Read Zokam Ezekiel 38 Bible Online

Ezekiel 38 - Zokam bible

Ezekiel 38

¹TOPA thu kei tungah hong tunga:

²"Mihing tapa aw, Magog gama Gog, Meshech le Tubal ukpipa b[91] lam nga inla ama langah thu genkhol in:

³‘Hih in Thupipen TOPA gen ahi hi: Meshech le Tubal ukpipa c[92] Gog aw, nang langah ka pang hi.

⁴Na khaguh ah sikkawi thuahin nang kong pumpei dinga, na galkap buppi, na sakolte, galhiam kimtaka a nei na sakol tuangte, lumneu lumlian a tawi mipite, a vekpi-un a namsau uh a teesak zuahzuahte tawh kong kaikhia ding hi.

⁵Persia, Cush d[93] le Put-te in amau tawh kopin lum le sik lukhu nei ciat uh hi;

⁶Gomer a galkap khempeuh tawh, leilu-lam pek panin Beth Togarmah a galkapte tawh - minam tampi nang tawh a kop uh hi.

⁷"’Kithawi un! Nang le nang kianga hong kikhawm mipi khempeuh kigingsa-in om unla amaute uk in.

⁸Ni tampi khit ciangin galhiam hong kitawisak ding hi. Sawtpi hun lai-a gamkhing a suaksa Israel mualliante tunga om minamte pana kikaikhawm gal sunga a suaktate’ gam khat mailam hun ciangin kong simsak ding hi. Amaute pen minamte lak pana kikaikhia hi uh a, tu-in a vekun lungmuangtakin teng uh hi.

⁹Nang le na galkap khempeuh le nang tawh a omkhawm minam tampite huihpi nung bangin na kuanto ding uh hi; meiipi in leitung a tuam tawh na kibang ding uh hi.

¹⁰"’Hih in Thupipen TOPA gen ahi hi: Tua ni ciangin na lungsim ah ngaihsutnate hong suak dinga, a hoih lo khat na sawm ding hi.

¹¹"Kulh-a ki-um lo khuanote omna gam khat ka sim ding hi; bangmah a phawk lo lungmuangtaka om - kulh-a ki-um lo, kongpi le kongpi kalhna a nei lo mite ka sim ding hi;

¹²a kisiasa muna a lalkik minamte pana kikaikhawm, ganhing le van a hau, gam laizanga tengte langkhatah ka khut ka liik dinga luhgawpin a nate uh ka laksak ding hi," na ci ding hi.

¹³Sheba, Dedan, Tarshish sumbukte le a khuaneute e[94] khempeuh in nang tungah, "Van hong laksak dinga hong pai na hi hiam? Van hong laksak ding, ngun le khamte a puakhia ding, ganhingte le vante a puakhiamang ding le tampitak a man dingin na mipite hong kaikhawm na hi hiam.?" hong ci ding uh hi,’ ci hi.

¹⁴"Tua ahi ciangin mihing tapa aw, tua thu genkhol inla Gog tungah: Hih in Thupipen TOPA gen ahi hi: Ka mi Israel-te lungmuangtaka a ten uh tua ni ciangin phawkkha lo ding na hi hiam?

¹⁵Na omna mun leilu-lam gamla pek panin hong pai-in minam tampite nong tonpih dinga, a vekpi un sakol tunga tuang a thahat galkap hon tampitak hi ding uh hi.

¹⁶Meii in leitung a tuam bangin ka mi Israel-te sim dingin na kuan ding uh hi. Gog aw, hong tung ding nite ah ka sianthona hong kitheih nadingin minamte mitmuhin nang tungtawna ka kilah theih nadingin ka gam sim dingin kong puak ding hi.

¹⁷"’Hih in Thupipen TOPA gen ahi hi: Ka nasem Israel kamsangte zanga sawtpek lai-a ka genpa nang hi lo na hiam? Tua hun lai-in amaute sim dingin nangmah kong kuansak nading amaute in kum tampi sung a genkhol uh hi.

¹⁸Tua ni ciangin hih bangin a piang ding hi: Gog in Israel gam a sim ciangin a sa mahmah ka hehna a kuangkhia ding hi, Thupipen TOPA in cikhia hi.

¹⁹Ka aamna le ka thangpaihluatna hanga ka cihinah tua hun ciangin Israel gamah zin nakpi-in ling ding hi.

²⁰Keima maitang ah, tuipi ngasate, huihlak vasate, gamsung ganhingte, leithama vak ganhing khempeuh le lei maitanga om mihing khempeuh ling ding uh hi. Mualliante pukin keente cim ding uh a, kulh peuhmah leilakah a puk ding hi.

²¹Ka mualliante khempeuh tunga om Gog sim dingin namsau khat ka sam ding hi, Thupipen TOPA in cikhia hi. Mite khempeuh in a sanggampa namsau in do ding hi.

²²Pulpi le sisan luanna tawh ama tungah thu ka khen ding hi; amah le a galkapte tung le amah tawh a omkhawm minamte tungah guahsiapi, gialpi, kaat kuanglai ka buaksuk ding hi.

²³Tua bangin ka liatna le ka sianthona ka lak dinga minam tampite muhin kei le kei ka kitheisak ding hi. Tua ciangin amaute in keimah TOPA ka hilam a thei ding uh hi," ci hi.