Read Zokam Ezekiel 33 Bible Online

Ezekiel 33 - Zokam bible

Ezekiel 33

¹TOPA thu kei tungah hong tunga:

²"Mihing tapa aw, na gammite hopih inla - amaute kiangah, ‘Gam khat a sim dingin namsau ka kuansak ciangin tua gam mite in amau mi khat galvil dingin a teel uh a,

³amah in tua gam sim dinga kuan namsau a muh ciangin a gam mite vauhilhna-in pengkul mutin

⁴a kuamahpeuh in za napi a kiginkholh kei a, namsau in a sih leh ama sisan a lutung ah tu ding hi.

⁵Pengkul kimut za napi amah kigingkhol lo ahi manin ama sisan ama tunga tu ahi hi. Amah a na kiginkholh leh amah le amah kihon ahi hi.

⁶Ahi hangin galvilpa in namsau hong kuan mu napi-in mite vauhilhna pengkul a mut kei a, amaute lakah khatpeuh nuntakna a bei leh tua mipa ama mawhna hangin kipuakhiamang dinga ahi zongin ama sisan galvilpa tungah ka siik ding hi.

⁷"Mihing tapa aw, Israel adingin nang galvil kong suaksak hi; tua ahi ciangin ka thugen za inla amaute ka vauhilhna gen in.

⁸Mi gilo khat tungah, ‘Migilopa aw, na si taktak ding hi,’ ka cih a, a gitloh nawn loh nadingin zola na gen keileh tua gilopa amawhna hangin a[86] si dinga ama sisan nang tungah kong siik ding hi.

⁹Ahi zongin tua gilopa a kikhel nadingin na vauhilh a, hong man nop keileh a mawhna hangin amah si dinga ahi hangin nang le nang na kihonkhia ding hi.

¹⁰"Mihing tapa aw, Israel innkuante tungah, ‘Hih thu gen in. "Ka mawhnate uh le ka tatkhialhnate un hong nengcip a, tuate hangin b[87] ka hingkiam ta uh hi. Bangci nuntak thei ding ka hi uh hiam?’ na ci uh hi," ci-in gen in.

¹¹Amaute tungah, "Thupipen TOPA in, ‘Ka nuntakna ka lo hi, migilo khat sihna ah ka lungdam kei a ahi hangin kikhela a nuntak ding ka deihzaw hi. Kihei in! Na gamtatna hoih lote lehngatsan in! Israel innkuan aw, bang hangin si zenzen ding na hi hiam?’ ci hi.

¹²"Tua ahi ciangin mihing tapa aw, na gam mite uh tungah, ‘a thumaan mi in thu a man’ keileh ama thumaanna in amah a hon kei ding hi; migilo khat a gitlohna pan a kikhel leh ama gitlohna in amah a puksak kei ding hi. Thumaan mi khat a mawh leh ama thumaannasa hangin a nungta tuan kei hi.

¹³A thumaan mi khat a nungta taktak ding hi, ka cih hangin amah in a thumaanna muangin a git kei leh a hihsa thumaanna khat beek a kiphawksak kei ding hi; a gamtatnasa gitlohna hangin amah a si ding hi.

¹⁴Tua ciangin keimah in migilopa tungah, ‘Na si taktak ding hi,’ ka cih a, ahi hangin amah in a mawhna lehngatsanin thumaan thutangin a gamtat leh -

¹⁵amah in a leitawipa tungah a laksa khapna ante a piak kik a, a guksate pia kikin, nuntakna a tun thukipte a zuih a, a gitloh gamtat nawn kei leh, a nungta taktak ding hi; amah si lo ding hi.

¹⁶A bawlsa mawhnate khat beek a kiciamtehsak kei ding hi. Amah thumaan thutang a gamta ahi hi; a nungta taktak ding hi.

¹⁷Tua hi napi na gam mite in. ‘Topa hihzia a thutang kei hi ci uh hi. Ahi hangin a thutang lo amau hihzia hi zaw hi.

¹⁸A thumaan mi khat thumaan loin a gamtat leh tua hangin si ding hi.

¹⁹Tuateh migilo khat in a gitlohna lehngatsanin thumaan thutangin a gamtat leh tua banga a gamtat manin a nungta ding hi.

²⁰Tua hi napi Israel innkuante aw, ‘Topa hihzia a thutang kei hi,’ na ci uh hi. Ahi hangin note tungah na hihzia bang ciatun thu kong khen ding hi," hong ci hi.

²¹I saltan zawh a kum sawm le nihna, a kha sawmna a ninga ni-in Jerusalem pan a suakta mi khat kei kiangah hong pai hi. Amah in, "Khuapi puk ta!" hong ci hi.

²²Tua mipa hong tunma a nitak in TOPA thu ka tungah hong kinga a; a zingsang ciangin amah in ka kiangah hong pai mipa mai-ah ka kam hong honsak hi. Tua ciangin ka kam kihong a tua-a kipan ka dai nawn kei hi.

²³Tua ciangin TOPA thu kei tungah hong tunga:

²⁴"Mihing tapa aw, a kisiasa Israel gama teng mite in, ‘Abraham khat bekbek hi napi hih leitang ama aa ahi hi. Ahi hangin eite tampi i hi hi. Eite tanh dingin hong kipia taktak hi,’ ci uh hi.

²⁵Tua ahi ciangin amaute kiangah, ‘Hih in Thupipen TOPA gen ahi hi: Sa sungah sisan om laipi ne-in, na milimte uh enin sisan na luansak nungsangun gam nei ding na hi uh hiam?

²⁶Na namsau uh na suang uh a, a kihhuai-in gamta-in na vengte uh zite na buansak uh hi. A tuacipi mah in gam neih sawm na hi uh hiam?’ ci in.

²⁷"Amaute kiangah hih thu gen in: ‘Hih in Thupipen TOPA gen ahi hi: Ka nuntakna ka lo hi, a kisiasa gam sunga a kinusiate namsau in a puk ding uh hi; khuaneu-a omte gamsa gilote nek dingin ka pia dinga, suanghawm sung le kulh muanhuai sunga omte pulpi in a si ding uh hi.

²⁸Keimah in a gam uh kimanna a nei lo gamkhing ka suaksak dinga, a kisaktheihpih uh thahatna bei-in Israel mualte kuamah in a kantan loh nadingin gamkhing a suak ding hi.

²⁹Amaute in a kihhuai na khempeuh a sep manun a gam uh gamkhing ka suahsak ciangin amaute in keimah TOPA ka hilam hong thei ding uh hi,’ ci hi.

³⁰"Mihing tapa aw, nang tawh kisai-in kawm phung le inn kongkhakte ah na gam mite khat le khat nang thu kikum uh a, ‘Hong pai-in TOPA kiang pana hong tung thu za un,’ kici uh hi.

³¹Ka mite a ngeina bangin na kiangah hong pai uh a, na thugen ngai-in na mai-ah tu uh hi; ahi hangin na gen bangin gamta lo uh hi. Amaute a kam-un ki-ap uh a, ahi hangin amaan lo-a ngah nadingin a huaiham uh hi.

³²Amaute adingin nang, aw khum mahmah in zawllate sa a, aw kihual mahmah in tumtheih a tumpa sangin na kiman zawkna a om kei hi; ahang in, na kammalte za napi na gen bangin a gamta kei uh hi.

³³"Hihte khempeuh tunga - amaan takpi ciangin - amaute in amaute lakah kamsang khat om zo ahilam a thei ding uh hi.