Read Zokam Ezekiel 37 Bible Online

Ezekiel 37 - Zokam bible

Ezekiel 37

¹TOPA khut ka tungah hong kinga a, TOPA Kha in kei hong paikhiatpihin kuam laizang khatah hong omsak hi; tua kuam ah guhsia bekbek a om hi.

²Amah in tuate lakah kei hong vakpih kawikawi a, tua kuam sungah guh tampitak kiphah ziahzuahin tua guhte a keu giugeu hi.

³Amah in kei kiangah, "Mihing tapa aw, hih guhte a nungta thei ding hiam?" ci-in hong dong hi. "Thupipen TOPA aw, nang bek in na thei hi," ka ci hi.

⁴Tua ciangin kei kiangah, " Hih guhte tungah thu genkhol inla amaute kiangah, ‘Guhkeute aw, TOPA gen za ta un!

⁵Hih guhte tunga Thupipen TOPA thugen hih ahi hi: Na sungah huu a[89] ka lutsak dinga na nungta ding uh hi

⁶Note tungah thagui ka thuah dinga satak dimsakin vunin kong tuam ding hi; note sungah huu ka lutsak dinga tua ciangin na nungta ding uh hi. Tua ciangin keimah TOPA ka hilam nong thei ding uh hi,’ ci in," hong ci hi.

⁷Tua ciangin hong kisawl bangin thu ka genkhol hi. Ka thugen hun sungin a gamlum khat hong om a kitat luapluapin guhte amau mun ciatah a kithuah uh hi.

⁸Ka et leh tuate tungah thagui le satak hong kithuah a, vun in a tuam hi, ahi hangin amaute sungah huu a om nai kei hi.

⁹Tua ciangin kei kiangah, "Huu tungah thu gen in, mihing tapa aw, thu gen inla tua tungah,’ Hih in Thupipen TOPA gen ahi hi: Huu aw, huih kiuli panin hong pai inla hih a sisate a nuntak theih nadingin a sungah lut in,’ ci in," hong ci hi.

¹⁰Ama hong sawl bangin thu ka gena amaute sungah huu a lut hi. Amaute nungta uh a, a khe-un a ding uh hi- galkap honpi khat ahi hi.

¹¹Tua ciangin amah in kei kiangah: Mihing tapa aw, hih guhte Israel innkuan bup ahi hi. Amaute in, ‘Ka guhte uh keugaw a, ka lametna uh beita hi; kote hong kikhenkhia ta hi,’ ci uh hi.

¹²Tua ahi ciangin thu gen inla amaute tungah: Hih in Thupipen TOPA gen ahi hi: Ka mite aw, na hankhukte uh ka hong dinga tuate panin kong lakhia to ding hi; note Israel gamah kong puak kik ding hi.

¹³Na hankhukte uh honga kong lakkhiattoh ciangin keima mi note in keimah TOPA ka hilam nong thei ding uh hi.

¹⁴Ka Kha note sungah ka koih dinga nungta-in na gamuah kong tengsak ding hi. Tua ciangin keimah TOPA in ka gensa a sem ka hilam nong thei ding uh hi, TOPA in cikhia hi,’ ci in," hong ci hi.

¹⁵TOPA thu kei tungah hong tunga:

¹⁶"Mihing tapa aw, ciang khat la inla a tungah, ‘Ama kipawlpih Judah le Israel mite aa’ ci-in gelh in. Tua ciangin ciang dang khat la leuleu inla a tungah, ‘Ephraim ciang, ama kipawlpih Joseph le Israel innkuante khempeuh aa,’ ci-in gelh in.

¹⁷Na khut sungah ciang khat a suak dingin ciang khat tungah a khat zom in.

¹⁸"Na gam mite in na kiangah,’ Hih a deihna bang hiam?’ ci-a hong dot uh ciangin

¹⁹amaute kiangah, ‘Hih in Thupipen TOPA gen ahi hi: Ephraim khut sunga om - amah tawh kipawl Israel behte - Joseph’ ciang ka la dinga Judah ciang tawh zomin tuate gel ciang khat ka suah dinga, kei khut sungah khat a suak ding uh hi,’ ci in.

²⁰A tunga lai na gelhsa ciangte amau muhin tawi inla

²¹amaute kiangah, ‘Hih in Thupipen TOPA gen ahi hi: Keimah in Israel mite a tunna mun uh minamte lak panin ka lakhia ding hi. A omna munmun panun amaute ka kaikhawm dinga amaute gamah ka puak kik ding hi.

²²Keimah in Israel mualliante tungah amaute minam khat ka suaksak ding hi. Amaute khempeuh a uk kumpi khat omin minam nih suak ngei nawn lo ding uh a, kumpi-gam nihin a kikhen ngei nawn kei ding uh hi.

²³Keimah in a nungtolhna a[90] uh mawhnate panin honkhia-in siangsak ding ka hi manin amaute milim, a kihhuai milimte le a tatkhialhnate uh tawh a kininsak nawn kei ding uh hi. Amaute keima mi suak ding uh a, keimah amaute Pasian ka hi ding hi.

²⁴"’Ka nasempa David amaute kumpi hi dinga, amaute khempeuh a cing ding tuucing khat ahi ding hi. Ka thukhamte zui ding uh a, ka thukipte limtakin a tang ding uh hi.

²⁵Ka nasempa Jacob ka piaksa na pate uh tenna gamah amaute a teng ding uh hi. Amaute le a tate uh le a tute uh tua lai-ah teng tawntung ding uh a, ka nasempa David a ukpa uh hi tawntung ding hi.

²⁶Amaute tawh kilemna thukhun ka bawl dinga, tua pen tawntung thukhun hi ding hi. Amaute kipsakin ka pungsak dinga, amaute lakah ka munsiangtho a tawntungin ka koih ding hi.

²⁷Ka tenna mun amaute tawh a om ding hi; keimah amaute Pasian ka hi dinga, amaute ka mite hi ding uh hi.

²⁸Amaute lakah ka munsiangtho a om den ciangin minamte in Israel-te a siangthosak keimah TOPA ka hilam a thei ding uh hi,’ ci in," hong ci hi.