Read Zokam Ezekiel 39 Bible Online

Ezekiel 39 - Zokam bible

Ezekiel 39

¹"Mihing tapa aw, Gog siat ding genkhol inla: ‘Hih in Thupipen TOPA gen ahi hi: Meshech le Tubal ukpipa a[95] Gog aw, nang langah ka pang hi.

²Kong pingpei dinga kong talkaihgawp ding hi. Leilu-lam gamlapi panin kong lakhia dinga Israel mualliante kong simsak ding hi.

³Tua ciangin na veilam khuta na thal ka bengkhia dinga, na taklam khuta na thaltang ka kiasak ding hi.

⁴Israel mualtung ah nang le na galkapte khempeuh, nang tawh a kop minamte khempeuh a puk ding uh hi. Vasa nam khempeuh le gamsa khempeuh an dingin nang kong pia ding hi.

⁵Keimah in ka gensa ahi manin gam sungah na puk ding uh hi, Thupipen TOPA in cikhia hi.

⁶Magog le tuipi gei-a lungmuangtaka tengte mei-in ka hal dinga tua ciangin keimah TOPA ka hilam a thei ding uh hi.

⁷"’Ka mi Israel lakah ka min a sianthona ka kitheisak ding hi. Ka min siangtho ka daisak nawn kei dinga, minamte in Israel gam sunga keimah TOPA Siangtho Pa ka hilam a thei ding uh hi.

⁸Tua hun hong tung ta hi! A piang takpi ding ahi hi, Thupipen TOPA in cikhia hi. Ka gensa ni hih ni ahi hi.

⁹"’Tua ciangin Israel khuapi sunga tengte paikhia-in galvante - lumlian lumneute, thal le thaltangte, gal khetbukte le teipite mei-in cihin a haltum ding uh hi. Ansing dingin tuate kum sagih sung a khom ding uh hi.

¹⁰Amaute in gamlakah sing tom loin sing phuk a kul kei ding hi. Ahang in, galhiamte singin a cih ding uh hi. Tua ciangin amaute in amau van a laksakte’ van laksak ding uh a amau na a sutte’ na a sut ding uh hi, Thupipen TOPA in cikhia hi.

¹¹"’Tua ni ciangin Israel gam sungah Gog han mun dingin Tuipi b[96] lam zuatna nisuahna lama c[97] khualzinte paina kuam mun khat ka pia ding hi. Gog le a mipite khempeuh tua lai-ah kivui ding uh ahi manin khualzinte lampi a khaktan ding hi. Tua ciangin tua mun Hamon Gog d[98] Kuam kici ding hi.

¹²"’Israel innkuante in a gamsung uh a hahsiang nadingun kha sagih sung amaute a vui khop ding uh hi.

¹³Tua gam mite in amaute vui ding uh a, amau adingin kei hong kiminthansak ni, a kiphawk den ni khat a suak ding hi, Thupipen TOPA in cikhia hi.

¹⁴"’Leitang hahsiang dingin ahunhunin mi kicial ding hi. Pawlkhatte in gamsung khempeuh zong ding uh a, tuate banah adangte in leitunga omte a phum ding uh hi. Kha sagih a cin ciangin a zong dingin a kipan ding uh hi.

¹⁵Gam sung teng a zonna uah mi khat in misi guh khat a muh leh khul tote in Hamon Gog Kuam ah a vui khit mateng a kiangah ciamtehna khat a phut ding hi.

¹⁶(Tua lai-ah Hamonah e[99] kici khua khat zong a om ding hi.) Tuaci bangin gamsung a hahsiang ding uh hi,’ ci in.

¹⁷"Mihing tapa aw, hih in Thupipen TOPA gen ahi hi: Vasa namkim le gamsa khempeuh sam inla, ‘Hong kikhawm un, Israel mualtunga alian mahmah biakpiakna - no adinga kibawl biakpiakna kimkot ah hong kikhawm un. Tua lai-ah sa ne-in sisan na dawn ding uh hi.

¹⁸Note in tuutal le tuuno, keeltal le bawngtal tawh kibang mi thahatte sa ne-in, gam-ukte si na dawn ding uh hi - amaute a vekpi un Bashan a kivakthau ganhingte vive ahi uh hi.

¹⁹Tua biakpiakna no adingin ka bawl hi-a, a thau na duh zahzah uh ne-in a sisan na khamgawp dong uh na dawn ding uh hi.

²⁰Note in ka sabuai ah sakolte le a tunga tuangte, mi thahatte le galkap namkimte khamtakin na ne ding uh hi, Thupipen TOPA in cikhia hi.

²¹Minamte lakah ka minthanna ka lak dinga, minamte khempeuh in amaute tungah ka khut liikin dan ka tuahsakna a mu ding uh hi.

²²Tua ni-a kipan mailam ah Israel innkuante in keimah TOPA amaute Pasian ka hilam hong thei ding uh hi.

²³Kei tungah ‘Israel mite muanhuai lo uh ahi manin amaute mawhna hangin sal-a kikai ahilam minamte in a thei ding uh hi. Tua ciangin amaute muh loh dingin ka maitang ka seel a, a galte uh khutah pia-in amaute namsau-in a puk uh hi.

²⁴Amaute siantholohna le a gitlohna uh tawh kituakin ka thuaksaka amau muh loh dingin ka maitang ka seel hi.

²⁵"Tua ahi ciangin hih in Thupipen TOPA gen ahi hi: Keimah in Jacob a saltanna a[100] panin ka paikhiatpih dinga Israel mite khempeuh khuatuahin ka min siangtho ka aam ding hi.

²⁶Amaute a gam uah omin kuamah in a lauthawngsak loh hun ciangin kei tunga a bawl uh a muanhuai lohnate uh le maizumhuainate mangngilh ta ding uh hi.

²⁷Minamte lak pan kaikhawm kika, a galte uh gam pan ka khop kik ciangin amaute tungtawnin minam tampite mai-ah ka sianthona ka kilak ding hi.

²⁸Tua ciangin amaute in keimah TOPA amaute Pasian ka hilam hong thei ding uh hi; ahang in, minamte lakah amaute sal-in ka kikaihsak hangin, khat beek nusia loin amau gamah ka kaikhawm kik ding hi.

²⁹Israel innkuante tungah ka Kha buakhia ding ka hi manin amaute kiang panin ka maitang ka seel nawn kei ding hi, Thupipen TOPA in cikhia hi," hong ci hi.