Read Zokam Ezekiel 32 Bible Online

Ezekiel 32 - Zokam bible

Ezekiel 32

¹A kum sawm le nihna, a kha sawm le nih a ni masapen ni-in TOPA thu kei tungah hong tunga:

²"Mihing tapa aw, Egypt kumpipa Pharaoh tawh kisai-in taamlo inla ama kiangah: "‘Nang minamte lakah humpinelkai tawh na kibang hi; nang in ama omna luite sung tuancil gawpin a khe in tuilak tokgawp a, luite buantui a suaksak tuipi ganhing lianpi tawh na kibang hi.

³"‘Hih in Thupipen TOPA gen ahi hi: "‘Mihon tampitak tawh ka len in kong khuh dinga, amaute in ka len sungah nang hong talkaihgawp ding uh hi.

⁴Gamsungah hong lawnin gamlak kong denna ding hi. Leitunga huih lak vasate khempeuh nang tungah hong kikhawm ding uh a, leitunga gamsa khempeuh in hong kham thei loin hong nene ding uh hi.

⁵Mualtung ah na sa ka thehthang dinga, a omlai teng guam sung ka dimsak ding hi.

⁶Na sisan luang tawh leitung tenga mualtung paina lampi teng ka kawtsak dimdem dinga, kuam thukpite na sa tawh ka dimsak ding hi.

⁷Nang kong mutmit ciangin vante ka khuhcip dinga a aksite ka mialsak ding hi. Meii-in ni ka khuh dinga kha a tang kei ding hi.

⁸Vante a, atang thei khempeuh nang tungah ka mialsak dinga; na gam sung tengah khua ka mialsak ding hi, Thupipen TOPA in cikhia hi.

⁹" ‘Minamte lak le na theih loh gamte lakah a[84] nang kong siatsak ciangin mi tampite lungsim ka patausak ding hi.

¹⁰Nang hangin mi tampi ka lauthawngsak dinga ka namsau amaute mai-ah ka leh ciangin nang hangin a kumpite uh lau-in kigaih ding uh hi. Na puk ni-in a nuntak hangun a tatna peuhpeuhuah a ling ding uh hi.

¹¹"‘Ahang in, hih in Thupipen TOPA gen ahi hi: "‘Nang mah hong do dingin Babylon kumpipa namsau hong kuan ding hi.

¹²Minamte khempeuh lakah a cikze lopen - mithatte’ namsau-in na mipite ka puksak ding hi. Amaute in Egypt-te kiphatsakpihte le a mipite a lawnthal ding uh hi.

¹³Keimah in tui kicing mahmah gei-a a ganhonte uh ka susia dinga, mihing khe in ngapin tui nin nawn lo donga, ganhon khe-in zong a buan nawn kei ding hi.

¹⁴Tua ciangin a tuite ka luangsak dinga a luite sathau bangin ka luangsak ding hi. Thupipen TOPA in cikhia hi.

¹⁵Egypt, gam-simtham suaksak a, a gam sunga omte khempeuh ka hawkkhiat mang ciang le tua lai-a tengte khempeuh ka satpuk ciangin amaute in keimah TOPA ka hilam hong thei ding uh hi,’ ci hi.

¹⁶"Hih in amaute in amah a kah taamlawh nading uh ahi hi. Minamte’ tanute taamlo ding uh hi; ahang in, Egypt le a mipite a kahtap ding uh hi," Thupipen TOPA in ci hi.

¹⁷A kum sawm le nihna tua kha ni sawm le nga ni-in TOPA thu kei tungah hong tunga:

¹⁸"Mihing tapa aw, Egypt le a mipite adingin thum inla a hat minamte, leinuai-a a paisate tawh kahtap khawm in.

¹⁹Amaute tungah, ‘Midangte sangin nang hong ki-angvan zaw ahi hiam? Paisuk inla vun at lote tawh kisial khawm in,’ ci in.

²⁰Namsau-a kithatte lakah amaute a puk ding uh hi. Namsau kidok khin ta hi; amah le a mipite kaigawpsak un.

²¹Han khuk b[85] sung panin Egypt le amah a panpihte tungah a makai uh a thahatte in, ‘Amaute hong kumsukin vun at loh namsau-a kithatte tawh a kisial khawm uh hi,’ ci ding uh hi.

²²Ama galkap khempeuh tawh Assyria tua lai-ah om hi; namsau-a puksa ama misite khempeuh’ hankhuk in amah a umcih hi.

²³Amaute hante kawkhuk thukpi sungah om a, ama han kimkotah ama galkapte kisial hi. Tuate a vekpi un, amau gam sunga a nungta khempeuh a kithah huna namsau-a pukte ahi uh hi.

²⁴"Elam zong a han kimkot-a a mipite tawh tua lai-ah om hi. Amaute khempeuh namsau-in puka site ahi uh hi. Amaute khempeuh a nungtate a lausak, gam sungah kithehthangsakin vun at lohte tawh lei nuai-a a paisukte ahi uh hi. Amaute kawkhukpi sunga a paite tawh a maizum khawm ding uh hi.

²⁵Ama han kimkotah a mipite han om a, a kithatte lakah ama ading lupna khat kibawl hi. A vekpi un namsau-a kithat vun at loh vive ahi uh hi. Amaute launa in a nungtate gamah a kithehthangsak manin kawkhukpi sunga a paisate tawh a maizum khawm uh hi; a kithatte lakah amaute kisial hi.

²⁶"Meshech le Tubal zong amaute han kimkot-a a mipite uh tawh tua lai-ah a om uh hi. A vekpi un vun at loh hi uh a, a nungtate gamah a milausakna uh hangin namsau-a kithatte ahi uh hi.

²⁷Amaute, gal sunga a zat uh galvante tawh a paisuk khawm vun at loh galhangte tawh a kisial khawm loh hangin a namsaute uh lukhamin kineisak hi lo hiam? Hih galhangte in a nungtate gam khempeuh a lausak uh hangin amaute mawhna dan amau guh tungah a belh hi.

²⁸"Pharaoh aw, nang zong a kiteisa in namsau a kithat vun at lohte lakah hong kisial ding hi.

²⁹"Tua lai-ah Edom a kumpite le a gam-ukte khempeuh tawh om uh a, vanglian nawn loin namsau-a kithatte tawh a kisial khawm uh hi. Amaute kawkhuk sunga paisa vun-at lohte tawh a kisialkhwm uh hi

³⁰"Leilu lama kumpitapate khempeuh le Sidon-te khempeuh tua lai-ah om uh hi. Amaute vangliatna in mi lausak ngei napi a kithatte tawh a tonsuk khawm uh hi. Namsau-a kithat vun at lohte tawh kisial khawm a, kawkhukpi sunga a paisukte tawh a maizum khawm uh hi.

³¹"Pharaoh in - amah le a galkapte khempeuh tawh amaute mu dinga namsau-a kithat a mipite in amah hehnem ding uh hi. Thupipen TOPA in cikhia hi.

³²A nungtate gamah ama hangin mi ka lausak bangin namsau-a kithatte tawh Pharaoh le a mipite khempeuh vun at loh-te lakah a kisial ding hi, Thupipen TOPA in cikhia hi," a ci hi.