Read Zokam Ezekiel 3 Bible Online

Ezekiel 3 - Zokam bible

Ezekiel 3

¹Tua khit ciangin amah in kei kiangah, "Mihing tapa aw, hih na mai a ne in, hih laizial ne inla tua ciangin pai-in Israel innkuante va paupih in," hong ci hi.

²Tua ciangin ka kamka a, ka nek dingin laizial hong pia hi.

³Tua khit ciangin kei kiangah, "Mihing tapa aw, hih kongpiak laizial ne inla na gilpi dim in," hong ci hi. Tua ciangin ka ne a ka kam sungah khuaizu bangin a khum hi.

⁴Tua khit ciangin amah in kei kiangah, "Mihing tapa aw, tu-in Israel innkuante kiangah pai inla amaute tungah ka thugen va gen in.

⁵A kam telhak le pau haksa mite lakah hong kisawl hi loin Israel innkuante -

⁶pau telhak le kam haksa mi tampite kiang hong kisawl hilo hi. Amaute kiangah kong sawl ciangin na thu hong ngai taktak ding uh hi.

⁷Ahi hangin Israel innkuante in na thu hong ngai nuam lo ding uh hi, bang hang hiam cih leh Israel innkuan bup paupengin lungkhauh uh ahi manin ka thugen a ngai nuam kei ding uh hi.

⁸Ahi hangin amaute mah bangin akhauh mahmah le aduai mahmah in nang kong bawl ding hi.

⁹Na taltang suang sakpen meisah suang sanga a sakzaw-in ka bawl ding hi. Amaute a lehdo innkuan ahi uh hangin amaute ahikeh hong linthawnnate uh kihta kei in", hong ci hi.

¹⁰Tua ciangin amah in, "Mihing tapa aw, limtakin ngai inla kong gen thu khempeuh na lungsim ah kem in.

¹¹Tu-in na mipih saltangte kiangah pai inla va hopih in. Amaute tungah, "Hih in Thupipen TOPA gen hi,’ ci in. A ngai uh a, a ngai kei uh zongin va gen in", hong ci hi.

¹²Tua ciangin Kha in kei hong domto a, ka nunglam ah a gin ngaih mahmah khat - Ama omna munah TOPA minthanna kiphat hen -

¹³a nungta ganhingte kha khat le khat a kinawkkha le apanga a peite a ging henhan ka za hi.

¹⁴Tua ciangin Kha in kei hong domtoin hong paipih a, TOPA khut muanhuai in hong lenkawmin ka lungsim ah hehna le lungkimlohna tawh ka kuankhia hi.

¹⁵Kebar Gunpi gei Tel Aviv a teng salte kiangah ka tung hi. A tenna uh amaute lakah ka lungsim hong zenin ni sagih sung ka tu hi.

¹⁶Ni sagih a cin ciangin TOPA thu kei tungah hong tunga,

¹⁷"Mihing tapa aw, Israel innkuante adingin galvilpa kong suaksak hi; tua ahi ciangin ka thugen za inla kei tangin vauhilh in.

¹⁸Keimah in migilo khat tungah, ‘Na si taktak ding hi,’ ka cih a, nang in amah vauhilh lo ahikeh a nuntakna hot nadingin a gitlohna pan a kikhel nadinga na zol kei leh tuami a mawhna hangin c[7] si dinga, a mawhna sisan nang tungah kong siik ding hi.

¹⁹Ahi hangin migilopa na vauhilh a, amah a gitlohna khawl tuan lo ahikeh a gitlohna lampi pan a kihei nop kei leh a mawhna hangin a si ding hi; ahi hangin nang le nang na kihonkhia ding hi.

²⁰"Khat leuleu, mi thumaan khat a thumaanna panin a kihei a, a hoih lo a sep ciangin ama kimuktuk nading ka koih dinga amah a si ding hi. Amah vauhilh lo na hi nungsang ama mawhna hangin a si ding hi. A hihsa ama thumaanna kiphawkkha nawn lo dinga, ama sisan hangin nang kong mawhsak ding hi.

²¹Ahi zongin a thuman mipa a mawh loh nadingin na vauhilh a, a mawh nawn kei leh amah in amaana kivauhilhna mang ahi manin nungta taktak dinga, nangmah le nangmah a kihonkhia na suak ding hi," hong ci hi.

²²TOPA khut ka tungah om lai-a amah in, "Dingkhia inla zanglei-ah pai in tua lai-ah nang kong hopih ding hi," hong ci hi.

²³Tua ciangin dingkhia-in zanglei ah ka pai hi. Tua lai-ah Kebar Gunpi gei-a ka muh minthanna tawh a kibang TOPA’ minthanna na dinga, ka khuptuk suk hi.

²⁴Tua ciangin ka sungah Kha hong tumin ka khe in hong phongto hi. Kei hong hopih a, "Pai-in na inn sungah kikhakkhum in.

²⁵Nang mihing tapa khau-in hong khih ding uh hi; mite lakah na pai theih loh nadingin nang hong kihen ding hi.

²⁶Amaute a lehdo innkuante ahi uh hangin amaute tai thei loin na daih nadingin na kam sunga na leii na dang tungah ka belhsak ding hi.

²⁷Ahi zongin nang kong hopih ciangin na kam ka hong dinga, amaute kiangah, ‘Hih in Thupipen TOPA thugen ahi hi,’ na ci ding hi. A ngai nuamte ngaisak inla, a nial nuamte nialsak in, ahang in, amaute a lehdo innkuan ahi uh hi.