Read Zokam Ezekiel 43 Bible Online

Ezekiel 43 - Zokam bible

Ezekiel 43

¹Tua ciangin mipa in nisuahna lam pang a nga kongpi ah kei hong paipih a,

²nisuahna-lam pana hong tung Israel-te Pasian minthanna ka mu hi. Ama awging tuizeu hawk tawh kibanga a minthanna in leitung a taan hi.

³Ka mangmuhna pen khuapi a a[122] suksiat ding lai-a, le Kebar Gunpi gei-a ka muhte tawh kibanga ka khupbawh suk hi.

⁴Nisuahna-lam nga kongpi tawnin TOPA minthanna biakinnpi sungah a lut hi.

⁵Tua ciangin Kha in kei hong khaangto-in tual sungnungah hong lutpih a, TOPA minthanna biakinnpi a dim hi.

⁶Mipa ka kiangah a din laitakin biakinnpi sunglam panin mi khat in kei hong hopihna ka za hi.

⁷Amah in, "Mihing tapa aw, hih mun ka kumpi tokhom hi-a, ka khepek ngakna mun ahi hi. Hih mun in Israel-te laka ka ten tawntung nading mun ahi hi. Israel innkuante - amaute le a kumpite uh a paktatna b[123] uh le amaute munsang ah nuntakna a nei lo kumpite milimte c[124] in ka min siangtho a ninsak ngei nawn kei ding uh hi.

⁸Amaute in ka kongpi zomah a kongpi uh koihin, ka kongmung gei-ah a kongmung uh a phuh uh ciangin amaute tawh kawm bek in hong hala a kihhuai gamtatna tawh ka min siangtho a ninsak uh hi. Tua ciangin ka heh suaka amaute ka susia hi.

⁹Tu-in ahileh amaute paktatna le nuntakna a nei lo a kumpite uh milimte ka paikhiasak dinga amaute lakah ka teng tawntung ding hi.

¹⁰"Mihing tapa aw, Israel mite a mawhna uh hangin a maizum theih nadingun biakinnpi thu a cingin gen inla

¹¹a gamtatnasate uh hangin a maizum uhleh biakinnpi a kilamzia - a kigualhzia, tumna le pusuahna, a buppi kigeelzia, a zat dingzia d[125] le thukhamte theisak in. Amaute in a kigeelzia tawh kizui-in a ngeinate khempeuh muanhuai-a a zuih theih nadingun amaute mai-ah gelh in.

¹²"Biakinnpi tawh kisai thukham hih ahi hi: Mualtung a om huang kimkot khempeuh a siangthopen hi ding hi. Biakinnpi thukham hih bang ahi hi.

¹³Hih biakna-tau tong kiteh hi a, tong e[126] khat a kici pen tong khat le zapek f[127] a sau hi. A kingakna tong khat thukin tong khat zai-a, a gei kimkota a geivial khap g[128] khat-a puam nei hi. Tua hi-a hih in biakna-tau sanna ahi hi.

¹⁴Lei-a a kingakna pan a vial nuainung ciang tong nih sanga, tong khat zai-in, tawitawm neuzaw pan a zaizaw lama tehin asanna tong li hi-a tong khat a zai hi.

¹⁵Biakna-tau taptung teng a sanna tong li hi-a a taptung kiu ah ki li a poto ding hi.

¹⁶Biakna-tau taptung a ningkim hi-a, adung tong sawm le nih, avai tong sawm le nih mah ahi hi.

¹⁷A sangtuam pen zong a ningkim mah hi a, adung tong sawm le li hi-in avai zong tong sawm le li mah ahi hi. A kimkot ah tong lang a sah geihual le tong khat a pha a ngakna a om ding hi. Biakna-tau kahlei nisuahna-lam a nga hi," a ci hi.

¹⁸Tua ciangin amah in kei kiangah, "Mihing tapa aw, hih in Thupipen TOPA gen ahi hi. Hihte in biakna-tau a kidawh khit ciangin meihal biakna piakna le sisan theh nading ngeinate ahi hi:

¹⁹Ka kianga hong pai ka mai-a biakna hong pia Levi mi Zadok innkuan pana siampite tungah mawhna hanga biakna-in bawngtal no khat na pia ding uh hi, Thupipen TOPA in cikhia hi.

²⁰A sisan tawm na la dinga biakna-tau ki lite nuhin a tau tungnungzaw pen kiu lite, a kimkota a geivialte khempeuh na nuh dinga tua bangin biakna-tau thoihdam in kisiangsak ding hi.

²¹Mawhna hanga biakna dingin bawngtal khat na la dinga munsiangtho pualam biakinnpi huang sunga tua hih nadinga kisehna munah na hal ding hi.

²²"A ni nih ni ciangin kawkbaang lo keeltal khat mawhna hanga biakna-in na pia dinga, bawngtal-a siansuah bangin biakna-tau kisiansuah ding hi.

²³A kisiansuah khit ciangin ganhon lak panin bawngtalno khat le tuutal khat na pia ding hi; a nihin a kawkbaang lo hi ding hi.

²⁴TOPA mai ah na pia dinga, siampite in tuate tungah ci thehin TOPA tungah meihal biakna-in a pia ding uh hi.

²⁵"Ni sagih sung mawhna hanga biakna-in nisimin keeltal na zang ding uh hi. Ganhonte lak pan bawngtalno khat le tuutal khat na pia ding uh a, a nihin kawkbaang lo hi ding hi.

²⁶Amaute in ni sagih sung biakna-tau siansuahna bawl ding uh a, siangsak ding uh hi; tua bangin biakna-tau ap ding uh hi.

²⁷Hih nite a bei khit a nigiat ni-a kipanin siampite in meihal biakna le kilawmtakna biaknate h[129] biakna-tau tungah pia ding uh hi. Tua ciangin note kong sang ding hi, Thupipen TOPA in cikhia hi," hong ci hi.