakolte, sakol galkapte, le laate-in na sumbuk van hong kheng uh hi.

¹⁵" ‘Rhodes f[64] mite in nang tawh kizomin sumbawl uh a, tuipi gei-a om gam tampite in nang hong dawl uh hi; amaute in saihapak le ningsing hong pia uh hi.

¹⁶" ‘A piang na tampi nei na hi manin Aram-te g[65] in nang tawh sum bawlkhawm uh hi. Amaute in na sumbuk vante turquoise, puan dupsan, puan kizemte, saihadial hoihte, suang khi le ruby-te in hong kheng uh hi.

¹⁷"‘Judah le Israel in nang tawh sum bawlkhawm uh a, na vanzatte, Minith pana piang mangbuh, moh namkim h[66] khuaizu, sathau le sing namtui tuamtuamin hong kheng uh hi.

¹⁸"‘A piang na tampi hang le van na hauh mahmah manin Damascus in nang tawh sum bawlkhawm a, Helbon pana zu le Zahar pana samulte hong zong uh hi.

¹⁹"‘Uzal pana Dan-te le Greek-te in na sumbuk vante hong lei uh hi; amaute in sik huansa, thaksing le thalsingte-in na vanzatte hong kheng uh hi.

²⁰"‘Dedan-te in sakol dapphah puante sum bawlna in hong nei uh hi.

²¹"‘Arabia-te le Kedar gam-ukte khempeuh na van hong leite ahi uh hi; amaute in tuuno, tuutal le keel in hong lei uh hi.

²²"‘Sheba le Raamah sumbukte in nang tawh sum a bawl uh hi; na sumbuk vante a hoih penpen sing namtui nam khempeuh le suang manpha le khamin hong kheng uh hi.

²³"‘Haran, Canneh le Eden le Sheba, Asshur le Kilmad sumbukte in nang tawh sum bawl uh hi.

²⁴Na sumbuk-zawn ah puan melhoihte, puandum, puan kizemte, limtaka kiphek sualphah puan mel tuamtuam le ciiptaka kihek bikbek khauhualte hong zuak uh hi.

²⁵"‘Na vanzatte Tarshish tembawte in a pua uh hi. Tuipi laizangah van gik pipi tawh na kidim hi.

²⁶Nang hong hotte in tuipi thuk tungah hong hot uh hi. Ahi hangin nisuahna huih in tuipi laizangah nang hong kitamnensak ding hi.

²⁷Na tembaw a kisiat ni ciangin na hauhna, na sumbuk vante le na vanzatte, na tembaw hawlte, na tembaw nasemte, tembaw lemte, na sumbukpa-te, na galkapte khempeuh le tembaw tunga tuangte peuhmah tuipi sungah a tum ding uh hi.

²⁸Na tembaw nasemte awng ding uh a, tuipi gei teng a ling ding hi.

²⁹Tembaw hawhna lente khempeuh in a tembaw uh taisan ding uh hi; a hawlte le a nasemte khempeuh tui gei-ah a ding diing uh hi.

³⁰A aw uh sangsakin nakpi-in nang hong kah ding uh a, amaute lutungah leivui thehin vut lakah a kikhuk ding uh hi.

³¹Nang hangin a lu uh mettol ding uh a, ippi puan a silh ding uh hi. Khasia lua-in nang hong kah ding uh a, thumthum ding uh hi.

³²Amaute in nang hong kahin a thum kawmun nang hong kahtapin: "Tuipi in a umcih Tyre banga gamdai kua om ngei tam?" ci-in taamlo ding uh hi.

³³Na sumbuk vante tuipi tungah a paikhiat ciangin minam tampi tangsapna cingsak a; na hauh mahmahna le na vanzatte in leitunga kumpite a hausak hi.

³⁴Tu-in tuipi in tuipi thuk sungah nang hong kitamzansaka na vanzatte le na mite khempeuh nang tawh na tum khawm uh hi.

³⁵Tuipi gei-a tengte khempeuh in mulkimhuai hong sa in a kumpite uh pumlin ding uh a, lau in mengawp ding uh hi.

³⁶Sumbukte in minamte lakah nang hong phitsan in, lauhuaipi in na bei dinga, na om kik nawn kei ding hi,’ ci-in," hong ci hi.