Read Zokam Ezekiel 29 Bible Online

Ezekiel 29 - Zokam bible

Ezekiel 29

¹A kum sawmna, a kha sawmna ni sawm le ni nih ni-in kei tungah TOPA thu hong tunga:

²"Mihing tapa aw, Egypt kumpipa Pharaoh lam nga inla Egypt-te khempeuh le ama kisiat nading genkhol in.

³Amah hopih inla: ‘Hih in Thupipen TOPA gen ahi hi: "‘Egypt kumpipa Pharaoh aw, nang na luite sunga a bok ganhing lianpi na hi a, nang langah ka pang hi. Nang in, "Nile kei aa ahi hi; keima adinga ka bawlsa ahi hi," na ci hi.

⁴Ahi hangin na khaguh ah sikkawi ka phut dinga, na lui sunga om ngasate nang tungah ka belhsak ding hi. Na luite sung panin na tunga belhte khempeuh tawh nang hong kikaikhia khawm ding hi.

⁵Nang le na luite sunga om ngasa khempeuh sehnel-gamah kong hici nusiat ding hi. Lopaang lakah na kia dinga kuamah in hong khawm lo-in hong tawm kei ding hi. Leitung ganhingte le huihlak vasate an dingin kong pia ding hi.

⁶Tua ciangin Egypt-a tengte khempeuh in keimah TOPA ka hilam a thei ding uh hi. "‘Nang Israel-te pumpeng ciangkhut na suak hi.

⁷A khutun hong mek uh ciangin paa na hi manin kitamin a liangko uh na at a, nang tungah hong kingap uh ciangin na kitana a nung uh a hek a[71] uh hi.

⁸"‘Tua ahi ciangin hih in Thupipen TOPA gen ahi hi: Nang kiangah namsau khat kong kuansak dinga na mite le a ganhingte uh ka thatsak ding hi.

⁹Egypt-te a kinusia gamval a suak ding uh hi. Tua ciangin amaute in keimah TOPA ka hilam a thei ding uh hi. "‘Bang hang hiam cih leh nang in, "Nile kei aa hi a; keima bawlsa ahi hi," na ci hi.

¹⁰Tua ahi ciangin keimah nang le na luite langah ka pang hi, Egypt leitang ka siasak dinga Migdol panin Aswan ciang, Cush b[72] gamgi dong gamtul gam simtham ka suaksak ding hi.

¹¹Mihing khe ganhing khe in tawn lo dinga; tua lai-ah kum sawmli sung kuamah a teng kei ding hi.

¹²A kisiagawpte lakah Egypt leitang gamkhing ka suaksak dinga khuapi kisiate lakah gamkhingin a om ding hi. Minamte lakah Egypt mite ka delhzak dinga gam tuamtuam ah ka thehthang ding hi.

¹³"‘Tua khit ah hih in Thupipen TOPA gen ahi hi. Kum sawmli a cin ciangin a kithehthangna uh minamte lak panin Egypt mite ka kaikhawm ding hi.

¹⁴A saltanna panun amaute ka paikhiatpih kik dinga a pute a pate uh Egypt a[73] saklam ah a ciah kik ding uh hi. Tua lai-ah kumpi gam gina lo khatin a om ding uh hi.

¹⁵Kumpi gamte lakah a gina lo pen hi ding uh a, minam dangte tungah a suak kik zo nawn kei ding uh hi. Ginasak lo lua ding ka hi manin minamte khat beek a uk zo ngei nawn kei ding uh hi.

¹⁶Israel mite adingin Egypt-te a muan bulpi uh ahi ngei nawn kei ding hi. Ahi hangin a huh ding deih ama lam a nga peuhmah adingin mawhna phawksakna hi ding hi. Tua ciangin amaute in keimah Thupipen TOPA ka hilam hong thei ding uh hi,’ ci in," hong ci hi.

¹⁷A kum sawmnih le sagihna a kha masa, a ni masa ni-in TOPA thu kei tungah hong tung hi.

¹⁸"Mihing tapa aw, Babylon kumpipa Nebuchadnezzar in a galkapte nakpi-in hanciamsak a Tyre a sim hi. A vek un a sam uh pulhin a lu uh tol a, a liangko uh a vun kolhkhia hi. Tuaci zawzen napi Tyre a simna uh hangin amah le a galkapte in bangmah pahtakman a ngah kei uh hi.

¹⁹Tua ahi ciangin hih in Thupipen TOPA thugen ahi hi: Keimah in Babylon kumpipa Nebuchadnezzar tungah Egypt ka pia dinga a hauhnate a puakhia mang ding hi. A galkapte khasum dingin a leitangte matsakin a laksak ding hi.

²⁰Amah le a galkapte in ka na sem uh ahi manin a hanciamna ka thukna-in pahtakman in amah Egypt ka piak ahi hi, Thupipen TOPA in cikhia hi.

²¹"Tua ni ciangin Israel innkuante adingin ki b[74] khat ka khangkhiasak dinga, amaute lakah na kam ka hong ding hi. Tua ciangin amaute in keimah TOPA ka hilam hong thei ding uh hi," hong ci hi.