Read Zokam Ezekiel 36 Bible Online

Ezekiel 36 - Zokam bible

Ezekiel 36

¹"Mihing tapa aw, Israel mualliante kiangah thu genkhol inla, ‘Israel mualliante aw, TOPA thugen za un.

²Hih in Thupipen TOPA gen ahi hi: Galte in note tungah, "Leltak! Tanglai-a munsangte eite neihsa suak zo hi," ci uh hi,’ ci hi.

³Tua ahi ciangin thu genkhol inla, ‘Hih in Thupipen TOPA gen ahi hi: A om lai minamte neihsa na suah nadingun na kimkot panun amaute in hong bengin hong siasakmang uh a, na thuaksak mite un hong elko in hong gensia uh hi.

⁴Tua ahi ciangin Israel mualliante aw, Thupipen TOPA thugen za un: Hih pen Thupipen TOPA in mualliante le mualneute tung, kuamte le kuamthukpite tung, a kisiasa gamkhingte le galte laksa khuapi siasate le na kimkota minam om laisunte in ciamnuihna-a hong neite tunga hong gen ahi hi.

⁵Thupipen TOPA thugen in: Ka hazatluatna hangin minam om laisunte le Edom langkhatah thu ka gen khin hi, ahang in, amaute lungsimah hazatna le muanna tawh a gama lonona munte a suh theih nadingun ka gam teng amau neihsa a suah uh hi,’ci hi.

⁶Tua ahi ciangin Israel gam tawh kisai-in thu genkhol inla mualliante le mualneute tung, kuamte le kuamthukpite tungah: "Hih in Thupipen TOPA gen ahi hi: Note in minamte simmawhna thuak khin na hi manun ka aamna thangpaihna tawh ka pau hi.

⁷Tua ahi ciangin hih in Thupipen TOPA gen ahi hi: Ka khut lamto-a ka kiciam inah note kimkot-a minamte in zong simmawhna a thuak ding uh hi.

⁸"’Ahi hangin no Israel mualliante aw, na hiangte uh zaamin ka mi Israel-te adingin gah na gah ding uh hi, ahang in, amaute inn ah hong ciah baih ta ding uh hi.

⁹No lamah ka panga kong angvan ding hi; note hong kitovuungin, hong kivawh dinga

¹⁰note tung le Israel innkuan tung nangawnah mi ka kibehlapsak ding hi; khuapite ah mite tung kikin a siasate kilam kik ding hi.

¹¹Note tungah mihing ganhing ka khangsak dinga amaute gahpha mahmahin tampitak a pha ding uh hi. A beisa huna bangin na tungah mi ka tengsak dinga, a beisa hun sangin kong daupaisak zaw ding hi. Tua ciangin keimah TOPA ka hilam nong thei ding uh hi.

¹²Note tungah mi, ka mi Israel-te ka vaksak ding hi. Amaute in nang hong nei ding uh a, nang amaute’ gouluah na hi ding hi; nang in amaute tate na sutkhia ngei nawn kei ding hi.

¹³"’Hih in Thupipen TOPA gen ahi hi: Mite in nang tungah, "Mite na nawmvalh a, na minamte’ tate na sutkhia hi," hong ci uh hi.

¹⁴Tua ahi ciangin mi na nawmvalh nawn kei dinga na minamte ta nei loin a om nawn kei ding hi, Thupipen TOPA in cikhia hi.

¹⁵Minamte hong engkona hong zasak nawn loin, mite kong simmawhbawlsak nawn kei dinga na minam ka puksak nawn kei ding hi, Thupipen TOPA in cikhia hi,’ ci-in gen in," hong ci hi.

¹⁶TOPA thu kei tungah hong tung kik a:

¹⁷"Mihing tapa aw, Israel mite amau gamah a ten lai-un amaute gamtatna le a nasepnate-un a gam uh ninsak uh hi. Kei muhna ah amaute gamtatna, khasima numeite’ nin tawh kibang hi.

¹⁸Tua ahi ciangin amau gamah mihing sisan a luansakna uh le a gam uh milimte-in ninsak uh ahi manin amaute tungah ka thangpaihna ka sungkhia hi.

¹⁹Minamte lakah ka delhzaka, gam citengah kithehthang uh hi. Amaute gamtatna le a nasepnate uh tawh kizui-in amaute tungah thu ka khen hi.

²⁰Minamte laka a paina peuhpeuh uah ka min siangtho a daisak uh hi, tua hangin amaute tawh kisai-in, ‘Hihte TOPA mite hi napi ama gam a nusia uh hi,’ kici hi.

²¹Israel innkuante in a paina peuhpeuh uh minamte laka a daisak uh ka min siangtho ka khual hi.

²²"Tua ahi ciangin Israel innkuante tungah: Hih in Thupipen TOPA gen ahi hi: ‘Israel innkuante aw, hih ka bawl ding nate note kong khualna-a ka bawl hi lo hi. Note in minamte laka na paina peuhuah na daisak uh ka min siangtho ka khualna ahi hi.

²³Minamte laka na daisak uh, amaute laka na daisak uh ka min alian mahmah ka min a sianthona kong lak ding hi. Note tungtawnin amaute mai-ah keimah ka sianthona kong kilah ciangin minamte in keimah TOPA ka hilam hong thei ding uh hi, Thupipen TOPA in cikhia hi.

²⁴" ‘Ahang in, minamte lak panin kong lakhia ding hi; gam khempeuh panin kong khawm dinga nomau gamah kong puak kik ding hi.

²⁵Note tungah tui siangtho kong theh dinga na siang ding uh hi; na siantho lohna khempeuh uh ahi na milimte khempeuh panun kong siangsak ding hi.

²⁶Note lungsim thak kong guan dinga; na sunguah kha thak ka guang ding hi. Na suang lungtang uh ka lakhia dinga satak lungtang kong guan ding hi.

²⁷Note sungah ka Kha ka guang dinga ka thukipte hong zuisakin ka thukhamte limtakin kong tangsak ding hi.

²⁸Na pute uh ka piaksa gam sungah na teng ding uh hi; note keima mi na hi ding uh a, keimah note Pasian ka hi ding hi.

²⁹Na siantholohna khempeuh panun kong honkhia ding hi. An ka sam dinga tampi phasakin kialpi hong tung nawn kei ding hi.

³⁰Kialpi hangin minamte lakah na maimawl nawn loh nadingun na singgahte uh gahphasakin na lo-uah an tampi ka piangsak ding hi.

³¹Tua ciangin na gamtat hoihlohna uh le na gitlohna uh na phawk ding uh a, na mawhnate uh le a kihhuai na gamtatnate uh hangin no le no na kikih ding uh hi.

³²Keimah in note kong khualna-a ka hih loh ahilam na theih ding uh ka deih hi, Thupipen TOPA in cikhia hi. Israel innkuante aw, maizum unla na gamtatnasate uh hangin maimawl un!

³³"’Hih in Thupipen TOPA gen ahi hi: Na mawhnate khempeuh panun kong siansak ni-in na khuapite uah kong tengsak kik dinga a siate a kilampha ding hi.

³⁴A tawnkhate muhna ah gamval a suak gamte gamval hi nawn loin kikho ta ding hi.

³⁵Amaute in, "Hih a kimawk nusiat gam, Eden huan bang ta hi; a kisusia gamkhinga om a kisia khuapite tu-in mi tenga kulhin ki-um ta hi," ci ding uh hi.

³⁶Tua ciangin note kima om minamte in, keimah TOPA in a kisusiate lam kikin gamkhing teng a kikhosak kikpa ka hilam a thei ding uh hi. Keimah TOPA in ka gensa hi a, ka sem ding hi,’ ci hi.

³⁷"Hih in Thupipen TOPA gen ahi hi: Israel innkuante ngetna ka mang kik dinga amau adingin hih ka sem ding hi: a mite uh tuu zahin

³⁸Jerusalem-a a kisehsa pawite a biakna ding tuuhonte zahin ka tamsak ding hi. Tua ciangin a kisiasa khuapite ah mihing honpi dim ding hi. Tua ciangin amaute in keimah TOPA ka hilam hong thei ding uh hi," a ci hi.